Read Runyoro - rutooro Ebik 18 Bible Online

Ebik 18 - Runyoro - rutooro bible

Ebik 18

¹Ebi obu byahoire, Paulo yaruga Ateena yagenda Korinto.

²Nuho yaitiraine Omuyudaaya arukwetwa Akwila, enzaarwa ya Ponto. Uwe na mukazi we Purisila nubwo bakaba bakyarugire Itale habwokuba Omukama omukuru Kilahudiyo akaba aragiire Abayudaaya boona baruge Rooma. Paulo yagenda kubabungira,

³kandi obu yarozire bali bakozi b'amaheema, omulimo ogurukusisa nk'ogu yakozire, yatandika kwikara nabo, nibakora hamu.

⁴Buli Sabbato yayegesaaga omu isorrokaniro lyayo kandi yalengahoga kusoonasoona Abayudaaya n'Abagiriiki.

⁵Siraasi na Timoteho obu baamazire kwija, nibaruga Makedoni, Paulo yayeheriireyo kimu ha mulimo ogw'okutebeza n'okusoborra Abayudaaya nkooku Yesu ali Kristo.

⁶Obu baatandikire kumuhakaniza n'okumujuma, yakunkumura ekijwaro kye, naagamba ati: “Esagama yanyu ebe hali inywe. Nyowe tinyina musango. Okuruga hati ninyija kugenda omu Banyamahanga.”

⁷Yaruga omu isorrokaniro lya Korinto, yagenda kwikara omunju y'omusaija arukwetwa Tito Yusto, omuntu ayatiinaga Ruhanga. Enju ye ekaba eri haihi n'isorrokaniro.

⁸Kirisipo, omukuru w'isorrokaniro, hamu n'ab'omuka ye boona baikiriza MUKAMA. Abakorinto abandi baingi abaahuliire enyegesa za Paulo baikiriza kandi baabatizibwa.

⁹Kiro kimu omu itumbi MUKAMA akabonekera Paulo yamugambira ati: “Otatiina, yegesa kandi otaculeera;

¹⁰ndi hamu na iwe, kandi tiharoho muntu araakukora kubi habwokuba omu rubuga runu nyinamu abantu bange baingi.”

¹¹Paulo akamarayo omwaka gumu n'ameezi mukaaga, naabeegesa ekigambo kya Ruhanga.

¹²Galiyo obu akaba ali mulemi mukuru wa Akaaya, Abayudaaya bakaikirraniza okukwata Paulo, baamutwara omu kooti,

¹³nibagamba bati: “Omusaija onu naayohya abantu, baramye Ruhanga omu mulingo ogutarukwikirizibwa Ebiragiro bya Musa.”

¹⁴Kandi Paulo obu akaba atakagarukiremu, nubwo Galiyo yagambiire Abayudaaya ati: “Inywe Abayudaaya, kakuba omuntu onu abaire aina eki asobeze, rundi acwire ekiragiro kikuru, naakubagumiisiriize mbahurra;

¹⁵baitu empaka zanyu obu ziraaba ziri ha bigambo, rundi ha mabara, rundi ha biragiro byanyu, mubyemarre inywenka. Nyowe tindukwenda kucwa misango ey'ebintu nk'ebi.”

¹⁶Yababinga omu kooti.

¹⁷Aho boona baahinduka baagwera Soositene, mukuru w'isorrokaniro, baamuterra omu kooti. Baitu Galiyo ebi byona atabifeeho.

¹⁸Ebi obu byahoire, Paulo yayongera kumarayo ebiro bingi, nubwo yaragire ab'oruganda, yagwerra omu meeri, yayambuka yagenda Siriya, aina Purisila na Akwila. Obu bakaba bali Kenkereya, Paulo yayemwa isoke nkooku akaba aragaine.

¹⁹Kandi obu baahikire Efeeso, yabasigaho. Yataaha omu isorrokaniro wenka, yatandika kuhakana n'Abayudaaya.

²⁰Abaikiriza obu baamusabire ayongere kwikara nabo ebiro bindi, yayanga;

²¹baitu yabaraga naagamba ati: “Ruhanga obu aliba agondeze, ndigaruka.” Yagwerra omu meeri, yaruga Efeeso.

²²Obu yasaabukire ahikire Kaisaariya, yagenda kuramukyaho ekitebe ky'abaikiriza, hanyuma yagenda Antyokiya.

²³Obu yamazireyo ebiro bike, yarugayo, yagenda naaraba omunsi yoona ya Galatiya na Firigiya, naagumya abaikiriza boona.

²⁴Omu biro ebi, Efeeso hakaijayo Omuyudaaya, ibara lye Apolo, enzaarwa ya Alekizanderiya. Apolo ogu akaba ali muntu arukubaza kurungi kandi anyakumanyire muno Ebihandiiko ebirukwera.

²⁵Omusaija ogu akaba ayegesiibwe Omuhanda gwa MUKAMA; yarangirra n'omuhimbo ebigambo ebirukukwata hali Yesu kandi yabyegesa kurungi, noobu araaba akaba naamanya okubatiza kwa Yohaana kwonka.

²⁶Yatandika kwegesa n'obumanzi omu isorrokaniro ly'Abayudaaya; baitu Purisila na Akwila obu baamuhuliire, baamutwara owaabu, baayongera kumwegesa kurungi Omuhanda gwa Ruhanga.

²⁷Apolo obu yagondeze kwambuka kugenda Akaaya, ab'oruganda baamusagika, baahandiikira abaikiriza baayo nibabasaba kumutangirra. Obu yahikireyo, yakonyerwa amaani ga Ruhanga kugumya abo abakaba baikiriize,

²⁸habwokuba yahakanizaaga muno Abayudaaya burole, naaboolekera omu Bihandiiko ebirukwera Yesu nkooku ali Kristo.