Read Runyoro - rutooro Ebik 27 Bible Online

Ebik 27 - Runyoro - rutooro bible

Ebik 27

¹Obu kyamazire kugumibwa nkooku turukwija kugwerra omu meeri twambuke kugenda Itale, Paulo n'abanyankomo abandi baabakwasa omukuru w'abaserikale arukwetwa Yuliyo, ow'omu ihe lya Agusito.

²Twataaha omu meeri enyakuruga Aduramiti, ekaba eri haihi kwimukya kugenda ha myogo enyakuli ha musa gw'Asiya. Twagwerra omu nyanja, twina Alisitaako Omunyamakedoni ayarugire Teesalonika.

³Ekiro ekyakurasireho twahika Sidooni; oku Yuliyo yagirra Paulo embabazi yamwikiriza kubungira enganjani ze, bamuhumuze.

⁴Obu twarugire oku twagwerra omu nyanja, twagenda nitukiikira ekizinga Kipuro habw'okwehugura omuyaga ogukaba gututurukire omumaiso.

⁵Twacwanganiza enyanja nituraba ha rubaju rwa Kilikiya na Panfiiliya, twahika Miira, orubuga rwa Likiya.

⁶Oku nuho mukuru w'abaserikale yasangire emeeri enyakuruga Alekizanderiya neegenda Itale, yagitutamu.

⁷Tukamara ebiro bingi nitugenda mpora, twahika haihi na Kunido, tuli mu bulemeezi habw'omuyaga kutatwikiriza kweyongera omumaiso, nukwo kukwata omuhanda ogwa ha ifo y'ekizinga Kureete, twairirra omukono gw'enyanja ogurukwetwa Salumoone.

⁸Twagenda nagwo gwonka tukyali omu bulemeezi, okuhika obu twahikire ekiikaro nambere harukwetwa Emyogo Emirungi, haihi n'orubuga rwa Lasaaya.

⁹Ebiro bingi nkooku bikaba bifiire busa, kandi n'orugendo rutandikire kuba rw'akabi, n'ebiro by'okusiiba bikaba bihoire, Paulo nukwo kubahabura ati:

¹⁰“Bakama bange, nkooku ndukurora, orugendo runu nirwija kubamu akabi n'okufeerwa kwingi. Titurukwija kufeerwa ebintu n'emeeri byonka, baitu n'obwomeezi bwaitu.”

¹¹Baitu Mukuru w'abaserikale yayesiga omurungiki w'emeeri na mukama wayo okukira ebya Paulo yagambire.

¹²Kandi na habw'omwogo kutaba murungi kumarramu ebiro by'obutiti, abaingi baasiima kurugamu n'okweyongera omu nyanja, nibanihira nkooku barukusobora kuhika Foinike, omwogo gwa Kureete oguroleriire hagati y'obukiizi bw'emoso n'obw'obulyo obwa Burugaizooba, bamarreyo ebiro by'obutiti.

¹³Akayaga aka ha bukiizi bw'obulyo obu kaatiire mpora, baateekereza ngu, baatungire eki babaire nibagonza, baabohorra ebinyakusibika emeeri, baatandika kugenda nibakeetera Kureete nibeebinga omusa.

¹⁴Baitu omu kanya kake haija ihunga ly'amaani erirukwetwa ery'obukiizi obwa Burugaizooba, lyateera niriruga ha kizinga.

¹⁵Emeeri obu yatangirwe omuyaga, etarukusobora kugwolekera, na itwe twajwaha, twagireka. Omuyaga nugwo gwatutwara gwonka.

¹⁶Twagenda nitukiikira akazinga akarukwetwa Kauda. Obu twamazire kutalibana muno tukasobora kutabura akaato kaitu:

¹⁷kandi obu baamazire kukataahya omu meeri, baalengaho emeeri yoona kugibohesa emiguha, nibagigyehinguliriza. Habw'okutiina kukwatira omu musenyi gw'enkungu ya Siriti, baasirimura amatanga agarukutwara emeeri nukwo batwarwe omuyaga gwonka.

¹⁸Obu twatengeesiibwe muno ihunga, ha kiro ekyakurasireho baatandika kwiha ebintu omu meeri n'okubinaga omu nyanja.

¹⁹Kandi ha kiro kya kasatu ky'ihunga baanaga ebimu ha bintu ebigendesa emeeri.

²⁰Obu twamazire ebiro bingi tutakyarora izooba noobu zaakuba enyunyuuzi, kandi ihunga lingi nirituteera, tukaba tutakyanihira kukira.

