Read Runyoro - rutooro Ebik 16 Bible Online

Ebik 16 - Runyoro - rutooro bible

Ebik 16

¹Paulo obu yarugire Kilikiya, yahika Derube na Lisitura. Oku hakaba haliyo omwegesebwa omu, ibara lye Timoteo, mutabani w'omukazi Omuyudaaya ow'akaba aikiriize ira; baitu ise akaba ali Mugiriiki.

²Ab'oruganda ba Lisitura na Ikoniyo baasiimaga muno Timoteho.

³Paulo akagonza Timoteho kugenda nawe; nahabweki yamusara. Eki akakikora habwokuba Abayudaaya abakaba bali omu biikaro ebi, baamanyaga ise Timoteho nkooku ali Mugiriiki.

⁴Obu bakaba nibaraba omu mbuga ezi, baasoborraga abantu ebiragiro ebyatairweho abakwenda n'abakuru abakaba bali Yerusaalemu, baabateererra kwikara nibabihikiriza.

⁵Eki kyaleetera ebitebe by'abaikiriza kwongera kugumira omu kwikiriza, kandi abantu abaikiriize kyabaleetera kukanya buli kiro.

⁶Bakaraba omu nsi ya Firigiya na Galatiya, Mwoyo Ahikiriire amazire kubatanga kurangirra ekigambo omu Asiya.

⁷Obu baahikire ha mutaano gwa Misiya, baayenda kweyongera kuhika Bitiniya, baitu Mwoyo wa Yesu tiyabaikiriza;

⁸nukwo kuraba Misiya, baahika Troa.

⁹Ekiro eki Paulo yabonekerwa, yarora omusaija owa Makedoni ayemeriire aho naamwesengereza ati: “Yambuka enyanja, oije Makedoni, otukonyere.”

¹⁰Obu yarugire kubonekerwa, ahonaaho twayeteekaniza kwambuka kugenda Makedoni, nitugumiza kimu Ruhanga nkooku atwesire okubarangirra Amakuru Amarungi.

¹¹Okuruga Troa twagwerra omu meeri, twayambuka, twahika Samoterake; kandi ha kiro ekyakurasireho twahika Neapoli.

¹²Obu twarugayo, twahika Filipi, orubuga orukuru rwa Makedoni, orukaba rutembwirwe Abarooma. Omu rubuga oru tukamaramu ebiro bike;

¹³ha kiro kya Sabbato twaruga omu rubuga nituraba omu irembo lyarwo, twahika ha rubaju rw'ekisaaru nambere twanihiire kusanga abarukusaba. Twaikarra hansi, twabaliza abakazi abakaba beesoroizeho.

¹⁴Omuli abo abaatuhuliire hakaba harumu omu arukwetwa Lidiya, omukazi ayarugire omu rubuga rwa Tyatiiro, omusuubuzi w'engoye eza kahuukya, kandi omuntu ayayekambaga kuramya Ruhanga. Obu yahuliire Paulo ebi yayegeseze, MUKAMA yakingura omutima gwe, abiikirize.

¹⁵Uwe n'ab'omu ka ye boona obu baamazire kubatizibwa, nubwo yatwesengeriize naagamba ati: “Obu muraaba munanukire nkooku ndukwikiriza kwo MUKAMA, mwije muraale owange.” Yatuhambiriza.

¹⁶Ekiro kimu obu tukaba nitugenda omu kiikaro ky'okusabiramu, twatangaana omuzaana ow'akaba atemberwe omwoyo ogw'okuragura, kandi ayatungisaaga muno bakama be omu kuragura.

¹⁷Omuzaana ogu yatandika kuhondera Paulo hamu na itwe, naayamuza ati: “Abasaija banu, baheereza ba Ruhanga anyakuli haiguru muno, baizire kubarangirra nkooku muraajunwa.”

¹⁸Akaikara naakora ati buli kiro okuhika Paulo obu yabiihiirwe, yahinduka yacoomera omwoyo ogu ati: “Ninkuragira omu ibara lya Yesu Kristo, murugeho.” Gwamurugaho omu kasumi ako konyini.

