Read Runyoro - rutooro Ebik 25 Bible Online

Ebik 25 - Runyoro - rutooro bible

Ebik 25

¹Fesito obu akaba amazire ebiro bisatu ahikire omu isaza lye, yaruga Kaisaariya, yagenda Yerusaalemu.

²Abanyakatagara abakuru n'abakuru b'Abayudaaya baamulegera Paulo;

³baamwesengereza n'embabazi abaleetere Paulo Yerusaalemu, nukwo basobole kumugwera, bamwitire omu muhanda.

⁴Baitu Fesito yabasoborra Paulo nkooku arukulindirwa Kaisaariya, kandi uwe wenka nkooku ali w'okugarukayo bwango.

⁵Yayongera yagamba ati: “Nahabweki, leka ab'obusobozi omuli inywe tugende hamu. Obu haraaba haroho ekibi kyona musaija ogu eki yakozire, bamunyegerre.”

⁶Obu yamazire nabo ebiro ebindi nka munaana rundi ikumi, yagarukayo Kaisaariya. Ha kiro ekyakurasireho yaikarra ha kitebe ekicwerwaho emisango, yaragira baleete Paulo.

⁷Obu baamuleesire, Abayudaaya abaarugire Yerusaalemu baamwehinguliriza nibamunyegerra ebintu bingi kandi eby'amaani, baitu ebikaba bitaina bwakaiso.

⁸Paulo yatandika kwetonganirra naagamba ati: “Nyowe tinkakoraga kintu kyona ekirukucwa Ebiragiro by'Abayudaaya, rundi ekirukusiisa Enju ya Ruhanga, rundi ekirukusobya ebiragiro bya Kaisaali.”

⁹Baitu Fesito, habw'okugonza kusiimwa Abayudaaya, yakaguza Paulo ati: “Noikiriza kugenda Yerusaalemu, nuho otonganire emisango egi omumaiso gange?”

¹⁰Nandiki Paulo ati: “Nyowe nyemeriire omumaiso g'ekitebe ky'ekooti ya Kaisaali, nuho nsemeriire kucwererwa omusango. Na iwe nookimanya kurungi nkooku ntaina kibi kyona eki nakozire Abayudaaya.

¹¹Obu ndaaba nakozire kubi, rundi nakozire ekisemeriire kunnyisa, tindukucwa magezi ag'okwehugura kufa. Baitu ebi byona ebi barukunjunaana, obu biraaba bitaina bulyo, busaho n'omu anyakwina obusobozi okumpayo hali bo. Nyowe ninjurra hali Kaisaali.”

¹²Fesito obu yamazire kwehanuuza ha bahabuzi be, yamugarukamu ati; “Ojuliire hali Kaisaali, owa Kaisaali nuho orukwija kugenda.”

¹³Obu haahingwireho ebiro, Omukama Agiripa na Bereniike omukazi we baahika Kaisaariya kutangirra Fesito.

¹⁴Baamarayo ebiro; nukwo Fesito kusubirra Omukama omusango gwa Paulo, naagamba ati; “Hanu haroho omusaija, Feelikisi ou yasigire omu nkomo;

¹⁵na nyowe obu nkaba ndi Yerusaalemu, abanyakatagara abakuru n'abakuru b'Abayudaaya bakamunnyegerraho, nibasaba mmusingise omusango.

¹⁶Baitu nabagarukamu nti: ‘Teri ngeso y'Abarooma kuhayo omuntu atakatongaine n'abamunyegeriire, kandi nawe atahairwe omwanya gw'okwetonganirra eki bamunyegereriire.’

¹⁷Nahabweki abantu abo boona obu baizire hanu, ntabakerereze, baitu ha kiro ekyakurasireho naikarra ha kitebe ekicwerwaho emisango, naragira baleete omusaija ogu.

¹⁸Baakinyegerra obu baayemeriire, batasobole kwoleka obubi obw'omusango ogu barukumujunaana nkooku nanihiire;

¹⁹baitu baamunyegererra ebintu ebitali bimu ebirukukwata ha diini yabo, na ha muntu ayafiire arukwetwa Yesu; baitu Paulo ou arukugumya ngu, akyayomiire.

²⁰Obu nalemerwe kwetegereza kurungi ebigambo ebi, namukaguza obu araaba naikiriza kugenda Yerusaalemu, nuho abitonganire.

²¹Nubwo Paulo yajuliire Omukama Omukuru Agusito ngu nuwe amucwere omusango; na nyowe nukwo kuragira bamulindire omu nkomo okuhika obu ndakasobora kumutweka hali Kaisaali.”

²²Agiripa yagambira Fesito ati: “Na nyowe, omusaija ogu naakugondeze kumwehulirra nyenka.” Nandiki Fesito ati: “Oramuhurra nyenkya.”

²³Obwire obu bwakiire, Agiripa na Bereniike baizira omu kitiinisa kingi, baataaha omunju nambere baacweraga emisango, bali hamu n'abakuru b'amahe n'abantu bakuru ab'omu rubuga. Aho Fesito yaragira baleete Paulo.

²⁴Fesito yatandika kubisoborra naagamba ati: “Rukirabasaija Agiripa, na inywe inywena abeesoroize hanu, murole omusaija onu Abayudaaya boona ab'omu Yerusaalemu n'aba hanu ou baansabire n'amaani ngu, asemeriire kufa.

²⁵Nyowe habwange ndozire nkooku ataina eki yakozire ekisemeriire kumwisa. Baitu uwe nkooku yajuliire hali Omukama Omukuru Agusito, nkacwamu kumumutwekera.

²⁶Hati nyowe tinyina bulyo obuhikire obu ndaasigikiraho kuhandiikira mukama wange hali uwe. Nikyo mmuleetiire omumaiso ganyu, n'okukira muno omumaiso gaawe, Rukirabasaija Agiripa. Obu turamara kwetegereza ebye, nubwo ndatunga eki ndaahandiika.

²⁷Na nyowe ndozire nkooku kitahikire kutweka omunyankomo, ntarukwoleka emisango erukumujunanwa.”