Read Runyoro - rutooro Ebik 14 Bible Online

Ebik 14 - Runyoro - rutooro bible

Ebik 14

¹Obu bakaba bali Ikoniyo, baataaha omu isorrokaniro ly'Abayudaaya, baayegesa ebigambo ebyagwire abantu ha njoka, byaleetera Abayudaaya n'Abagiriiki baingi kwikiriza.

²Baitu Abayudaaya abamu baayanga kwikiriza, baata omu Banyamahanga omutima mubi banobe abantu abaikiriize.

³Oku Paulo na Baranaba baamarayo akasumi, nibeegesa ebya MUKAMA batarukutiina, nawe akagumya ebi baayegeseze ha kisembo kye ky'embabazi, naikiriza ebihuniriza n'ebyamahano bikorwe emikono yabo.

⁴Baitu abantu ab'omu rubuga bakaba beebaganizeemu; abamu bali ha rubaju rw'Abayudaaya, abandi orw'abakwenda.

⁵Ekyarugiremu, Abanyamahanga n'Abayudaaya baikirraniza n'abalemi baayo, baacwa amagezi kubakora kubi n'okubateeza amabaale.

⁶Baitu abakwenda obu baakimanyire, bairukira Lisitura na Derube, embuga za Likaoniya, n'omunsi ezindi eziherraineho.

⁷Oku nuho baarangiriire Amakuru Amarungi.

⁸Omu rubuga Lisitura hakaba haliyo omusaija ayazairwe ali mulema; akaba atarukusobora n'okurubata.

⁹Yaija kuhuliriza Paulo naayegesa; kandi Paulo obu yamurozire, yamanya nkooku aina okwikiriza okurukusobora kumukiza.

¹⁰Yagamba n'iraka likooto ati; “Imuka, oyemerre toro.” Omusaija ayazairwe ali mulema yamatuka, yatandika kurubata.

¹¹Ekitebe ky'abantu obu kyarozire Paulo eki akozire, baatokera haiguru omu rulimi rwabu Orulikaoniya bati: “Abacwezi batwiziremu, bali omu bisisani by'abantu!”

¹²Baranaba baamukubya Zeu, kandi Paulo ow'akaba naabaza muno, baamweta Herume.

¹³Nubwo nyakatagara w'ibandiro ly'omucwezi Zeu erikaba liri omu maiso g'orubuga yaizire n'abantu be, yaleeta enimi zijwekerwe emiihura, boona baagonza kutamba ekyonzira ha irembo ly'orubuga.

¹⁴Baitu abakwenda Baranaba na Paulo obu baakihuliire baatemura ebijwaro byabo, bajumbutuka nibaraba omu kitebe ky'abantu hagati nibabatanga n'iraka likooto bati:

¹⁵“Basaija inywe, kiki ekirukubakoza binu? Na itwe tuli bantu nyabuntu nka inywe. Tubaleetiire Amakuru Amarungi, nukwo muleke abacwezi abo abataina mugaso, muhindukire Ruhanga omwomeezi, ayahangire iguru n'ensi, hamu n'enyanja, na byona ebigirumu.

¹⁶Omu businge bwa ira Ruhanga akaikiriza buli ihanga kwekorra ebyalyo nkooku lirukwenda;

¹⁷baitu nabwo ateebuzeeho obwakaiso obw'ebirungi abakorra naabanagira enjura enyakuruga omwiguru, naabeereza oburo bwanyu omu busumi bwabwo, naabaigusa ebyokulya kandi emitima yanyu naagiijuza okusemererwa.”

¹⁸Paulo na Baranaba noobu baabaliize ebi byona, kake konka balemwe kutanga abantu kubatambira ekyonzira.

¹⁹Nubwo haizire Abayudaaya abaarugire Antyokiya na Ikoniyo. Baatandika kusoonasoona abantu. Ekyarugiremu, Paulo bakamuteera amabaale, baamukurra, baamuturukya omu rubuga, nibagira ngu, afiire.

²⁰Baitu abaikiriza obu baamuhikireho, yaimuka, yagaruka omu rubuga. Ha kiro egyakurasireho, uwe na Baranaba baagenda Derube.

²¹Obu baamazire kurangirra Amakuru Amarungi omu rubuga oru, baatungamu abeegesebwa baingi, baagaruka Antyokiya nibaraba Lisitura na Ikoniyo,

²²nibagumya emitima y'abaikiriza nibabateererra kweyongera omu kwikiriza, kandi nibabagambira itwena nkooku tuli b'okuhikwaho obulemeezi bwingi tutakataahire omu bukama bwa Ruhanga.

²³Obu baamazire kukomera buli kitebe ky'abaikiriza abakuru b'okubarolerra, nibasaba kandi nibasiiba, boona baabakwasa MUKAMA ou baikiriize.

²⁴Nubwo Paulo na Baranaba baayongiire orugendo nibaraba Pisidiya, baahika Panfiliya.

²⁵Obu baamazire kurangirra ekigambo kya Ruhanga omu Perige, baayongera baagenda Ataliya.

²⁶Obu baarugire oku, baagwerra omu meeri, baahika Antyokiya nambere baabandiize kuheebwa obukonyezi bwa Ruhanga habw'omulimo ogu bahikiriize.

²⁷Obu baahikire Antyokiya, baasorooza ekitebe ky'abaikiriza, baabasoborra byona Ruhanga ebi yabakoleze, kandi nkooku yakinguliireho Abanyamahanga omuhanda gw'okwikiriza.

²⁸Bbo baikara n'abeegesebwa baayo okumara ebiro bingi.