¹⁹Bakama be obu baarozire nkooku hatakyaroho okunihira kwona okw'okumutungamu amagoba, baakwata Paulo na Siraasi, baabacunda, baabatwara booma omumaiso g'abalemi.

²⁰Obu baabahikize hali abacwi b'emisango, baagamba bati: “Abasaija banu Bayudaaya, nibatalibaniza muno orubuga rwaitu,

²¹nibeegesa engeso ezitarukwikirizibwa ebiragiro byaitu, itwe Abarooma.”

²²Ekitebe ky'abantu nakyo kyayetaba n'abakama b'omwisiki omu kubaimukirra, nukwo abacwi b'emisango kuragira babajuule n'amaani kandi babateere emiigo.

²³Obu baamazire kubateera emiigo nyingi, baabata omu nkomo, baaragira mukuru waayo kubalinda obutengyambone.

²⁴Obu yamazire kuragirwa ati, yabata omu kisiika ekya ha kaifo, kandi amaguru gaabo yagata mu nkomo z'ebiti.

²⁵Ekiro eki omu itumbi, Paulo na Siraasi bakaba nibasaba kandi nibazina eby'okukugiza Ruhanga, n'abanyankomo abandi bakaba nibabahuliriza.

²⁶Omu kasumi ako haabaho omusisa gw'amaani, emisingi y'enkomo yatengesebwa, enyigi zoona zaakinguka, kandi empingo ezikaba zibabohere zaasumurruka.

²⁷Omukuru w'enkomo obu yajumbutukire omu turo, yasanga enyigi zikingukire, nukwo kusomora empirima ye naayeteekaniza okweyita, naagira ngu, abanyankomo bacwire.

²⁸Baitu Paulo yamweta n'iraka likooto ati: “Oteekora akabi, habwokuba itwena turoho.”

²⁹Omukuru w'enkomo yatuma bamuleetere etaara, yataaha omu nkomo, yagwa omumaiso ga Paulo na Siraasi naatukumira.

³⁰Yabaturukya aheeru, naagamba ati: “Bakama bange, nyowe nkole ki okujunwa?”

³¹Baamugarukamu bati: “Ikiriza MUKAMA Yesu, nubwo oraajunwa, iwe n'eka yaawe.”

³²Uwe hamu na boona abakaba bali omuka ye, Paulo na Siraasi baatandika kubeegesa ekigambo kya MUKAMA.

³³Ha saha egi yonyini yabatwara kuboogya ebihuta byabo; nubwo yabatiziibwe hamu n'ab'omuka ye boona.

³⁴Kandi obu yabahikize owe, yabaha ebyokulya. Omukuru w'enkomo n'ab'omu ka ye boona baasemererwa muno habw'okwikiriza Ruhanga.

³⁵Obwire obu bwakiire, abacwi b'emisango baaragira abakuru b'abalinzi nibagamba bati: “Abasaija abo balekere, bagende.”

³⁶Omukuru w'enkomo nukwo kubigambira Paulo ati: “Abacwi b'emisango bantumireho, nibandagira kubalekera; hati muturuke, mugende n'obusinge.”

³⁷Baitu Paulo yamugarukamu ati: “Mara itwe enzaarwa za Rooma batutiire abantu boona nibarora, kandi kunu tutacweriirwe musango gwona, baatuta n'omu nkomo. Obu si nibenda kutwihamu omu nsereko? Nangwa! Bbo bonka leka baije batwihemu.”

³⁸Abalinzi b'enkomo, ebigambo ebi baabigambira abacwi b'emisango. Nabo obu baahuliire banu nkooku bali nzaarwa za Rooma, baatandika kutiina;

³⁹baija babetondera. Babaiha omu nkomo kandi babeesengereza baruge omu rubuga rwabo.

⁴⁰Paulo na Siraasi nukwo kuruga omu nkomo, baagenda mba Lidiya nambere baasangire ab'oruganda. Obu baamazire kubahuumuza, baarugayo, baagenda.