Read Runyoro - rutooro Ebik 13 Bible Online

Ebik 13 - Runyoro - rutooro bible

Ebik 13

¹Omu kitebe ky'abaikiriza ekikaba kiri Antyokiya, hakaba harumu abarangi n'abeegesa, nubo banu: Baranaba, Simyoni anyakwetwa Kiiragura, Lusiyo owa Kireene, Manayeni ayayoroirwe hamu n'owiisaza Herode, na Saulo.

²Kiro kimu obu bakaba nibasaba MUKAMA kandi nibasiiba, Mwoyo Ahikiriire yabagambira ati: “Munsororremu Baranaba na Saulo, bakole omulimo ogu mbeetiire.”

³Boona obu baamazire kusiiba n'okusaba, baabataho emikono baabatuma.

⁴Ababiri abo obu baamazire kutumwa Mwoyo Ahikiriire, baimukya orugendo orwa Seleyukiya; kandi okurugayo, baagwerra omu meeri, baagenda Kipuro.

⁵Obu baahikire orubuga Salamisi, baarangirra ekigambo kya Ruhanga omu masorrokaniro g'Abayudaaya, kandi bakaba baina Yohaana arukubakoonyera.

⁶Obu baamazire kuraba omu kizinga kyona kya Kipuro, baahika orubuga Paafo. Oku baasangayo Omuyudaaya omu, omunyamasano kandi omurangi w'ebisuba arukwetwa Bar-yesu (amakuru ngu, mwana wa Yesu).

⁷Akaba ali hamu n'omulemi mukuru w'ekicweka eki, omuntu anyakwetwa Serugiyo Paulo, omusaija omwetegereza. Nuwe yayesire Baranaba na Saulo yabasaba kumusoborra ekigambo kya Ruhanga.

⁸Baitu Elima, arukwetwa omunyamasano (habwokuba nugo makuru g'ibara lye) yatandika kubahakaniza naagenderra kuhabisa omulemi mukuru, aleke kwikiriza.

⁹Baitu Saulo, anyakwetwa Paulo, aijwire Mwoyo Ahikiriire, yamugumyaho amaiso

¹⁰nnagamba ati: “Iwe mwana wa Sitaani, iwe omunyanzigwa w'obuhikiriire bwona, iwe anyakwijwire obugobya n'obubi bwona, olireka di kuramaza emihanda ya MUKAMA enyakuterekeriire?

¹¹Lero hati, omukono gwa MUKAMA nigwija kukuteera nukwo ofe amaiso, omale akasumi otarukurora izooba.” Ahonaaho ekiho n'omwirima byamusweka, yahaamanga naaserra ow'okumunanata.

¹²Omulemi mukuru obu yarozire ekibaireho, yaikiriza kandi yahunirizibwa ebi baayegeseze hali MUKAMA.

¹³Paulo n'abagenzi be baagwerra nibaruga Paafo, baayambuka, baahika Peruga, orubuga orwa Panfiliya. Oku nuho Yohaana yabarugiireho, yagaruka Yerusaalemu;

¹⁴baitu bbo bairrayo baaruga Peruga, baahika Antyokiya, narwo rubuga rwa Pisidiya. Kandi ha kiro kya Sabbato bakataaha omu isorrokaniro ly'Abayudaaya, baikarra.

¹⁵Eby'Ebiragiro bya Musa n'eby'abarangi obu byamazire kusomwa, abakuru b'isorrokaniro baabatumaho nibabasaba bati: “Bagenzi baitu, obu muraaba mwina ekigambo ky'okugumya abantu banu, mukigambe.”

¹⁶Paulo nukwo kwemerra, boona yabaculeeza n'omukono gwe, yatandika kwegesa ati: “Inywe bantu ba Isirairi, na inywena abarukutiina Ruhanga, muhurre.

¹⁷Ruhanga w'ihanga lyaitu Isirairi akakoma baisenkuru itwe, yabakuza yabafoora ihanga ruranganwa obu bakaba bali omu nsi ya Misiri, nukwo hanyuma yabaihayo habw'amaani g'obusobozi bwe.

¹⁸Akabagumiisiriza obu bakaba bali omu irungu kumara emyaka makumi ana.

¹⁹Obu yamazire kuhwerekereza amahanga musanju ag'omu nsi ya Kanaani, ensi egi yagiha Abaisirairi ebe bugwetwa bwabu, baamarayo emyaka nka bikumi bbina mw'ataano.

²⁰Ebi obu byahoire, akabaha abacwi b'emisango babaleme okuhika ha businge bw'omurangi Samwiri.

²¹Nubwo bamusabire abahe omukama, kandi Ruhanga yabaha Saulo mutabani wa Kisi ow'omu ruganda rwa Benyamiini, yabalemera emyaka makumi ana.

²²Kandi Ruhanga obu yamwihire ha ngoma, yataho Daudi kuba omukama waabu, ou yagambireho ati: ‘Mmazire kukoma Daudi, mutabani wa Yese, nuwe muntu ndukusiima ow'alikora byona ebi ndukwenda.’

²³Omu baijukuru ba Daudi ogu, Ruhanga numwo yaihiire Isirairi Omujuni, nuwe Yesu, nkooku kyaraganiziibwe.

²⁴Kandi Yesu obu akaba atakaizire, Yohaana akarangirra Abaisirairi boona okubatiza okw'okwegarukamu.

