Read Runyoro - rutooro Ebik 19 Bible Online

Ebik 19 - Runyoro - rutooro bible

Ebik 19

¹Apolo obu akaba akyali Korinto, Paulo akakwata omuhanda ogw'obwerre, yahika Efeeso nambere yasangire abaikiriza abamu.

²Yabakaguza ati; “Mukaheebwa Mwoyo Ahikiriire obu mwaikiriize?” Baamugarukamu bati: “Nangwa, n'okuhurra titukahurrahoga nkooku haroho Mwoyo Ahikiriire.”

³Yayongera yabakaguza ati: “Mukabatizibwa muta?” Baamugarukamu bati: “Tukabatizibwa omu kubatiza okwa Yohaana.”

⁴Nandiki Paulo ati: “Yohaana akabatiza n'okubatiza kw'okwegarukamu, naateererra abantu kwikiriza ogu ow'akaba ali ow'okumwija enyuma, nuwe Yesu.”

⁵Obu baahuliire eki, baabatizibwa omu ibara lya MUKAMA Yesu,

⁶kandi Paulo obu yamazire kubataho emikono, Mwoyo Ahikiriire yabaijaho, baatandika kubaza endimi n'okuranga ebya Ruhanga.

⁷Abo boona bakaba bali nka ikumi na babiri.

⁸Paulo akataaha omu isorrokaniro ly'Abayudaaya, yabalizamu n'obumanzi kandi yahakaniramu n'amagezi okubaikirizisa eby'obukama bwa Ruhanga. Yamara ameezi asatu naakora ati,

⁹okuhika abamu obu bakadadaire, bayanga kwikiriza, nibajuma Omuhanda gwa MUKAMA omumaiso ga boona. Nubwo Paulo yabarugireho, yatwara abaikiriize, kandi buli kiro baikaraga nibahanurra omu kisiika ky'okubalizaamu eky'omusaija arukwetwa Tiraano.

¹⁰Paulo yaikara naakora ati kumara emyaka ebiri. Ekyarugiremu nukwo abantu boona abaikaraga Asiya: Abayudaaya n'Abagiriiki, kuhurra ekigambo kya Mukama.

¹¹Emikono ya Paulo, Ruhanga akagikozesa ebyamahano ebitakabonwaga.

¹²Abantu bakaba nibatwara ebitambara n'engoye ebi yakwasireho babikwasaho abarwaire, bakira endwara zaabo, n'emyoyo emibi yabarugaho.

¹³Abayudaaya abamu, enjeezijeezi, abaagendaga nibabinga emyoyo emibi, nubwo baalengereho kugibinga hali abo abakaba bainayo, nibaatura ibara lya MUKAMA Yesu, nibagamba bati: “Ninkuragirra omuli Yesu, Paulo ou arangirra.”

¹⁴Omuli abo abaakikozire hakaba harumu abasigazi musanju, batabani b'Omuyudaaya Sikewa, nyakatagara mukuru.

¹⁵Baitu omwoyo omubi gwabagarukamu guti: “Yesu mmumanyire, na Paulo mmumanyire; baitu inywe, niinywe baha?”

¹⁶Omusaija ow'akaba aroho omwoyo omubi yabagurukira, yabakiza amaani, yabasingura. Baaruga omunju egi bali busa kandi bahutaire muno.

¹⁷Abantu boona abaikaraga Efeeso, Abayudaaya n'Abagiriiki, obu baakihuliire baatiina muno kandi baanyumiza MUKAMA Yesu.

¹⁸Baingi omuli abo abaikiriize, bakaija baayegarukamu nibaatura ebibi ebi baakozire.

¹⁹Kandi baingi omuli abo abakaba nibakora eby'obufumu, bakasorooza hamu ebitabu byabo, baabyokeza omumaiso g'abantu. Obu babaliriire omuhendo gw'ebitabu ebi, baasanga niguhika ebicweka by'efeeza emitwaro etaano.

²⁰Ekigambo kya MUKAMA kyayeyongera kuraranga muno kandi kyasingurra kimu.

²¹Ebi byona obu byahoire, Paulo yacwamu kugaruka Yerusaalemu, naaraba Makedoni na Akaaya naagira ati: “Obu ndikamara kuhikayo, ninyija kugenda na Rooma.”

