Read Runyoro - rutooro Ebik 28 Bible Online

Ebik 28 - Runyoro - rutooro bible

Ebik 28

¹Obu twamazire kukira, nubwo twamanya ekizinga eki nkooku kyayetwaga Melita.

²Abantu baamwo bakatukunira kurungi muno. Baatutangirra itwena, kandi habw'enjura kutandika kugwa n'obwire kuba bw'obutiti, baatuhembera omurro.

³Paulo akaba asenyere ekiganda ky'enku, yakita ha murro; baitu habw'ekibabu kyagwo, hahurumukamu encwera, yamwezinga ha mukono.

⁴Enzaarwa ez'omu kizinga eki obu baarozire nerengiija ha mukono gwe, baagambirangana bati: “Nyabura inywe omusaija onu mwisi w'abantu. Noobu araaba atabukire enyanja, baitu encwa ya Ruhanga ey'amazima temwikirize kwikaraho.”

⁵Baitu Paulo, enjoka yagikunkumurra omu murro atahikirweho kabi koona.

⁶Abantu baalindirra nibateekereza ngu, naija kuzimba rundi aragwa hansi akanguke; baitu obu baamazire kulindirra omwanya mukooto, batarozire kabi koona akamubaireho, baatandika kuteekereza kundi, baagira ngu, mucwezi.

⁷Haihi n'ekiikaro eki, hakaba haroho ebibanja by'omunyoro omukuru w'ekizinga eki, ibara lye Pubuliyo. Akatutangirra kandi yatukunira muno okumara ebiro bisatu.

⁸Omu kasumi ako, ise Pubuliyo akaba abyamire omu kitabu, arwaire omuswija n'ensese. Paulo yagenda kumubungira. Obu yamazire kumusabira, yamutaho emikono, yamukiza.

⁹Eki obu kyabaireho, abarwaire abandi ab'omu kizinga eki nabo baija baakizibwa.

¹⁰Abantu baayo bakatuha ebisembo bingi, kandi obu twayeteekaniize kugwerra omu meeri, baatuboherra na byona ebi tukaba nitwetaaga.

¹¹Obu haahingwireho ameezi asatu, tukaihwayo emeeri eyarugire Alekizanderiya ei ekaba emazire ebiro by'obutiti omu kizinga eki, eroho ekisisani ky'Aboojo Abarongo omumaiso gaayo.

¹²Obu twahikire Sirakuuse, twamarayo ebiro bisatu.

¹³Twarugayo nitwekiisa omusa gw'enyanja, twahika Reegiyo. Obu haahingwireho ekiro kimu, haimuka omuyaga ogw'obukiizi bw'obulyo, kandi ha kiro kya kabiri twahika Puteyoli,

¹⁴nambere twasangire ab'oruganda abaatusabire kumara nabo ebiro musanju. Hanyuma twairrayo, twahika Rooma.

¹⁵Ab'oruganda ab'oku obu baahuliire nkooku tuhikireyo, baija baatutangaana ha Katale ka Apio na ha ntangatangano ya Ngonyo Isatu. Paulo obu yarozire ab'oruganda yasiima Ruhanga, yagarukwamu amaani.

¹⁶Obu twahikire Rooma, Paulo yaikirizibwa kweraaza mbere arukwenda, aina omuserikale ayamulindaga.

¹⁷Obu haahingwireho ebiro bisatu, Paulo akeeta abeebembezi b'Abayudaaya, beesorooze. Obu baamazire kwesorooza yabagambira ati: “Bagenzi bange, noobu ndaaba ntaina eki nasobiize abantu rundi ntacwire engeso z'abaisenkuru itwe, baitu nabwo nkakwatirwa Yerusaalemu naaheebwayo omu mikono y'Abarooma.

¹⁸Obu baamazire kuntonganiza, baasanga ntaina musango gw'okunnyisa, baayenda kundekera.

¹⁹Baitu Abayudaaya obu baayangire, nyowe nukwo kujurra hali Kaisaali, noobu ndaaba ntaina eki ndukwenda kunyegerra abantu ab'ihanga lyange.

²⁰Nahabweki nikyo nsabiire kubarora n'okubaza na inywe. Ningira Abaisirairi eki baikara bategeriize, nikyo kintaisize omu njegere zinu.”

²¹Nabo baamugarukamu bati: “Itwe titukatungaga bbaruha ezirukuruga Buyudaaya ezirukukugambaho, noobu yakuba omuntu w'owaitu araizire kutusoborra rundi kutugambira ekibi kyona hali iwe.

²²Baitu nitwenda iwe wenka otusoborre ebyawe. Ekitebe eki, eki tukimanyaho nkinu: hoona nikigambwaho kubi.”

²³Obu baamazire kumuraganiza ekiro ekindi, baingi omuli bo bakaija omunju ye nambere akaba naagoonya ha kiro eki. Yabasoborra ebye okuruga nyenkya kuhika rwebagyo, naabamanyisa eby'obukama bwa Ruhanga, kandi naalengaho kubaikirizisa Yesu naasigikira omu Biragiro bya Musa n'omu by'abarangi.

²⁴Abamu bakaikiriza ebi yabagambiire, abandi baayanga.

²⁵Kandi bbo nkooku batarasoboire kwikirraniza, baayahukana, Paulo amazire kubamanyisa ekintu kimu ati: “Mwoyo Ahikiriire akahikya obu yagambiire baisenkuru inywe naakirabya omu Isaaya omurangi ati:

²⁶‘Hikaho abantu abo, obagambire oti: Okuhurra mulihurra, baitu timulyetegereza; okurora mulirora, baitu timulihweza.

²⁷Habwokuba emitima y'abantu banu egumangaine, n'amatu gaabo nigahurra kubi, n'amaiso gaabo bagazibiriize. Habw'amaiso gaabo okutarora, n'amatu gaabo okutahurra, n'emitima yabo okuteetegereza nikyo baayangiire okumpindukira nkabakiza.’

²⁸Mukimanye nu, okujunwa kunu okwa Ruhanga nkooku kuhairwe Abanyamahanga nabo. Bbo nibaija kuhurra.” [

²⁹Obu yamazire kugamba ebi, Abayudaaya baarugaho, nibateezangana empaka.]

³⁰Paulo akamarayo emyaka ebiri yoona, naayesasurra ebyetaago bye byona, kandi yatangirraga boona abaijaga kumubungira,

³¹naabarangirra obukama bwa Ruhanga kandi naayegesa bwerebwere ebya MUKAMA Yesu Kristo hataroho arukumutanga.