Read Runyoro - rutooro Ebik 20 Bible Online

Ebik 20 - Runyoro - rutooro bible

Ebik 20

¹Akajagarro obu kahoire, Paulo yayeta abaikiriza yabagambira eby'okubagumya, yabaraga, yarugayo yagenda Makedoni.

²Obu yamazire kuraba omu bicweka ebi, n'okubagambira bingi eby'okubagumya, yahika Bugiriiki.

³Oku yamarayo ameezi asatu, kandi obu akaba naayeteekaniza okugwerra omu meeri kugenda Siriya, Abayudaaya baayekoba omu nsita okumwita. Baitu uwe yacwamu kugaruka enyuma arabe Makedoni ha bwerre.

⁴Abaamusendekeriize kumuhikya Asiya nubo banu: Soopateri owa Beroya, mutabani wa Piiro; Arisitariko na Sekundo Abateesalonika; Gaayo owa Derube na Timoteho, hamu na Tikiko na Turofimo abantu ba Asiya.

⁵Abo boona bakatwebembera, baatulindirirra Turoyi.

⁶Ebiro bikuru eby'Emigaati Etatumbisiibwe obu byamazire kuhwaho, na itwe twaruga Filipi tuli omu meeri. Emeeri egi twagimaramu ebiro bitaano, kandi bbo twabasanga Turoyi nambere twamazire ebiro musanju.

⁷Ha kiro eky'okubanza omu wiiki, obu twayesoroize kulya hamu omugaati; Paulo, ow'akaba ali w'okurugayo nyenkya, yatandika kubaza nabo. Yaikaraho muno nayegesa okuhika omu itumbi.

⁸Omu kisiika ekya haiguru nambere tukaba twesorooliize, hakaba nihaakiramu etaara nyingi.

⁹Paulo obu yaikaire naabaza muno, omusigazi arukwetwa Eyutiko, ow'akaba aikaliire omu idirisa, yakwatwa oturo twingi, twamulemesa, yahanuuka omu kainaasatu, yagwa hansi. Baamwihaho afiire.

¹⁰Paulo yasirimuka, yamwinamaho, yamubumbaatira naagamba ati: “Muleke kutiina, akyayomiire.”

¹¹Nukwo Paulo kugaruka omu kainaasatu, kandi obu yamazire kucwamu omugaati n'okulya, yayongera kubaza nabo omwanya mukooto okuhikya omu rukyakya nambere yabarugireho.

¹²Omusigazi ogu bamutwara omuka ayomiire, emitima yabagwa omunda.

¹³Itwe tukagwerra omu meeri, twayeyongera omumaiso, twahika Aso nambere twanihiire kugwerereza Paulo ow'akaba ategekere kuraba ha bwerre.

¹⁴Obu yatuhikireho tuli Aso, twamuta omu meeri, twairrayo twahika Mitileene.

¹⁵Obwire obu bwakiire, twarugayo tuli omu meeri, twarabaho ekizinga Kiiyo. Ha kiro kya kasatu ky'orugendo twahika Saamo, kandi ha kiro kya kana twahika Mileeto.

¹⁶Paulo wenka akaba acwiremu kutaraba Efeeso, nukwo aleke kukerererwa Asiya; habwokuba akaba naarahukiriza, obu kiraaba nikisoboka, ekiro kikuru kya Pentikooti kimusange Yerusaalemu.

¹⁷Obu akaba ali Mileeto, Paulo yatuma Efeeso kumweterayo abakuru ab'ekitebe ky'abaikiriza.

¹⁸Obu baamuhikireho, yabagambira ati: “Nimumanya omulingo nabaikaramuga obutoosa, okuruga ha kiro eki naahikiireho omu Asiya.

¹⁹Nimumanya nkooku nkaba nimpeereza MUKAMA n'okwebundaaza kwona, kandi nimumanya emihito n'obusaasi ebyangweriire habw'obucwangya bw'Abayudaaya.

²⁰Baitu tinkalekiire kubarangirra n'okubeegesa ekigambo kyona ekiraabagasira, ninkigamba omu rwanjale rw'abantu rundi omu maka ganyu,

²¹ninteererra Abayudaaya n'Abagiriiki kuhindukira Ruhanga n'okwikiriza MUKAMA waitu Yesu Kristo.

²²Hati nimurora nkooku ndukuhambirizibwa Mwoyo Ahikiriire kugenda Yerusaalemu ntarukumanya ebirangwera obu ndaahikayo;

²³kyonka omu buli rubuga oru ndabiremu, Mwoyo Ahikiriire nuwe ammanyisa nkooku ndi w'okukwatwa omu nkomo n'okubonabonesibwa.

²⁴Baitu obwomeezi bwange tindukubweta bw'omugaso rundi bw'omuhendo hali nyowe. Eki ndukugonza nukwo kumaliiriza orugendo rwange n'okuhikiriza obuheereza obu nahairwe MUKAMA Yesu, nukwo okurangirra Amakuru Amarungi ag'embabazi za Ruhanga.

²⁵“Hati nimmanya nkooku hataroho n'omu omuli inywe aba nahikireho nindangirra obukama bwa Ruhanga ow'aligaruka kundora.

²⁶Nahabweki hati nimbamanyisa nkooku ntarukujunaanwa obwomeezi bw'omuntu weena omuli inywe ow'aligwa,

²⁷habwokuba nkabooleka entegeka yoona eya Ruhanga ntarukutiina.

²⁸Hati nu mwerinde inywenka, kandi mulinde n'igana lyona Mwoyo Ahikiriire eri yabakwasize kurolerra, muliise ekitebe kya MUKAMA. Ekitebe eki yacungwize esagama ye.

²⁹Nimmanya ngu, obu ndaamara kubarugaho, emyaaga emikatuzi niija kubataahirra, kandi igana eri terukwija kuligirra mbabazi.

³⁰Nangwa n'omuli inywe halirugamu abantu abarukwegesa eby'okuhabisa abaikiriza, nukwo beetungire bati ab'okubahondera.

³¹Nahabweki mwikale nimurora kandi mwijuke nkooku namazire na inywe emyaka esatu ntarukwosa kiro na nyamusana kuteererra buli omu, nindira.

³²Hati nu, nimbakwasa Ruhanga n'enyegesa ey'embabazi ze. Enyegesa enyakusobora kubagumya n'okubatungisa obugwetwa omuli abo abeeziibwe.

³³Tinkasabaga muntu n'omu kumpa feeza rundi ezaabbu, noobu kyakuba ekyokujwara.

³⁴Inywena nimumanya emikono yange nkooku niyo yantungisaaga byona ebi naayetagaaga, hamu n'abo aba nkaba nyinabo.

³⁵Ebi byona nkabikora kubooleka nkooku musemeriire kwehayo nukwo mukonyere enceke, nimwijuka ebigambo MUKAMA Yesu ebi yagambire ati: ‘Okugaba kwina omugisa okukira okuheebwa!’”

³⁶Obu yamazire kugamba ebi, Paulo yateeza amaju hamu nabo boona, baasaba.

³⁷Obu, boona bakaba nibarra, Paulo bamugwa omu kifuba nibamunywegera.

³⁸Ekyakizire muno kubasaaliza nikyo ekigambo eki yabaragisize ngu, tibaligaruka kumurora. Baamusendekereza, baamuhikya ha meeri.