²²Nukwo yatuma ati babiri ha bakonyezi be, Timoteho na Erasito, bamwebembere kuhika Makedoni, uwe akyasigaire Asiya kumara ebiro bike.

²³Omu kasumi ako, hakaba haroho okwimukirra kwingi habw'Omuhanda gwa MUKAMA.

²⁴Habwokuba omusaija arukwetwa Demetiriyo, omuheesi w'eby'efeeza, ayaheesaga ebisisani by'ekirorro ky'embandwa enkazi Atemisi, yahaga abaheesi baingi omulimo.

²⁵Abo boona akabasorooza, hamu n'abandi abaakoraga omulimo ogu, yabagambira ati: “Basaija inywe, mumanyire omulimo gunu nkooku nugwo gubaire nigututungisa.

²⁶Hati mumazire kurora n'okuhurra, tihali Efeeso honka, baitu kutagirwa n'omu Asiya yoona, omusaija ogu Paulo nkooku asoonasoonere abantu baingi yabahindura, naagamba ngu, baruhanga abakozirwe engaro tibali baruhanga naakake.

²⁷Hati nu akabi kaija, tiharukwija kugaywa mulimo gwaitu gwonka, baitu n'ekirorro ky'embandwa enkuru Atemisi nikiija kudiba; kandi omucwezikati ogu arukuramibwa ab'omu Asiya n'ahandi hoona omunsi, naija kwihwaho ekitiinisa kye.”

²⁸Obu baahuliire eki, baakwatwa ekiniga kingi, baatandika kutoka muno nibagamba bati: “Atemisi ow'Abeefeso nuwe ruranganwa!”

²⁹Orubuga rwona rwaijwamu akambayaya, abantu bajumbutukira hamu, baagenda omu kizaaniro ky'orubuga nibacunda Abamakedoni babiri Gaayo na Arisitariko, abasaija abaagendaga na Paulo omu ngendo ze.

³⁰Paulo nawe yagonza kugenda omu kitebe eki eky'abantu babataisule, baitu abaikiriza baamutanga;

³¹kandi abamu ha banyoro abakuru aba Asiya, abakaba bali banywani be, baamutumaho, nibamwesengereza aleke kugenda omu kizaaniro eki akeenaga omu kabi.

³²Omu kasumi ako buli omu akaba naatoka okwe; habwokuba bakaba batabatabukire, kandi abarukukira obwingi omuli bo batamanye eki bayesorooliize.

³³Abayudaaya baacumiriza Alekizanda omumaiso ga boona. Abamu ab'omu kitebe nukwo kuteekereza ngu, nuwe arukujunaanwa. Alekizanda yabaculeeza n'omukono gwe, nukwo ayetonganirre.

³⁴Baitu obu baayetegeriize nkooku ali Muyudaaya, boona baatokera hamu nibagamba bati: “Atemisi ow'Abeefeso nuwe ruranganwa!” Baakora bati okumara esaaha ibiri.

³⁵Omukuru w'orubuga obu yamazire kuculeeza abantu yabagambira ati: “Inywe abasaija ba Efeeso, nooha atamanyire orubuga rwa Efeeso nkooku nurwo rulinda iramizo lya Atemisi ruranganwa, rulinda n'ekisisani kye ekyarugire omu iguru?

³⁶Hati nu, nkooku hataroho muntu asobora kubihakaniza, nimusemerra kuculeera, mutakora kantu na kamu nimurahukiriza.

³⁷Habwokuba abasaija banu aba muleesire hanu, tibasiisire eby'omu birorro byanyu kandi tibajumire mucwezikati waitu.

³⁸Demetiriyo n'abaheesi bagenzi be obu baraaba baina eki barukunyegererra omuntu weena, ekooti ez'okucweramu emisango iroho, n'abalemi baroho; nuho bagende banyegerrangane.

³⁹Baitu obu muraaba mwina ekindi eki murukwenda, kiraacwerwa omu rukurato rwaitu orwa butoosa.

⁴⁰Habwokuba na itwe tuli omu kabi k'okunyegererwa habw'okuleeta akajagarro ak'ekiro kinu, kandi tiharoho bulyo bwona obu tusobora kutongana obw'okunanura ekireesire akajagarro kanu.”

⁴¹Obu yamazire kugamba eki, yaraga ekitebe.