Read Runyoro - rutooro Ebik 21 Bible Online

Ebik 21 - Runyoro - rutooro bible

Ebik 21

¹Obu twamazire kubaraga, twagwerra omu meeri, twagenda tutarukukubutuka twahika ekizinga Koosi. Ekiro ekyakurasireho twahika Roodo. Obu twarugire Roodo, twahika Paatara,

²nambere twasangire meeri erukugenda Foinike, twagitaahamu, twagenda.

³Obu twalengiire ekizinga Kipuro, twagisiga ha bumoso, twagenda Siriya. Twahika ha bwerre omu rubuga Tiiro, habwokuba nuho bakaba nibagya kwihiramu ebintu omu meeri.

⁴Obu twasangireyo abaikiriza, twamarayo ebiro musanju. Habw'okuhaburwa Mwoyo Ahikiriire, abantu baayo baagambire Paulo eleke kugenda Yerusaalemu.

⁵Baitu obwire bwaitu obu bwahikire, twarugayo, twayongera orugendo rwaitu. Abo boona, hamu n'abakazi n'abaana baabo baatusendekereza okuhika obu baatuturukize orubuga. Obu twahikire ha musa gw'enyanja twateeza amaju, twasaba. Hanyuma, obu twamazire kuragangana,

⁶twagwerra omu meeri, nabo bakagaruka owaabu.

⁷Orugendo rwaitu orw'okuruga Tiiro obu rwahoire, twahika Putolemai nambere twaramukiize ab'oruganda, kandi twamara nabo ekiro kimu.

⁸Obu bwakiire twarugayo, twahika Kaisaariya; twataaha omunju ya Filipo omurangirizi w'Amakuru Amarungi, ow'akaba ali omu ha baheereza bali omusanju, twaikara owe.

⁹Filipo akaba aina bahara be bbana abataswirwe, kandi abakaba baina ekisembo ky'okuranga ebya Ruhanga.

¹⁰Obu twamazireyo ebiro, hakaijayo omurangi ayarugire Buyudaaya, ibara lye Agabo.

¹¹Obu yatuhikireho, yakwata omweko gwa Paulo, yagwebohesa amaguru n'emikono naagamba ati: “Kinu nikyo Mwoyo Ahikiriire arukugamba ngu: ‘Abayudaaya ba Yerusaalemu nukwo baliboha bati mukama w'omweko gunu, bamuheyo omu mikono y'Abanyamahanga.’ ”

¹²Obu twahuliire eki, itwe n'abandi boona abakaba baliyo, twayesengereza Paulo aleke kugenda Yerusaalemu.

¹³Baitu uwe yagarukamu ati: “Kiki eki murukukora kwija hamu nimurra kandi nimunsununura? Nyowe tinyeteekaniize kukwatwa kwonka baitu n'okufeera Yerusaalemu habw'ibara lya MUKAMA Yesu.”

¹⁴Obu yayangire kutuhuliriza, twamuleka, nitugamba tuti: “MUKAMA eki araagonza, nikyo kikorwe.”

¹⁵Ebiro byaitu Kaisaariya obu byahoireho, twaboha ebintu, twaimukya orugendo, twagenda Yerusaalemu.

¹⁶Abamu ha baikiriza ba Kaisaariya baagenda na itwe, baatuhikya ha nju ya Minasooni, Omunyakipuro, omu ha baikiriza abaabandize kuhindukira MUKAMA. Nuho tukaba tuli b'okuraara.

¹⁷Obu tukaba nitukyataaha Yerusaalemu, ab'oruganda batutangirra n'okusemererwa.

¹⁸Kandi nyenkya, obwire obu bwakiire, Paulo yagenda na itwe kurora Yakobbo. Abakuru b'ekitebe boona bakaba baliyo.

¹⁹Obu yamazire kubaramukya, Paulo yabasoborra naaherraniza ebintu byona Ruhanga ebi yamukoleze omu Banyamahanga.

²⁰Obu baahuliire ebi baatandika kukugiza Ruhanga. Kandi Paulo baamugarukamu nibasoborra bati: “Mugenzi waitu, na iwe orozire omu Buyudaaya nkooku harumu abantu enkumi n'enkumi abaikiriize; boona nibeekambira Ebiragiro bya Musa.

