Read Runyoro - rutooro Ebik 17 Bible Online

Ebik 17 - Runyoro - rutooro bible

Ebik 17

¹Paulo na Siraasi obu baamazire kuraba Anfiipoli na Apolooniya, baahika Teesalonika nambere Abayudaaya bakaba baina isorrokaniro.

²Paulo yataahamu, yatandika kubaza nabo, engeso ye nkooku ekaba eri. Yamara wiiki isatu naabahakaniza naajurra Ebihandiiko ebirukwera,

³naasoborra kandi naagumya Kristo nkooku akaba ali w'okubonabonesibwa n'okuhumbuuka omu bafu, naagamba ati: “Yesu onu ou ndukubarangirra, nuwe Kristo.”

⁴Abamu omuli bo baasikirizibwa ebi baahuliire, baayeteeraniza na Paulo na Siraasi. Kandi n'Abagiriiki baingi abaatiinaga Ruhanga bakeeteraniza nabo, hamu n'abakazi ab'ekitiinisa baingi.

⁵Baitu Abayudaaya baakwatwa ihali, nukwo kusorooza abasaija ababi abaikaraga nibenjeera, baimukiiriza ekitebe kikooto ky'abantu, baacwa epuumpu omu rubuga. Baataaha enju ya Yasooni, nibanihira kuturukya Paulo na Siraasi babahikye nambere abantu baayesoroliize.

⁶Obu baababuzire, baacunda Yasooni n'abamu ha bagenzi baitu, baabahikya omumaiso g'abalemi b'orubuga nibatoka bati: “Abasaija bali abaajumikire ensi, baizire na hanu.

⁷Yasooni nuwe abaraize; kandi banu boona nibakora ebintu ebirukuhakaniza ebiragiro bya Kaisaali, nibagira ngu, haroho omukama ondi arukwetwa Yesu.”

⁸Abanyarubuga n'abalemi barwo obu baabihuliire, baatandika kutuntura.

⁹Yasooni na bagenzi be bakabanza kubaihaho omusimbo batakabalekiire.

¹⁰Ekiro eki kyonyini ab'oruganda baacwisa Paulo na Siraasi, baakwata ogwa Beroya. Obu baahikireyo, baataaha omu isorrokaniro ly'Abayudaaya.

¹¹Abayudaaya baayo bakaba batali bantu abagumangana nk'aba Teesalonika. Bbo bakarahuka kwikiriza ekigambo kya Ruhanga n'omutima gumu, nibasoma buli kiro Ebihandiiko Ebirukwera, barole ebigambo binu obu biraaba biri by'amazima.

¹²Nahabweki Abayudaaya baingi omuli bo bakaikiriza, hamu n'abakazi Abagiriiki baingi, abantu b'ekitiinisa, oteho n'abasaija.

¹³Baitu Abayudaaya ba Teesalonika obu baahuliire Paulo nkooku arangiriire ekigambo kya Ruhanga omu Beroya, nukwo kwijayo, baatamu abantu epuumpu, baabaimukiriza.

¹⁴Ahonaaho ab'oruganda baacwisa Paulo, atwarwe ogw'enyanja; baitu Siraasi na Timoteho baasigarayo.

¹⁵Abo abaasendekeriize Paulo, bakamuhikya Ateena. Obu yamazire kubaha obukwenda obw'okugambira Siraasi na Timoteho barahuke bamusangeyo, bbo baakwata omuhanda, baagarukayo.

¹⁶Paulo obu akaba akyabategeriize Ateena, omutima gwamusarra muno habw'okurora orubuga oru rwijwire ebisisani by'abacwezi barwo.

¹⁷Buli kiro omu isorrokaniro yahakanizaaga Abayudaaya n'abanyamahanga abaatiinaga Ruhanga hamu na'bantu abandi aba yasangaga omu katale.

