Read Runyoro - rutooro Ebik 3 Bible Online

Ebik 3 - Runyoro - rutooro bible

Ebik 3

¹Kiro kimu Petero na Yohaana bakaba nibagenda omunju ya Ruhanga ha saaha y'okusaba, niyo saaha ya mwenda.

²Baarora abahimbire omuntu nibamurabyaho. Omuntu ogu akaba azairwe ali mulema. Buli kiro baamuhimbaga, baamuta ha irembo ly'Enju ya Ruhanga erirukwetwa Erirungi, asabirize abo abataahamuga.

³Omusaija ogu obu yarozire Petero na Yohaana nibaija kutaaha omunju ya Ruhanga, yabasaba bamuhe akantu.

⁴Petero ow'akaba ali na Yohaana yamugumyaho amaiso, yamugambira ati: “Turolerre.”

⁵Nawe yabataho amaiso, naanihira ngu, baramuha akantu.

⁶Baitu Petero yagamba ati: “Efeeza n'ezaabbu tinyinabyo, baitu ninkuha eki nyinakyo. Omu ibara lya Yesu Kristo owa Nazareeti, imuka orubate.”

⁷Petero yamukwata omukono gw'obulyo, yamwimukya. Ahonaaho amaguru ge n'ebigere bye byatunga amaani.

⁸Yabandaatuka, yayemerra, yatandika kurubata, yataaha nabo omunju ya Ruhanga naarubata, naaguruka, kandi naakugiza Ruhanga.

⁹Abantu boona obu baamurozire naarubata kandi naakugiza Ruhanga,

¹⁰baamumanyirra nkooku nuwe ayaikaraga naasabiiriza ha Irembo Erirungi ery'Enju ya Ruhanga, baahunirra muno kandi baatangaara habw'eki ekimubaireho.

¹¹Omusaija ogu, obu akaba akyagumiireho Petero na Yohaana, abantu boona babaizira nibairuka, bali omu kisasi ky'omulyango ekirukwetwa ekya Solomooni, nibahunirra muno.

¹²Petero obu yarozire eki, yatandika kubeegesa ati: “Inywe basaija ba Isirairi, kinu nikibahunirizaho ki? Habwaki nimutuhanga amaiso nk'abarukuteekereza ngu, obusobozi rundi oburungi bwaitu nibyo byarubasa omusaija onu?

¹³Ruhanga owa Abburahamu, Isaaka na Yakobbo, Ruhanga ow'abaisenkuru itwe, nuwe yanyumiize omuheereza we Yesu, ou mwahaireyo mwamwehakanira omu maiso ga Pilaato, obu akaba amaliriire kumulekera.

¹⁴Baitu inywe mukeehakana ogu Arukwera kandi Ahikiriire, mwasaba okuheebwa omwisi w'abantu,

¹⁵kandi mwaita ou turukweta endugirro y'obwomeezi. Nuwe ogu Ruhanga ou yahumbwire omu bafu, kandi niitwe bakaiso b'ekintu eki.

¹⁶Okwikiriza ibara lya Yesu n'obusobozi bwe nibyo byagarurra amaani omusaija onu, ou murukurora kandi ou murukumanya. Okwikiriza Yesu nukwo kwamukiriza kimu inywena nkooku murukurora.

¹⁷“Hati nu bagenzi bange, nimmanya ngu, inywe n'abeebembezi banyu eki mukakikora habw'obutamanya.

¹⁸Baitu Ruhanga nukwo yahikiriize ati eki yarangisize abarangi boona ngu, Kristo we alibonabonesibwa.

¹⁹Nahabweki mwegarukemu, muhindukire Ruhanga, ebibi byanyu biihweho. Obu nubwo MUKAMA araabaha ebiro eby'okuhuumuzibwamu,

²⁰kandi abatumire Kristo ou yabategekiire.

²¹Nuwe Yesu anyakwikara omwiguru okuhika akasumi k'okugarurramu buhyaka ebintu byona, Ruhanga nkooku yarangisize abarangi be abahikiriire okuruga kara.

²²Mazimakwo Musa akagamba ati: ‘Omu bagenzi banyu, MUKAMA Ruhanga naija kubaimukizamu omurangi ondi, nka nyowe oku yanyimukize. Byona ebi araakabagambiraga, mubihikirize.

²³Omuntu weena atalihurra murangi ogu, alihwerekerezibwa, aihwe omu bantu ba Ruhanga.’

²⁴Kandi abarangi boona abaarangire ebya Ruhanga, okuruga hali Samwiri n'abo abaamuhondiire, nukwo baarangire bati ha biro binu.

²⁵Inywe muli baijukuru b'abarangi kandi bagwetwa b'endagaano Ruhanga ei yaraganiize baisenkuru inywe, naagambira Abburahamu ati: ‘Omu ruzaaro rwawe, enganda zoona ez'ensi numwo ziriheerwa omugisa.’

²⁶Ruhanga obu yahumbwire omwana we, akabanza kumutuma hali inywe Abayudaaya, abahe omugisa naiha buli omu omuli inywe omu ngeso ze ezitahikire.”