Read Runyoro - rutooro Ebik 9 Bible Online

Ebik 9 - Runyoro - rutooro bible

Ebik 9

¹Omu biro ebi, Saulo obu akaba naakyakangisiriza kandi naahaya kwita abeegesebwa ba MUKAMA, yagenda hali omukuru w'abanyakatagara,

²yamusaba ahandiikire amasorrokaniro ga Damasiko ebbaruha ezirukumwikiriza kukwata n'okutwara Yerusaalemu abasaija rundi abakazi abarukuhondera Omuhanda gwa MUKAMA kakuba abasangayo.

³Obu akaba naakyagenda, ali haihi kuhika Damasiko, ahonaaho ekyererezi kyaruga omwiguru, kyamwehinguliriza.

⁴Yagwa hansi, yahurra iraka nirimugamba liti: “Saulo, Saulo, nompiiganiriza ki?”

⁵Nawe yakaguza ati; “Niiwe oha, Waitu?” Iraka lyamugarukamu liti: “Ninyowe Yesu ou orukuhiiganiza.

⁶Hati imuka, otaahe omu rubuga, oraamanyisibwa eki oraakora.”

⁷Abasaija abakaba nibagenda nawe baayemerra babuzirwe eky'okugamba. Bakahurra iraka, baitu batarole muntu.

⁸Saulo yaimuka hansi; obu yaburwire amaiso, tiyahweza kantu. Baamunanata, baamutaahya Damasiko.

⁹Akamara ebiro bisatu atarukurora kandi atarukulya noobwakuba kunywa kantu.

¹⁰Damasiko hakaba haliyo omwegesebwa, ibara lye Ananiya. MUKAMA akamubonekera yamweta ati: “Ananiya.” Uwe yayetebuka ati: “Ndi hanu, Taata.”

¹¹Nandiki MUKAMA ati: “Imuka, ogende omu ruguudo orurukwetwa Oruterekeriire, okaguliirize omunju ya Yuda, omuntu arukwetwa Saulo owa Taruso. Mu kasumi kanu naasaba,

¹²kandi abonekiirwe naarora omusaija arukwetwa Ananiya naija kumutaho emikono nukwo ahweze.”

¹³Ananiya yamugarukamu ati: “MUKAMA wange, baingi bakambalizaaho omusaija ogu, na ha bubi obu abaire naakora abantu baawe omu Yerusaalemu.

¹⁴Na hanu aizire aina obusobozi abanyakatagara bakuru obu baamuhaire obw'okuboha boona abarukwamirra ibara lyawe.”

¹⁵Baitu MUKAMA yamugarukamu ati: “Genda, habwokuba omusaija ogu nikyo kikwato kyange eki nakomere kumanyisa ibara lyange omu Banyamahanga, n'omu bakama baabo, n'omu bantu boona aba Isirairi.

¹⁶Ndimwoleka nkooku asemeriire kubonabonesibwa muno habwange.”

¹⁷Nubwo Ananiya yagenzire, yataaha omunju egi. Yataho Saulo emikono naagamba ati: “Mugenzi wange Saulo, ntumirwe MUKAMA Yesu ayakubonekiire omu muhanda, nukwo oiguke amaiso kandi oijule Mwoyo Ahikiriire.”

¹⁸Ahonaaho ebintu ebirukusisa ebigaragamba by'encu byamuruga ha maiso, yarora. Saulo yayemerra, yabatizibwa.

¹⁹Obu yamazire kulya ebyokulya, yagarukwamu amaani. Damasiko akamarayo ebiro bike, ali hamu n'abeegesebwa.

²⁰Ahonaaho yatandika kurangirra Yesu omu masorrokaniro gaayo naagamba ati: “Nuwe Mwana wa Ruhanga.”

²¹Boona abaamuhuliire bakahunirra nibakaguza bati: “Omusaija onu, tinuwe ayahiiganizaaga aba Yerusaalemu abaayaturaga ibara eri? Kandi tinikyo aiziriire hanu, abatwale omu maiso g'abanyakatagara abakuru baboherwe?”

