Read Runyoro - rutooro Ebik 6 Bible Online

Ebik 6 - Runyoro - rutooro bible

Ebik 6

¹Omu biro ebi, abeegesebwa obu baayeyongiire kukanya, Abayudaaya abaabazaaga Orugiriiki baahyemera Abayudaaya abaabazaaga Oruhebburaayo, habwokuba abafaakati baabo bakaba batarukufibwaho omu kugabirwa ebintu okw'obutoosa.

²Nubwo ikumi na babiri baayesire ekitebe ky'abeegesebwa boona, baabagambira bati: “Tikihikire itwe okuleka kurangirra ekigambo kya Ruhanga tukagenda ha kugaba ebyokulya.

³Nahabweki bagenzi baitu, mukome omuli inywe abasaija musanju abarukusiimwa abantu, abaijwire Mwoyo wa Ruhanga n'amagezi, tubakwase omulimo gunu.

⁴Baitu itwe nitwija kwekambira kusaba n'okwegesa ekigambo kya Ruhanga.”

⁵Ekihanuuro eki kyasiimwa ekitebe kyona, baakoma Sitefano, omusaija anyakwina okwikiriza kwingi kandi anyakwijwire Mwoyo Ahikiriire, baakoma Filipo na Porokooro, Nikanoori na Timooni, Paamena na Nikola owa Antyokiya ayahindukire yataaha omu diini y'ekiyudaaya.

⁶Abo baabaleeta omumaiso g'abakwenda, baabasabira, abakwenda baabataho emikono.

⁷Ekigambo kya Ruhanga kyayeyongera, n'omuhendo gw'abeegesebwa gwakanya muno omu Yerusaalemu, kandi banyakatagara baingi baikiriza kuhondera enyikiriza egi.

⁸Sitefano, Ruhanga ou yahaire emigisa nyingi n'amaani, akatandika kukora ebihuniriza n'ebyamahano omu bantu.

⁹Nukwo abantu kwimuka kumuteeza empaka, abamu nibaruga omu isorrokaniro ly'Abaalekiirwe (nkooku lyayetwaga) n'Abakirene n'Aba Alekizanderiya, kandi n'abandi abaarugire Kilikiya na Asiya.

¹⁰Bbo batasobole kumusingura habw'amagezi yahairwe hamu n'ebi Mwoyo wa Ruhanga ebi yamugambisize.

¹¹Nukwo kugulirra abantu ab'okumuhangirra bati: “Tukahurra naagamba eby'okujuma Musa na Ruhanga.”

¹²Obu baamazire kwimukiriza abantu n'abakuru baabo hamu n'abeegesa b'ebiragiro, baamwizira, baamukwata, baamuleeta omu rukurato.

¹³Baayemereza aho bakaiso b'ebisuba abaagizire bati: “Omusaija onu tayosa kugamba kubi ha kiikaro kinu ekirukwera na ha Biragiro byaitu.

¹⁴Tukamuhurra naayegesa ati: Yesu owa Nazareeti alihwerekereza ekiikaro kinu, kandi alihindura engeso Musa ezi yatusigiire.”

¹⁵Boona abakaba baikaliire omu rukurato obu bahangire Sitefano amaiso, baarora amaiso ge nigangasana nk'aga malaika.