²¹Obu haahingwireho ebiro bataina eki baliire, Paulo yabeemerra hagati naagamba ati; “Basaija inywe, kakuba mwampuliriize, timwakurugire Kureete, mukaizirwa akabi kanu n'okufeerwa okurukwingana aho.

²²Hati nimbateererra, mugume emitima! Tiharukwija kufa muntu n'omu omuli inywe, kwihaho emeeri yonka.

²³Habwokuba ekiro kinu kyonyini mpikirweho malaika wa Ruhanga ou ndamya kandi arukuntunga.

²⁴Malaika yagamba ati: ‘Paulo, otatiina; oli w'okwemerra omumaiso ga Kaisaali, kandi habwawe Ruhanga naija kulinda abo boona abali na iwe omu meeri.’

²⁵Nukwo nu basaija inywe, mugume emitima. Nyowe ninyesiga Ruhanga, kandi mazimakwo ebintu nibiija kuhikirra nkooku ngambiirwe.

²⁶Baitu tuli b'okunagwa ha kizinga.”

²⁷Ha kiro ekya ikumi na bbina ky'ihunga, obu tukaba nitukyayenjeera omu Nyanja Adiriya, omu bwire bw'itumbi abalimba baatandika kuteekereza ngu, haroho ensi ei bali haihi kuhikaho.

²⁸Baalenga okuhama kw'amaizi, baasanga ziri mita makumi ana. Obu bairiire kake omumaiso, baagaruka baalenga, baasanga ziri mita makumi asatu.

²⁹Habw'okutiina kuhuumira emyandara, baasumurra ebisibika emeeri bbina, baabisibikira ha kiso ky'enyuma eky'emeeri. Baategereza obwire kukya.

³⁰Abalimba obu bakaba nibagonza kweyiba kuruga omu meeri, bamazire n'okusirimura akaato omu nyanja, nibasisana nk'abarukugonza kusirimura ebirukusibika emeeri ha kiso ky'omumaiso,

³¹nubwo Paulo yagambiire mukuru w'abaserikale n'abaserikale be ati: “Abantu abo obu bataikale omu meeri, timurukwija kukira.”

³²Abaserikale nukwo kusara emiguha y'akaato, baakaleka kaagenda.

³³Obwire obu bukaba buli haihi kukya, Paulo yabeesengereza, boona balyeho ebyokulya, naagamba ati: “Kiro kya hati nikyo kya ikumi na bbina muli omu mwetunturo, mutaina eki murukulya.

³⁴Nahabweki nimbeesengereza mulyeho akookulya, kabagarremu amaani, habwokuba tiharoho kasoke akaraabura ha mitwe yanyu inywena.”

³⁵Obu yamazire kugamba eki, yakwata omugaati, yasiima Ruhanga omumaiso ga boona, yagucwamu, yatandika kulya.

³⁶Boona baagarukwa omutima omunda, baalya ebyokulya. [

³⁷Itwena abakaba bali omu meeri, tukaba tuli bantu bikumi bibiri nsanju na mukaaga.]

³⁸Obu baamazire kwiguta, baakeehya obulemeezi bw'ebintu baanaga engano yoona omu nyanja.

³⁹Obwire obu bwakiire, bakaba batamanyirre nsi ei baahikireho, baitu bakarora omukono gw'enyanja oguroho omwogo gw'omusenyi. Ha mukono ogu nuho baayenda kuhikiza emeeri, obu kyakubaire nikisoboka.

⁴⁰Baanaga ebisibika emeeri, baabisiga omu nyanja. Omu kasumi nuko kamu baasumurra emiguha ei ekaba ebohere engahi enyakurungika. Baahanika itanga ery'omumaiso nukwo omuyaga gubatwale ha mwogo.

⁴¹Baitu obu baahikire nambere engezi z'amaizi zirukutangatanganira, emeeri yatwarwa, engezi yabahikya nambere amaizi gatahamire, kandi ekiso eky'omumaiso kyataaha omu musenyi, kyakwatiramu. Ekiso ky'enyuma kyacwacwanwa amaani g'ebigonzi ebirukwehuura.

⁴²Nubwo abaserikale baahanwire amagezi ag'okwita abanyankomo, hataakubaho n'omu arukuziha akacwa;

⁴³baitu omukuru w'abaserikale, habw'okugonza kujuna Paulo, yabatanga kukora eki bakaba bategekere. Yaragira abarukumanya kuziha babanze beenage omu nyanja, nukwo bazihe bahike ha bwerre,

⁴⁴kandi abandi bagendere ha mbaaho rundi ha bicweka by'emeeri. Nukwo kyabaire kiti, boona baakira, baahika ha bwerre.