Read Runyoro - rutooro Ebik 2 Bible Online

Ebik 2 - Runyoro - rutooro bible

Ebik 2

¹Ekiro kya Pentikooti obu kyahikire, boona bakaba beesoroliize omu kiikaro kimu.

²Ahonaaho okuhirra kukaruga omu iguru, kwaija nk'ekiyaga ky'amaani, kwaijuliza kimu enju nambere bakaba baikaliire.

³Haazooka endimi nk'ez'omurro, zayebaganiizemu, nizaakira ha mutwe gwa buli omu omuli bo.

⁴Boona baijura Mwoyo Ahikiriire, baatandika kubaza endimi ezindi, nkooku Mwoyo yabahaire kuzibaza.

⁵Kasumi ako, omu Yerusaalemu, hakaba harumu Abayudaaya, abantu abeekambiire ediini, abakaba barugire omu mahanga goona agali omu nsi.

⁶Ekitebe ky'abantu obu kyahuliire okuhirra oku, baayesorooleza hamu nibatangaara, habwokuba buli muntu akahurra abakwenda nibabaza omu rulimi rw'owaabu.

⁷Boona baahunirra kandi baatangaara, nibeekaguza bati; “Banu boona abarukubaza tibali Bagaliraaya?

⁸Hati kinu kiri kita, buli omu omuli itwe kubahurra nibabaza orulimi rw'owaitu nambere twazaalirwe?

⁹Omuli itwe haroho Abapaati, Abameedi n'Abeeramiiti, hamu n'abantu abaikara Mesopotamiya, Buyudaaya na Kapadokiya, Ponto na Asiya,

¹⁰Firigiya na Panfiliya, Misiri n'ebicweka bya Libbiya haihi na Kirene. Otaireho n'abagenyi abaarugire Rooma, nubo Abayudaaya n'abandi abahindukire bataaha omu diini y'Ekiyudaaya,

¹¹Abakureete n'Abaharabu. Itwena nitubahurra nibabaza omu ndimi zaitu ebikuru Ruhanga ebi yakozire.”

¹²Boona baahunirra kandi baasoberwa, nukwo kukaguzangana bati: “Mara kinu nikimanyisa ki?”

¹³Baitu abandi baasekereza abakwenda nibagamba bati: “Batamiire amarwa g'omutararra.”

¹⁴Nubwo Petero yayemeriire hamu na ikumi n'omu, yabaliza haiguru naagamba ati: “Inywe bantu ba Buyudaaya, na boona abaikara Yerusaalemu, kinu mukyetegereze kandi mutege amatu kuhurra eki ndukwija kubagambira.

¹⁵Abasaija banu tibatamiire, nkooku murukuteekereza; habwokuba hati saaha isatu za nyenkya.

¹⁶Baitu kinu nikyo ekyarangirwe omurangi Yoweri ati:

¹⁷‘Omu biro bya ha mpero abantu boona ndibaseesaho Mwoyo wange.’ Nukwo Ruhanga arukugamba. ‘Batabani banyu na bahara banyu baliranga ebya Ruhanga, abasigazi banyu balibonekerwa, n'abagurusi banyu baliroota ebirooto.

¹⁸Ego, kandi omu biro ebi ndiseesa Mwoyo wange ha bairu bange na ha bazaana bange; nabo baliranga.

¹⁹Ndyoleka ebyamahano omwiguru n'ebihuniriza omunsi: esagama, omurro, n'okucuuka kw'omwika.

²⁰Izooba liriraara n'okwezi kulinanata nk'esagama, ekiro kya MUKAMA kitakahikire, ekiro kikuru kandi ky'ekitiinisa kitakabaireho.

²¹Kandi omuntu weena alyamirra ibara lya MUKAMA nubwo alijunwa.’

²²“Inywe basaija ba Isirairi, muhurre eki ndukwija kubagambira: Yesu owa Nazareeti, omuntu Ruhanga ou yabamanyisize n'eby'amaani, n'ebyamahano, n'ebihuniriza ebi yamukoleze hagati yanyu, inywena nkooku murukumanya

²³Yesu ogu obu yamazire kuheebwayo, entegeka ya Ruhanga nkooku ekaba eri kara koona ebintu binu bitakabaireho, mukamubamba ha musaraba, mwamwisa emikono y'abantu abatalemwa Biragiro byaitu.