²²Baitu Saulo yayeyongera muno kwegesa n'amaani yakwasa ensoni Abayudaaya abaikaraga Damasiko, naagumiza kimu Yesu nkooku ali Kristo.

²³Ebiro nkooku byagenzire nibihinguraho, Abayudaaya baayekoba hamu kumwita;

²⁴baitu ensita zaabu Saulo yazimanya. Baikaraga nibalinda amalembo g'orubuga nyamusana n'ekiro nibaserra kumwita.

²⁵Baitu abaikiriza baamucwisa ekiro, baamusirimura ekisiika ali omu kisombera ekiteekerwe kiteeko.

²⁶Obu yahikire Yerusaalemu, yalengaho kwehikya abaikiriza; baitu boona bakamutiina, habw'okutaikiriza nkooku akaba ali kwo mwegesebwa.

²⁷Baranaba nuwe ayamutwaire, yamuhikya abakwenda, yabasoborra Saulo nkooku yarozire MUKAMA omu muhanda, yabaza nawe, kandi nkooku yarangiriire n'obumanzi ibara lya Yesu omu Damasiko

²⁸Saulo yatandika kugenda nabo, naabungira ab'omu Yerusaalemu,

²⁹naarangirra n'obumanzi omwibara lya MUKAMA. Kandi obu yamazire kugamba n'Abayudaaya abaabazaaga Orugiriiki n'okuhakaniza nabo, baamalirra kumwita.

³⁰Ab'oruganda obu baakimanyire, baamutwara Kaisaariya, nukwo baamwohereza agende Taruso.

³¹Nahabweki ekitebe ky'abaikiriza boona ab'omu Buyudaaya, Galiraaya, na Samaliya baasigara baina obusinge kandi baayeyongera kukanya nibatiina Ruhanga kandi nibagumibwa Mwoyo Ahikiriire.

³²Petero obu akaba naagenda hanu na hali okubungira abaikiriza boona, yahika n'omu baikiriza abaikaraga Liida.

³³Oku nuho yasangire omusaija, ibara lye Aineya, ayamazire emyaka munaana atarukuruga ha kitabu, azingamire.

³⁴Petero yamugambira ati: “Aineya, Yesu Kristo hati yakukiza; imuka oyale ekitabu kyawe.” Ahonaaho yaimuka.

³⁵Boona abaikaraga Liida na Sarooni obu baamurozire akizibwe, baahindukira MUKAMA.

³⁶Omu rubuga Yoppa hakaba harumu omwegesebwa, ibara lye Tabita, amakuru gaalyo: Dorokasi rundi Enjaza. Omukazi ogu yakoraga ebirungi bingi naagabira n'abanaku.

³⁷Omu biro ebi akarwara, yafa. Obu baamazire kwogya omutumbi gwe, baagubyamya omu kisiika ekiri omu kainaabiri.

³⁸Kandi Liida teri hara na Yoppa. Nahabweki abeegesebwa obu baahuliire Petero nkooku ali oku, baamutumaho abasaija babiri nibamwesengereza bati; “Waitu oije oturole, otabandaara.”

³⁹Petero yaimuka, yagenda nabo. Obu yahikireyo, baamutembya omu kainaabiri. Abafaakati boona baija bamwemerra haihi nibarra, nibamwoleka ebitetei n'ebijwaro ebindi Dorokasi ebi yabaziire obu akaba akyali nabo.

⁴⁰Nubwo Petero yabaturukize aheeru, yateza amaju, yasaba. Obu yamazire kusaba, yahindukira omukazi ogu ayafiire, yamugambira ati: “Tabita, imuka.” Omukazi yaziburra amaiso, yarolerra Petero, yaimuka, yaikarra.

⁴¹Petero yamukwata ha mukono, yamwemereza. Nubwo yayesire abaikiriza n'abafakaati, yamubakwasa ali mwomeezi.

⁴²Ekyabaireho kyamanywa omu Yoppa hoona; baingi baikiriza MUKAMA.

⁴³Petero yayongera yamara ebiro Yoppa, naaraara omwa Simooni, omuhazi w'empu.