²¹Na hati baahurra nkooku orukwegesa Abayudaaya boona abarukwikara omu Banyamahanga kuleka Ebiragiro bya Musa, kandi noobeegesa kutasara abaana baabo n'okutakwata engeso ez'ihanga lyaitu.

²²Hati tukole ki? Mazima nibaija kuhurra nkooku oizire kunu.

²³Nahabweki kora eki turukukuhabura. Hanu twinaho abasaija bbana abaarahiire;

²⁴obatwale, oyeyeze hamu nabo, osasule byona eby'okubamwa isoke, emikoro nkooku eri. Aho boona nuho baraamanyira ebyakugambirweho nkooku bitali by'amazima, kandi iwe wenka nkooku oyerinda kandi okwata Ebiragiro bya Musa.

²⁵Baitu Abanyamahanga abo abaikiriize, tukabahandiikira ebbaruha nitubasoborra eki twacwiremu, nkooku basemeriire kwetantara ebihongiirwe abacwezi, n'enyama enyakurumu esagama, n'ebisoro ebimyoirwe, hamu n'obusiihani.”

²⁶Ha kiro ekyakurasireho, Paulo yatwara abasaija abo, yayeyeza hamu nabo, yataaha omunju ya Ruhanga kumanyisa abakuru baayo ebiro eby'okwezebwa kwabu nambere birihweraho, nukwo ekihongwa ekya buli omu kiheebwayo.

²⁷Ebiro ebi musanju obu bikaba biri haihi kuhwa, Abayudaaya abamu abaarugire Asiya, baamurora omunju ya Ruhanga, baatandika kujagaraza abantu, baagenda baamukwata,

²⁸nibatoka bati: “Inywe basaija ba Isirairi, mutukoonyere! Omusaija onu nuwe arukugenda buli hantu naayegesa abantu kuhakaniza ihanga lyaitu, naagaya Ebiragiro ebi twahairwe Musa n'ekiikaro kinu ekirukwera. Kandi ihangamura ataahize Abagiriiki omunju ya Ruhanga, asiisire n'ekiikaro kinu ekirukwera.”

²⁹Eki bakakigamba habw'okumurora juba omu rubuga ali na Trofimo owa Efeeso. Baateekereza ngu, Paulo amutaahize omunju ya Ruhanga.

³⁰Nubwo orubuga rwona rwaimukiriire, abantu baayesorooza, baakwata Paulo, baamucunda, baamuturukya omunju ya Ruhanga; ahonaaho enyigi zaakingwa.

³¹Kandi obu bakaba nibeetekaniza kumwita, amakuru gahika mukuru w'amahe ngu, Yerusaalemu yoona egwirwemu akambayaya.

³²Ahonaaho yatwara ab'amahe hamu n'abakuru baabo bagwera ekitebe ky'abantu. Nabo obu baarozire ab'amahe hamu n'omukuru wabu, baalekeraho kuteera Paulo.

³³Kandi mukuru w'amahe obu yahikire Paulo, yamukwata, yaragira bamubohese enjegere ibiri, yamukaguza ibara lye n'eki akozire.

³⁴Abamu ab'omu kitebe baatoka kundi n'abandi kundi. Obu yayetegeriize nkooku atarukusobora kumanya amazima habw'etoko yabu, yaragira kumutwara omu kigo ky'ab'amahe.

³⁵Obu baamuhikize ha matembero g'ekigo, ab'amahe baamuhimba habw'empaka z'abantu;

³⁶habwokuba ekitebe ky'abantu kikamukuratira nikitoka muno kiti: “Mumwite!”

³⁷Paulo obu akaba ali haihi kutaahibwa omu kigo, yakaguza mukuru w'amahe ati: “Nonyikiriza kukugambira ekigambo?” Nawe yamukaguza ati: “Mara iwe noomanya Orugiriiki?

³⁸Tiniiwe Omunyamisiri oli ayayemeseze abantu omu biro ebyahingwire, watwara omu irungu abasaija enkumi ina abaisi b'abantu?”

³⁹Nandiki Paulo ati: “Nyowe ndi Muyudaaya, nzaarwa ya Taruso orwa Kilikiya, orubuga orumanyirwe muno. Nkwesengeriize, nyikiriza mbalize abantu.”

⁴⁰Obu yamwikiriize, Paulo yayemerra ha matembero, yaculeeza abantu n'omukono gwe. Obu baamazire kuculeera, yabagambira omu Ruhebburaayo ati: