Read Runyoro - rutooro Ebik 22 Bible Online

Ebik 22 - Runyoro - rutooro bible

Ebik 22

¹“Bagenzi bange kandi bataata, muhurre ekigambo eki ndukwetonganirra omu maiso ganyu.”

²Obu baahuliire naabagambira omu Ruhebburaayo, baaculerra kimu cii. Paulo yagamba ati:

³“Nyowe ndi Muyudaaya, nzaarwa ya Taruso orwa Kilikiya, baitu nkakurra omu rubuga runu, naatendekwa omwegesa Gamalyeli okukuraatira engeso z'Ebiragiro by'abaisenkuru itwe, nayekambiraga ebya Ruhanga inywena nkooku murukukora hati.

⁴Nahiiganizaaga abantu abaahonderaga Omuhanda gunu, ntaireho n'okubaita, nimboha abasaija n'abakazi, nimbakwasa omu nkomo.

⁵Omukuru wa banyakatagara n'abakurasi boona ab'orukurato nubo bakaiso bange, habwokuba bakampa ebbaruha ez'okutwarra bagenzi baabo ab'omu rubuga Damasiko. Nkagendayo nkwate na bali abakaba baliyo, mbaleete Yerusaalemu baboherwe, nukwo bafubirwe.

⁶“Obu nkaba ninkyagenda, ndi haihi kuhika Damasiko, nk'omu ihangwe, ahonaaho ekyererezi eky'amaani kyaruga omwiguru, kyanyehinguliriza.

⁷Naagwa hansi, naahurra iraka niringambira liti: ‘Saulo, Saulo nompiiganiriza ki?’

⁸Na nyowe naagarukamu nti: ‘Niiwe oha, Waitu?’ Lyangarukamu liti: ‘Ninyowe Yesu owa Nazareeti ou orukuhiiganiza.’

⁹Abantu abakaba bali na nyowe bakarora ekyererezi eki, baitu batahurre iraka ly'ogu ow'arukubaza na nyowe.

¹⁰Naayongera naakaguza nti: ‘Nkole ki MUKAMA wange?’ Nawe yangarukamu ati: ‘Imuka, otaahe orubuga Damasiko. Nuho oraamanyisibwa eki oraakora.’

¹¹Obu naalemerwe kurora habw'okwangasana kw'ekyererezi eki, bagenzi bange nubwo baannanasire, bampikya Damasiko.

¹²“Omusaija arukwetwa Ananiya, omuntu ayayekambiraga ebya Ruhanga, naahikiriza Ebiragiro bya Musa kandi naasiimwa Abayudaaya boona abaikaraga Damasiko,

¹³yaija kundora. Yanyemerra ha rubaju, yangambira ati: ‘Mugenzi wange Saulo, iguka amaiso.’ Omu kasumi ako konyini amaiso gange gaiguka, naamurora.

¹⁴Yayongera yagamba ati: ‘Ruhanga ow'abaisenkuruitwe akukomere omanye ebi arukugonza, orole Omuhikiriire ogu Yesu, kandi ohurre iraka lye;

¹⁵habwokuba oliba kaiso we ha bantu boona, ow'okugumya ebi warozire n'ebi wahuliire.

¹⁶Hati otegeriize ki? Imuka, obatizibwe, oyogebweho ebibi byawe, oyamirre ibara lye.’ ”

¹⁷“Kiro kimu, obu namazire kugaruka Yerusaalemu, nkaba ninsaba omunju ya Ruhanga, ahonaaho nasisa nk'arukuroota.

¹⁸Narora MUKAMA nangambira ati: ‘Rahuka, oruge bwango Yerusaalemu, habwokuba abantu banu tibarukwija kwikiriza ebi orukumbazaaho.’

¹⁹Na nyowe nagarukamu nti: ‘MUKAMA wange, bbo bonka bamanyire nkooku nagendaga omu buli isorrokaniro ninta omu nkomo abarukukwikiriza kandi nimbateera.

²⁰Obu baaseesire esagama ya Sitefano, kaiso waawe, nkaba nyemeriireho nimpikirraniza n'abarukumwita, ndinzire ebijwaro byabo.’

²¹Baitu MUKAMA yangambira ati: ‘Irooko ogende, ninyija kukutuma hara omu Banyamahanga.’ ”

²²Abantu bakaikara bamutegiire amatu okuhika obu yagambire ebigambo ebi; nubwo baatokiire haiguru nibagamba bati: “Omuntu ogu mumwite aruge omu nsi! Tasemeriire kwikaraho!”

²³Obu, bakaba nibatoka muno, nibanaga n'ebijwaro byabo, kandi nibamiisa ecuucu haiguru.

²⁴Nukwo mukuru w'amahe kuragira bamutaahye omu kigo, bamukagulirize nibamuteera n'enkoba, nukwo amanye ebi barukumujunaana.

²⁵Obu baamazire kumuboha ha nyomyo, Paulo yakaguza omukuru w'ekihanda ky'abaserikale ow'akaba ayemeriire haihi ati: “Omu Biragiro byanyu nimwikirizibwa kuteera enkoba omuntu anyakuli Omurooma kandi atakasingirwe musango?”

²⁶Mukuru w'ekihanda ky'abaserikale obu yahuliire eki, yagenda hali mukuru w'amahe yamukaguza ati: “Omanyire eki orukukora? Omusaija onu Murooma.”

²⁷Aho mukuru w'amahe yaija, yamukaguza ati: “Ngambira amazima, oli Murooma kwo?” Paulo yamugarukamu ati: “Ego.”

²⁸Mukuru w'amahe yamugambira ati: “Nyowe Oburooma nkabugura omuhendo mukooto.” Nandiki Paulo ati: “Baitu nyowe nkazaarwakwo.”

²⁹Ahonaaho abo abakaba nibagonza kumukaguliriza baamurugaho, kandi mukuru w'amahe obu yayetegeriize nkooku yabohere Omurooma, yatiina muno.

³⁰Nyenkya obu bwakiire, habw'okwenda kumanya Abayudaaya ebi barukumujunaana, omukuru w'amahe yabohorra Paulo kandi yaragira abanyakatagara abakuru n'orukurato rwona kwesorooza. Yaleeta Paulo yamwemereza omumaiso gaabo.