Read Runyoro - rutooro Ebik 15 Bible Online

Ebik 15 - Runyoro - rutooro bible

Ebik 15

¹Omu kasumi ako hakaijaho abantu abamu abaarugire Buyudaaya, baayegesa abaikiriza bati: “Kakuba mutasarwa, Ekiragiro kya Musa nkooku kirukuragira, timusobora kujunwa.”

²Paulo na Baranaba bakabanza kuteera muno empaka n'abantu abo, okuhika bbo hamu n'abandi obu baakomerwe kugenda Yerusaalemu kuhanuura ekigambo eki hamu n'abakwenda n'abakuru abandi.

³Ekitebe kyona ky'abaikiriza kyabaraga. Kandi obu bakaba nibaraba Foinike na Samaliya, baagambira abaikiriza baayo Abanyamahanga nkooku baahindukire. Amakuru ago gakakyanganura muno ab'oruganda boona.

⁴Obu baahikire Yerusaalemu, baatangirirwa ab'ekitebe ky'abaikiriza, hamu n'abakwenda n'abakuru abandi, baabamanyisa byona Ruhanga ebi yabakoleze.

⁵Baitu abamu ab'omu kitebe ky'Abafalisaayo abakaba baikiriize, baatandika kuhakana nibagamba bati: “Abanyamahanga basemeriire kusarwa n'okwegesibwa kukuratira Ebiragiro bya Musa.”

⁶Abakwenda n'abakuru bakeesorooza hamu kwetegereza ekigambo eki.

⁷Obu baamazire omwanya mukooto nibahanuura, Petero yaimuka, yabagambira ati: “Bagenzi bange, nimumanya kurungi nkooku omu biro bya ira, nyowe kalimi kagamba, Ruhanga yankomere omuli inywe nukwo ndangirre Abanyamahanga enyegesa y'Amakuru Amarungi, bagihurre kandi baikirize.

⁸Ruhanga, arukumanya emitima y'abantu, akabagumya, yabaha Mwoyo Ahikiriire nkooku yamutuhaire ira;

⁹kandi atatwahukanizeemu nabo, baitu akeeza emitima yabu habw'okwikiriza oku bainakwo.

¹⁰Hati Ruhanga nimumwoheza ki nimuta ekikoligo omu bikya by'abeegesebwa, ekikoligo baisenkuru itwe eki batarasoboire kuhimba noobwakuba itwe?

¹¹Baitu hati nitwesiga nkooku tulijunwa habw'embabazi za MUKAMA Yesu nk'abo oku balijunwa embabazi ze.”

¹²Orukurato rwona rwaikara niruculeera, baahuliriza Baranaba na Paulo nibabasoborra ebihuniriza n'ebyamahano Ruhanga ebi yabakoleze omu Banyamahanga.

¹³Bbo obu baamazire kusoborra ebyabo, Yakobbo yatandika kubaza ati: “Bagenzi bange, mumpulirize.

¹⁴Simyoni arugire kutusoborra Ruhanga nkooku yabandize kuta omutima ha Banyamahanga n'okukoma abamu omuli bo abafoole bantu be.

¹⁵Kandi eki nikiikirraniza n'ekyahandiikirwe abarangi kiti:

¹⁶‘Ebiro ebi obu birihwa, ndigaruka nyombeke buhyaka enju ya Daudi eyagwire; nyombeke buhyaka ebikambuuro byayo, ngyemereze,

¹⁷nubwo abantu abandi, hamu n'Abanyamahanga boona abarukwetwa habw'ibara lyange baligaruka kuserra MUKAMA.

¹⁸MUKAMA ayatumanyisize ebintu ebi kuruga ira lyona, nukwo arukugamba ati.’

¹⁹Nahabweki eki ncwiremu nikyo kinu: Itwe titusemeriire kutalibaniza abarukuruga omu Banyamahanga nibahindukira Ruhanga,

²⁰baitu kitusemeriire kubahandiikira nitubahabura beetantale ekintu kyona ekihongirwe abacwezi, beetantale obusiihani n'okulya ebisoro ebimyoirwe rundi enyama enyakurumu esagama.