¹⁸Kandi abanyamagezi abamu ab'ekitebe ky'Omugiriiki Epikuliyo n'ab'ekitebe ekindi ky'entabiganya nabo baamuhakaniza. Abamu baakaguza bati: “Hati enjaaliimi egi neegamba ki?” Abandi baagarukamu bati: “Nasisana arukwegesa baruhanga aba tutamanyire” habwokuba akaba naayegesa hali Yesu na ha kuhumbuuka.

¹⁹Nukwo kumweta agende nabo, baamuhikya omu rukurato orurukwetwa Arehopago, baatandika kumukaguza bati: “Enyegesa enu empyaka, torukwija kutusoborra amakuru gaayo?

²⁰Habwokuba ebimu ebi otugambiire bituhuniriize. Nahabweki nitwenda kumanya amakuru gaabyo.”

²¹Abantu boona b'Ateena n'abanyamahanga abakaba baliyo, bakaba bataina kindi eki baakoraga kwihaho kubaza n'okuhurra ebintu byona ebihyaka.

²²Paulo yayemerra omumaiso g'orukurato orwa Arehopago yatandika okubasoborra ati: “Inywe abasaija ba Ateena, mmazire kwetegereza nkooku muli bantu abarukutaho muno omutima ha diini mu buli kintu.

²³Habwokuba nambere nkarabire hoona, nsangire ebintu ebi murukuramya, kandi naasanga itambiro erimu erihandiikirweho liti: ‘Itambiro lya ruhanga atarukumanywa.’ Ningira ogu ou murukuramya mutamanyire, nuwe Ruhanga, nyowe ou ndukubarangirra.

²⁴“Ruhanga ayahangire ensi na byona ebirumu nkooku ali MUKAMA w'iguru n'ensi, taikara mu maramizo agombekerwe abantu,

²⁵kandi takonyerwa bantu nk'anyakwina eki abuzirwe, habwokuba nuwe wenka aha boona obwomeezi, n'okwikya orwoya, na buli kintu kyona.

²⁶Akahanga enganda zoona eza bantu, nabaiha omu muntu omu, yabaha ensi yoona bagiikalemu, amazire kutaho obusumi bw'emyaka baraamara, yataho n'emitaano nambere enganda ziraagarukiraga,

²⁷nukwo abantu baserre Ruhanga nibamanya nkooku basobora kumuzorra mu kuhamanga. Mazimakwo buli omu omuli itwe tamuli hara,

²⁸habwokuba kikahandiikwa kiti: ‘Omuli Uwe nuho tutunga obwomeezi, nuwe tugenderamu kandi nuwe atuha kubaho.’ Kandi abaisenkuru inywe abaabacweriire enfumo bakagamba bati: ‘Na itwe tuli baana be mali.’

²⁹Itwe nkooku tuli baana ba Ruhanga, tuleke kugira ngu, Ruhanga nasisana ekisisani ekyakozirwe amagezi g'abantu ekyaihirwe omu zaabbu, rundi efeeza, rundi amabaale agaasarwirwe.

³⁰Ebiro ebi mwamazire omu butamanya, Ruhanga atabiteho mutima; baitu hati naaragira abantu boona, hoona nambere bali, beegarukemu,

³¹habwokuba akataho ekiro nambere ensi yoona ericwerwaho omusango omu mazima, nigucwibwa omuntu ou yataireho, kandi eki akakyoleka abantu boona obu yamuhumbwire omu bafu.”

³²Obu baahuliire ha by'okuhumbuuka kw'abafu, abamu baayesekera; baitu abandi baagamba bati: “Ekigambo eki nitwenda kukihurra kiro kindi.”

³³Nubwo Paulo yabarugiremu.

³⁴Baitu habaho abasaija abamu abaamugumiireho baafooka abaikiriza. Omuli bo hakaba harumu Diyonisiyo, omukurasi ow'orukurato orwa Arehopago n'omukazi arukwetwa Damali, hamu n'abantu abandi.