Read Runyoro - rutooro Ebik 8 Bible Online

Ebik 8 - Runyoro - rutooro bible

Ebik 8

¹Ha kiro eki, abaikiriza aba Yerusaalemu bakatandika kuhiiganizibwa muno; kandi boona baararangira omu byaro bya Buyudaaya na Samaliya, kwihaho abakwenda bonka.

²Abasaija abamu abaatiinaga Ruhanga bakaziika Sitefano, baamulirirra muno.

³Baitu Saulo yaikara naahiiganiza abaikiriza Ruhanga naataaha omu buli nju, naakwata abasaija n'abakazi, naabata omu nkomo.

⁴Abo abaararangire, bakagenda hoona nibeegesa ekigambo kya Ruhanga.

⁵Filipo akagenda omu rubuga rwa Samaliya yabarangirra Kristo.

⁶Ebitebe bingi by'abantu, obu baahuliire Filipo ebi arukwegesa, baarora ebihuniriza ebi arukukora, baabiikiriza n'omutima gumu.

⁷Kandi baingi abakaba bakwasirwe emyoyo emibi, ekabarugamu neeyamuza. Baingi abakaba bazingamire n'abaramaire baakizibwa.

⁸Haabaho okusemererwa kwingi omu rubuga oru.

⁹Baitu omu rubuga oru hakaba haroho omusaija arukwetwa Simooni, ayakoraga eby'amasano, naahuniriza Abasamaliya, naayeyeta muntu mukuru.

¹⁰Abantu boona ab'orulengo orwa hansi n'orwa haiguru baamutiinaga nibagamba bati: “Omusaija onu nuwe maani ga Ruhanga arukwetwa Rutakirwa.”

¹¹Kandi baamutiinaga, habwokuba akaba amazire omwanya mukooto naabahuniriza n'amasano ge.

¹²Baitu obu baikiriize Amakuru Amarungi, Filipo aga yabarangiriire ha bukama bwa Ruhanga na ha ibara lya Yesu Kristo, baabatizibwa, abasaija n'abakazi.

¹³Simooni nawe yaikiriza, kandi obu yamazire kubatizibwa, yaikaraga naagenda na Filipo. Obu yarozire ebihuniriza n'ebyamahano bikuru Filipo ebi yakozire, yahunirra muno.

¹⁴Abakwenda abakaba bali Yerusaalemu obu baahuliire Abasamaliya nabo nkooku baikiriize ekigambo kya Ruhanga, baabatumaho Petero na Yohaana.

¹⁵Obu baahikireyo baabasabira nukwo batunge Mwoyo Ahikiriire;

¹⁶habwokuba busaho n'omu omuli bo ow'akaba atungire Mwoyo ogu, kwihaho kubatizibwa kwonka omu ibara lya MUKAMA Yesu.

¹⁷Aho Petero na Yohaana baabataho emikono, baaheebwa Mwoyo Ahikiriire.

¹⁸Simooni obu yarozire baatunga Mwoyo Ahikiriire habw'abakwenda kubataho emikono, yabaha sente,

¹⁹naagamba ati: “Obusobozi obu na nyowe mubumpe, weena ou ndaatahoga emikono, atungege Mwoyo Ahikiriire.”

²⁰Baitu Petero yamugarukamu ati: “Kabule nazo sente zaawe, iwe anyakutekeriize kugura ekisembo kya Ruhanga na sente!

²¹Ekintu kinu leka kukyetabamu, toinaho mugabo, habwokuba omutima gwawe tigusemiire omu maiso ga Ruhanga.

²²Nahabweki zira ekibi kyawe, osabe MUKAMA akuganyire ekiteekerezo eki.

²³Nyowe mmazire kwetegereza nkooku oijwire ihali kandi oboherwe ekibi.”

²⁴Nandiki Simooni ati: “Munsabire hali MUKAMA, byona ebi mwagamba haleke kubaho na kimu ekyampikaho.”

²⁵Abakwenda obu baamazire kuha obwakaiso n'okwegesa ekigambo kya Ruhanga, baagaruka Yerusaalemu nibarangirra Amakuru Amarungi omu byaro bingi eby'Abasamaliya.

²⁶Malaika wa MUKAMA akagambira Filipo ati: “Imuka ogende, okwate omuhanda ogw'obukiizi bw'obulyo, ogw'irungu, ogurukuruga Yerusaalemu nigugenda Gaaza.”

²⁷Yaimuka, yagenda. Omusaija wa Esiyopiya omukonwa, omuheereza wa Kandaake Omukamakati wa Esiyopiya, ow'akaba ali mukeeto w'ebintu bye byona, akaba aizire Yerusaalemu kuramya.

²⁸Omu kasumi ako akaba naagaruka owaabu, aikaliire omu kigaali kye, kandi naasoma Ekitabu kya Isaaya omurangi.

²⁹Mwoyo wa Ruhanga yagambira Filipo ati: “Irirra ekigaali eki, ogende nakyo.”

³⁰Filipo yairuka, yamuhikaho, yamuhurra naasoma Ekitabu kya Isaaya omurangi, nukwo kumukaguza ati: “Ebi orukusoma ebi, noobyetegereza?”

³¹Oli yamugarukamu ati: “Ndabyetegereza nta, hataroho ansoboroliire?” Yasaba Filipo atembe omu kigaali kye, aikarre nawe.

³²Ekicweka eky'omu Byahandiikirwe eki akaba naasoma nkinu: “Akaba nk'entaama erukutwarwa omu ibaagiro; rundi nk'akataama akali omumaiso g'omusazi w'ebyoya. Nawe nukwo atarayesamize kanwa ke.

³³Akeebundaaza kandi tiyacwerwa omu mazima. Busaho n'omu alibaza ha baijukuru be, habwokuba omunsi obwomeezi bwe bukacwibwaho!”

³⁴Nubwo omukonwa yakagwize Filipo ati: “Ninkusaba onsoborre: omurangi ogu, akabazaaho oha? Akeebazaaho wenka rundi akabazaaho omuntu ondi?”

³⁵Filipo yabandiza ha kyahandiikirwe eki, yamusoborra Amakuru Amarungi aga Yesu.

³⁶Obu bakaba nibakyagenda, baahika ha maizi agarukugera, omukonwa yagamba ati: “Dora amaizi nganu! Hati ekirukuntanga kubatizibwa kiraha?” [

³⁷Filipo yamugarukamu ati: “Obu oraaba noikiriza n'omutima gwawe gwona, nikisoboka.” Nandiki omukonwa ati: “Ninyikiriza Yesu Kristo nkooku ali Mwana wa Ruhanga.”]

³⁸Yaragira kwemereza ekigaali, bombi baaragara omu maizi, Filipo yamubatiza.

³⁹Obu baarugire omu maizi, Mwoyo wa MUKAMA yahwangura Filipo naamutwara handi, omukonwa tiyagaruka kumurora; yakwata omuhanda gwe yagenda n'omuhimbo.

⁴⁰Filipo akaija kurora, yayesanga ali Azooto, yayongera orugendo rwe naaraba omu mbuga zoona naarangirra Amakuru Amarungi okuhika obu yataahire Kaisaariya.