Read Runyoro - rutooro Ebik 24 Bible Online

Ebik 24 - Runyoro - rutooro bible

Ebik 24

¹Obu haahingwireho ebiro bitaano, Ananiya, omukuru w'abanyakatagara, yaija n'abakuru b'enganda abamu, hamu n'omusaija Terutulo ow'okubatonganirra. Banyegerra Paulo hali omulemi omukuru.

²Obu baamwesire, Terutulo yatandika kumunyegerra naagamba ati: “Oweekitiinisa Feelikisi, ihanga linu nirikusiima habw'okulireetera obusinge, nirikusiima habw'ebindi orukutegeka kuligarra obuhyaka.

³Hoona hoona kandi obutoosa tusiima entegeka yawe.

⁴Ntakwikaizeho, ninkusaba habw'embabazi zaawe, otuhulirizeho kake.

⁵Okukugambira amazima, turozire omusaija onu nkooku arukututalibaniza muno, naaleeta akatabanguko omu Bayudaaya abali omu nsi zoona, kandi nuwe mwebembezi w'ekitebe ky'Abanazareeni.[2]

⁶Ekindi, akalengaho okusiisa Enju ya Ruhanga, nukwo kumukwata. [Twagonza kumucwera omusango nituhondera Ebiragiro byaitu;

⁷baitu Lisiya, mukuru w'amahe yabitaahamu, yamutwiha omu ngaro n'amaani,

⁸naaragira abaamunyegeriire kwija hanu omu maiso gaawe.] Kandi na iwe obu oramukaguza noija kumanya kurungi buli kintu eki turukumunyegererra.”

⁹Abayudaaya bakwataniza na Terutulo, baagumya ebi byona nkooku biri by'amazima.

¹⁰Omulemi omukuru obu yamusimireho kubaza, Paulo yagamba ati; “Mmanyire omazire emyaka nyingi noocwera abantu b'ihanga linu emisango; nikyo ndukwetonganirirra ntarukutiina.

¹¹Obu orakaguza abantu, noija kumanya nkooku mmazire ebiro ikumi na bibiri byonka nakaba kwija Yerusaalemu kuramya.

¹²Abantu banu batansange ninteera empaka n'omuntu weena, noobu kwakuba kutabatabura abantu omunju ya Ruhanga, rundi omu masorrokaniro, rundi omu rubuga.

¹³Kandi ebi barukunnyegererra hati, tibaina obwakaiso bwabyo.

¹⁴Baitu eki ndukwikiriza omu maiso gaawe nikyo kinu: Nyowe omu kuramya Ruhanga w'abaisenkuru itwe, ninkuratira Omuhanda bbo ogu barukweta akatebe akeecwireho. Obu, ninyikiriza byona ebiri omu Biragiro bya Musa n'ebyahandiikirwe abarangi.

¹⁵Okunihira kwange hali Ruhanga kuli kumu n'okwabu nkooku halibaho okuhumbuuka kw'abahikiriire n'abatahikiriire.

¹⁶Nikyo nyekambira obutoosa kwikara n'omutima ogutaina kamogo hali Ruhanga na hali abantu.

¹⁷Hati nkaleeta ebisembo eby'okukoonyera abanaku ab'ihanga lyaitu, hamu n'eby'okuhonga, habwokuba mmazire emyaka ntaija Yerusaalemu.

¹⁸Obu nkaba ninkyakora ebi, banu bansanga omunju ya Ruhanga, mmazire kwezibwa, ntaina kitebe ky'abantu kandi hataroho bwogo. Baitu hakaijaho Abayudaaya abamu abaarugire omu Asiya

¹⁹nubo baakwizire hanu kunnyegerra, obu baraaba baina eki barukunjunaana.

²⁰Hatali eki, leka abantu abali hanu bagambe ekibi eki bandozireho obu baanyemeriize omumaiso g'orukurato.

²¹Obu nkaba nyemeriire hagati yabu nkagamba bwa nti: ‘Ha kiro kinu nintonganizibwa omumaiso ganyu habw'okwikiriza okuhumbuuka kw'abafu.’ ”

²²Feelikisi ow'akaba naamanya kurungi eby'Omuhanda ogu, yakerereza omusango, yabaraganiza kiro kindi, yagambira Paulo ati: “Lisiya omukuru w'amahe obu aliija, nubwo ndicwa omusango gwawe.”

²³Yaragira omukuru w'abaserikale kumulindira omu nkomo, baitu bamuheho obugabe kandi batatanga banywani be kumukorra ebi arukwetaaga.

²⁴Obu haahingwireho ebiro, Feelikisi yaija na mukazi we Durusilla Omuyudaayakati. Yatuma baleete Paulo, ahurre ebi arukwegesa ha by'okwikiriza Kristo Yesu.

²⁵Baitu Paulo obu yatandikire kusoborra ha kuhikirra, ha kwetanga, na ha kucwerwa omusango okuliija, Feelikisi yatiina, yagamba ati: “Hati garukayo. Obu nditunga omwanya ndikweta.”

²⁶Omu kasumi ako koona akaikara nanihira ngu, Paulo naija kumugulirra, nikyo yamweteraga emirundi nyingi kubaza nawe.

²⁷Baitu obu haahingwireho emyaka ebiri, ekiikaro kya Feelikisi kyatwarwa Porukiyo Fesito; kandi Feelikisi habw'okugonza kusiimwa Abayudaaya, yasiga Paulo omu nkomo.