Read Runyoro - rutooro Ebik 4 Bible Online

Ebik 4 - Runyoro - rutooro bible

Ebik 4

¹Petero na Yohaana obu bakaba nibakyabaza n'abantu, banyakatagara baabaizira baina omulinzi omukuru w'Enju ya Ruhanga hamu n'Abasadukaayo.

²Bbo babihiirwe habw'okuhurra Petero na Yohaana nibeegesa kandi nibarangirra okuhumbuuka kw'abafu okwatandikire na Yesu.

³Baabakwata, baabalindira omu nkomo okuhika nyenkya, habwokuba bukaba bwizire.

⁴Baitu baingi omuli abo abaahuliire enyegesa yabu bakaikiriza; n'omuhendo gw'abaikiriza gwayeyongera, gwahika nk'enkumi itaano.

⁵Obu bwakiire nyenkya, abalemi baabo hamu n'abakuru b'enganda n'abeegesa b'ebiragiro bakeesorooleza Yerusaalemu,

⁶baina Annasi mukuru w'abanyakatagara, Kaayafa, Yohaana, Alekizanda, n'abandi boona ab'oruganda rw'omukuru wa banyakatagara.

⁷Obu baayemeriize abanyankomo hagati, baatandika kubakaguza bati: “Busobozi ki obubakoleze binu, rundi mubikozire omu ibara ly'oha?”

⁸Petero, aijwire Mwoyo Ahikiriire, yabagarukamu ati: “Inywe abalemi b'abantu n'abakuru b'enganda,

⁹obu muraaba nimutukaguza hati habw'ekikorwa ky'embabazi eki tukoliire omuntu ogu omulema kandi nkooku akiziibwe,

¹⁰inywe inywena hamu n'abantu ba Isirairi boona mumanye ngu, omu ibara lya Yesu Kristo owa Nazareeti ou mwabambire hamusaraba, Ruhanga ou yahumbwire omu bafu, habw'Ogu, omusaija onu nikyo ayemereriire omu maiso ganyu akizire.

¹¹Yesu ogu niryo ibaale inywe abombeki eri mwayangire, baitu niryo lyafookere bugumizo bw'enju.

¹²Tiharoho ondi asobora kutujuna, habwokuba busaho ibara lindi hansi y'iguru eryahairwe abantu erisobora kutujuna.”

¹³Ab'orukurato obu baarozire obumanzi bwa Petero na Yohaana, kandi baabamanya nkooku bali bantu kwonka abateegesiibwe, baahunirra. Baabamanya nkooku bali nubo abakaba nibaikara na Yesu.

¹⁴Obu baarozire omusaija ayakiziibwe abeemeriire ha rubaju, baaburwa eki baraabahakaniza.

¹⁵Nukwo kubaragira kuturuka aheeru, bbo bahanule bonka,

¹⁶nibakaguzangana bati: “Abasaija banu tubakole ki? Habwokuba baakozire ekyamahano ekirangainwe kandi ekimanyirwe abantu boona abaikara Yerusaalemu, titukyasobora kukyehakana.

¹⁷Kyonka habw'okukiculeeza kireke kweyongera kurangaanwa hoona omu bantu ka tubakange; balekere aho kugambira omuntu weena omu ibara eri.”

¹⁸Nukwo kweta abakwenda, baabateererra kutagaruka kugamba rundi kwegesa omu ibara lya Yesu.

¹⁹Baitu Petero na Yohaana baabagarukamu bati: “Na inywe mukicwemu, obu kiraaba kihikire omu maiso ga Ruhanga itwe okubahurra okukira Ruhanga.

²⁰Kyonka, ebi twarozire n'ebi twahuliire titusobora kubiculerra.”

²¹Ab'orukurato baayongera kubakanga, hanyuma baabalekera, habw'okuburwa obulyo obu baraabafubirraho. Kandi abantu boona bakaba nibakugiza Ruhanga habw'eki ekyabaireho.

²²Bakamanya omusaija ogu ayakozirweho ekyamahano eki eky'okukizibwa, nkooku akaba ahingwize emyaka makumi ana ey'obukuru.

²³Petero na Yohaana obu baalekiirwe, baagenda hali ab'ekitebe kyabu, baabamanyisa byona banyakatagara abakuru n'abakuru b'enganda ebi baabagambiire.

²⁴Obu baabihuliire, boona baimukiza Ruhanga amaraka nibamusaba bati: “Ai Mukama Rutakirwa, niiwe ayahangire iguru n'ensi, n'enyanja, n'ebinyakubirumu byona,

²⁵niiwe ayayekonyiize Mwoyo Ahikiriire kugambisa isenkuru-itwe Daudi omuheereza waawe oti: ‘Habwaki amahanga geekoba kukora kubi, habwaki abantu bahanurra busa ebitarumu?

²⁶Abakama b'ensi nibeetekaniriza obulemu, n'abalemi bakeesorooza hamu kurwanisa Atahwaho n'okurwanisa MUKAMA we ou yayekomiire.’

²⁷Kyamazima omu rubuga runu, Herode na Ponsio Pilaato bakeeteeraniza n'Abanyamahanga n'abantu ba Isirairi kurwanisa omwana waawe ahikiriire Yesu ou wayekomiire abe Mukama.

²⁸Nukwo bahikiriize bati ebi wategekere ira omu magezi gaawe n'omu busobozi bwawe ngu kibeho.

²⁹Hati nu, Ai MUKAMA, rora nkooku barukutukangisa, okoonyere abaheereza baawe kubaza ekigambo kyawe n'obumanzi bwona.

³⁰Gorra omukono gwawe, okize; kandi oikirize ebihuniriza n'ebyamahano bikorwe omu ibara ly'omwana waawe ahikiriire Yesu.”

³¹Obu baamazire kusaba, ekiikaro ha bakaba beesoroliize kyatengeeta; boona baijura Mwoyo Ahikiriire, baatandika kubaza ekigambo kya Ruhanga n'obumanzi.

³²Ekitebe kyona eky'abaikiriza bakaba baina omutima gumu n'omwoyo gumu. Hakaba hataroho n'omu omuli bo ayagizire ngu, byona ebi yatungire bye wenka; baitu byona bikaba biri by'abo boona.

³³Abakwenda bakongera kujurra okuhumbuuka kwa MUKAMA Yesu n'obumanzi bwingi, kandi embabazi za MUKAMA zaikaraga hali bo.

³⁴Omuli bo hakaba hatarumu n'omu ayaburwahoga ekintu, habwokuba boona abakaba baina ebibanja rundi amaju bakabitunda, baaleeta sente ezi baihiremu,

³⁵baaziha abakwenda. Bbo baazigabira buli omu nkooku yayetaagaga.

³⁶Hakaba haroho omusaija ow'oruganda rwa Leevi, enzaarwa ya Kipuro, arukwetwa Yosefu, abakwenda ou baayesire Baranaba (amakuru gaalyo: Mwekambisa).

³⁷Uwe akatunda ekibanja eki akaba ainakyo, yaleeta sente, yaziha abakwenda.