²¹Okuruga ira na ira omu buli rubuga habaho abantu abarukwegesa Ebyahandiikirwe Musa, habwokuba bisomwa buli Sabbato mu masorrokaniro gaabu.”

²²Nubwo abakwenda hamu n'abantu bakuru baacwiremu kukoma abamu omuli bo ab'okutuma Antyokiya bagende na Paulo na Baranaba. Ekitebe kyona ky'abaikiriza kyakisiima. Baakoma Yuda arukwetwa Barsaba na Siraasi. Nubo bantu abali beebembezi omu bagenzi baabo.

²³Baabakwasa ebbaruha erukugamba eti: “Bagenzi baitu, itwe abakwenda hamu n'abantu abakuru, tubahandiikire inywe ab'oruganda, Abanyamahanga abali Antyokiya na Siriya na Kilikiya, nitubaramukya.

²⁴Obu twahuliire nkooku haroho abamu abaarugire omuli itwe hanu abaabatalibaniize n'ebigambo byabo, baatabangura emitima yanyu, kandi kunu tutabaragiire,

²⁵tukeesorooza, twacwamu kukoma abasaija n'okubabatumira, hamu n'abagonzibwa Baranaba na Paulo,

²⁶abasaija abaayefubiire habwa MUKAMA waitu Yesu Kristo.

²⁷Nahabweki twabatumira Yuda na Siraasi. Bbo bonka baraabasoborra nibagumya ebi tuhandiikire omu bbaruha egi.

²⁸Kwali kucwamu kwa Mwoyo Ahikiriire na itwe kutabatweka omutumba mukooto kukira binu byonka ebirukwetaagwa:

²⁹musemeriire kwetantara ebihongiirwe abacwezi, n'enyama enyakurumu esagama rundi enyama y'ebisoro ebimyoirwe, hamu n'obusiihani. Obu muraayerindaga ebi, muliba mukozire kurungi. Mugoroobe.”

³⁰Abaatumirwe obu baamazire kuraga abantu ba Yerusaalemu, baimukya orugendo baagenda Antyokiya. Obu baahikireyo, baatandika kweta ab'ekitebe, baabakwasa ebbaruha.

³¹Kandi bbo, obu baagisomere, baasemererwa muno habw'ebigambo ebirukuhuumuza ebi baagisangiremu.

³²Yuda na Siraasi abakaba bali barangi, bakeekambisa ab'oruganda boona babagambira ebigambo bingi eby'okubagumya.

³³Obu bakaba baamazireyo ebiro, ab'oruganda baabaraga n'obusinge, baagarukayo Yerusaalemu hali abo abaabatumire. [

³⁴Baitu Siraasi akagonza asigaleyo.]

³⁵Paulo na Baranaba bakaikara Antyokiya hamu n'abaikiriza abandi baingi, nibeegesa kandi nibarangirra abantu ekigambo kya MUKAMA.

³⁶Obu haahingwireho ebiro, Paulo akagambira Baranaba ati: “Ija tugarukeyo, tusuule bagenzi baitu ab'omu mbuga zoona nambere twarangiriire ekigambo kya MUKAMA, turole nkooku bali.”

³⁷Baranaba akaba naayenda kutwara Yohaana arukwetwa Mariko;

³⁸baitu Paulo tiyagonza kugenda n'omuntu ayabaahukaineho Panfiliya, atarasoboire kumaliriza nabo omulimo.

³⁹Hakabaho empaka nyingi. Ekyarugiremu bayaahukana: Baranaba yatwara Mariko, baagwerra omu meeri, baagenda Kipuro,

⁴⁰baitu Paulo yakoma Siraasi, yagenda nawe. Ab'oruganda boona bamugondeza emigisa ya MUKAMA.

⁴¹Paulo yaraba Siriya na Kilikiya naagumya ebitebe by'abaikiriza.