²⁴Baitu Ruhanga akamuhumbuura, yamwiha omu busaalizi bw'orufu, habwokuba kikaba kitarukusoboka uwe kwikara omumaino garwo.

²⁵Kandi Daudi akamugambaho ati: ‘Obutoosa nyikaza Atahwaho mu maiso gange, habwokuba andi haihi na nyowe tinditengesebwa.

²⁶Nikyo omutima gwange gurukusemerererwa, nimbaza ebigambo by'omuhimbo kandi obu nkyali mwomeezi ndaikaraga nimwesiga.

²⁷Habwokuba tolindekera nkagenda Okuzimu, toliikiriza Enganzi yawe kujunda.

²⁸Ondagirra omuhanda gw'okumpikya ha kujunwa; okwikara omumaiso gaawe kulinyijuza okusemererwa kwona.’

²⁹“Bagenzi bange, busaho kugurukyagurukya: isenkuru itwe Daudi nawe akafa, yaziikwa, n'okuhika hati ekituuro kye kiri owaitu hanu.

³⁰Habw'okusangwa ali murangi, na habw'okumanya Ruhanga nkooku yamurahiire ati: Omu ha baijukuru be alimwikaliza ha kitebe ky'obukama bwe,

³¹Daudi akamanya kara kandi yabaza ha kuhumbuuka kwa Kristo, nkooku atarasingirwe Kuzimu, kandi n'omubiri gwe nkooku gutarajunzire.

³²Yesu ogu, Ruhanga akamuhumbuura; kandi eki itwena nitukijurra.

³³Obu yamazire kunyumizibwa ali ha mukono gw'obulyo gwa Ruhanga kandi amazire kuheebwa Mwoyo Ahikiriire, Ise ou yamuraganiize, nuwe akozire ekihuniriza kinu eki murukurora kandi eki murukuhurra.

³⁴Mazimakwo Daudi atatembe omu iguru; baitu nuwe ayagambire ati: ‘Atahwaho akangambira MUKAMA wange ati: Ikarra ha mukono gwange ogw'obulyo,

³⁵okuhika abanyanzigwa baawe obu ndibafoora akatebe ak'ebigere byawe.’

³⁶“Ab'enju ya Isirairi boona leka bamanyire kimu Yesu ou mwabambire ha musaraba nkooku Ruhanga yamuhindwire, yamufoora MUKAMA kandi Kristo.”

³⁷Abantu obu baahuliire ebi, omutima gwabasarra, baakaguza Petero n'abakwenda abandi bati; “Bagenzi baitu, turaakora ki?”

³⁸Petero yabagarukamu ati; “Mwegarukemu. Buli omu omuli inywe abatizibwe omu ibara lya Yesu Kristo, nukwo muganyirwe ebibi byanyu. Kandi muliheebwa ekisembo kya Ruhanga, nuwe Mwoyo Ahikiriire.

³⁹Habwokuba okuraganizibwa oku: kwanyu, n'okw'abaana banyu, kandi kw'abandi boona abakyali, boona MUKAMA Ruhanga aba araayetaga.”

⁴⁰Petero akabasoborra n'ebindi bingi naabateererra ati: “Mwejune, muruge omu bantu b'obusinge bunu obuhabire.”

⁴¹Abo abaikiriize ebigambo bye bakabatizibwa. Ha kiro eki, ha muhendo gw'abaikiriza hakongerwaho abantu nk'enkumi isatu.

⁴²Abaikiriza abo boona bakaikara nibeekambira enyegesa z'abakwenda, nibateerana nabo omu kucwa omugaati n'omu kusaba.

⁴³Abantu boona bakatiina habw'ebyamahano bingi n'ebihuniriza ebyakozirwe abakwenda.

⁴⁴Abaikiriize boona baikaraga hamu, kandi n'ebintu byabo byona baabibaganaga hamu.

⁴⁵Baatundaga ebintu byabo hamu n'itungo lyabo. Ebyarugamuga babibagana, baha buli muntu nkooku yayetaagaga.

⁴⁶Buli kiro baayesoroolezaaga omunju ya Ruhanga kandi baateeraniraga mu maka gaabo kucwamu omugaati. Baalyaaga ebyokulya byabo n'okusemererwa, baina omutima murungi,

⁴⁷nibakugiza Ruhanga kandi nibasiimwa abantu boona. Buli kiro MUKAMA yayongerahoga omuhendo gw'abo abarukujunwa.