²⁵Yohaana obu akaba naamaliriza omulimo gwe, akagamba ati: ‘Nyowe nimunteekerezaho ki? Tindi ogu ow'okwija, nangwa. Baitu haroho arukunyija enyuma kandi tinsemeriire kusumurra orukoba orw'enkaito ze.’

²⁶“Bagenzi bange, baijukuru ba Abburahamu, na inywena abarukutiina Ruhanga, obukwenda obu obw'okujunwa, niinyowe bwaiziire.

²⁷Baitu abantu ba Yerusaalemu n'abalemi baabo Yesu batamumanyirre noobu kwakuba okukenga ebyagambirwe abarangi, ebisomwa hanu buli Sabbato. Baitu Ebihandiiko bakabihikiriza obu baamusingisize omusango.

²⁸Noobu baraaba baabuzirwe eky'okumujunaana ekisemeriire kumwisa, nabwo bakasaba Pilaato amwite.

²⁹Kandi obu baamazire kuhikiriza byona ebyamuhandiikirweho, baamuhanuura ha muti, baamuziika omu kituuro.

³⁰Baitu Ruhanga akamuhumbuura omu bafu;

³¹yamara ebiro bingi naabonekera abo abaarugire nawe Galiraaya baija Yerusaalemu. Hati nubo barukumuheera obwakaiso omu bantu.

³²Na itwe twizire nitubaleetera Amakuru Amarungi ag'ebi Ruhanga yaraganiize baisenkuruitwe,

³³nkooku yabihikiriize omuli itwe abaana baabo obu yahumbwire Yesu. Kandi nukwo kyahandiikirwe kiti omu zabbuli eya kabiri: ‘Iwe oli Mwana wange, nkuzaire kiro kya hati.’

³⁴Habw'okugumya nkooku yamuhumbwire omu bafu okutagaruka kujunda, Ruhanga akongera ati: ‘Ndikuha emigisa egumire kandi erukwera nk'ei nahaire Daudi.’

³⁵Nikyo yagambiire omu zabbuli endi ati: ‘Toliikiriza Ahikiriire wawe kujunda.’

³⁶Daudi obu yamazire kuhikiriza entegeka ya Ruhanga omu bantu b'obusinge bwe yafa, yaziikwa n'abaisenkuru, kandi yajunda;

³⁷baitu ogu Ruhanga ou yahumbwire, atajunde.

³⁸“Nahabweki bagenzi bange, mumanye okuganyirwa ebibi nkooku kubarangirirwa habw'omuntu ogu Yesu,

³⁹kandi habw'ogu, weena arukumwikiriza naganyirwa byona ebi Ebiragiro bya Musa bitarasoboire kumuganyira.

⁴⁰Nahabweki mwerinde, timwikara kuhikwaho abarangi ebi baarangire bati:

⁴¹‘Inywe abasekeerezi mwetegereze, muhunirre kandi muhweho; habwokuba omu biro byanyu ninkora ekikorwa eki mutalisobora kwikiriza, noobu haakubaho arukukibasoborra.’”

⁴²Obu bakaba nibaruga omu isorrokaniro, abantu baasaba Paulo na Baranaba kugaruka kubasoborra ebigambo ebi ha Sabbato erukwija.

⁴³Orusorrokano obu rwarugirwemu, Abayudaaya baingi hamu n'abantu baayo abaahindukire kutaaha omu diini y'Ekiyudaaya, baakuratira Paulo na Baranaba, kandi bbo baabateererra kwikara nibeesiga embabazi za Ruhanga.

⁴⁴Ha Sabbato eyakurasireho, kutagirwa ab'omu rubuga boona bakeesorooza hamu kuhurra ekigambo kya Ruhanga.

⁴⁵Baitu Abayudaaya obu baarozire obwingi bw'abantu, bakwatwa ihali, baatandika kuhakaniza Paulo ebi yagambire, baamujuma.

⁴⁶Paulo na Baranaba baabagarukamu n'obumanzi bati: “Kikaba nikyetaagwa inywe mubanze murangirirwe ekigambo kya Ruhanga. Baitu obu mwakyangire, mukecwera inywenka omusango nkooku mutasemeriire kutunga obwomeezi obutahwaho; hati itwe nitwija kugenda omu Banyamahanga.

⁴⁷Nikyo MUKAMA yaturagiire naagamba ati: ‘Nkutaireho obe kyererezi hali Abanyamahanga, okujuna kwange okuhikye ha mpero y'ensi.’ ”

⁴⁸Abanyamahanga obu baahuliire eki, baasemererwa, baatandika kuhaisaniza ekigambo kya Ruhanga; kandi boona abaakomiirwe obwomeezi obutahwaho baikiriza.

⁴⁹Ekigambo kya MUKAMA kyararanga omunsi egi yoona.

⁵⁰Baitu Abayudaaya baimukiriza abakazi ab'ekitiinisa abaayekambiraga ediini, hamu n'abasaija bakuru ab'omu rubuga, baatandika kuhiiganiza Paulo na Baranaba, baababinga omu nsi y'owaabu.

⁵¹Nukwo bbo kubateerateera ecuucu y'omu bigere byabo, baagenda Ikoniyo.

⁵²Baitu abeegesebwa baijura omuhimbo na Mwoyo Ahikiriire.