Read Runyoro - rutooro Bar 1 Bible Online

Bar 1 - Runyoro - rutooro bible

Bar 1

¹Nyowe Paulo, omuheereza wa Yesu Kristo, ayayesirwe kuba mukwenda, ayasoroirwe kurangirra Amakuru Amarungi agaaraganiziibwe Ruhunga.

²Abarangi be bakabanza kugarangirra ira omu Bihandiiko ebirukwera.

³Nugo Makuru Amarungi agarukubaza ha Mwana we ayazairwe omu mubiri ali mwijukuru wa Daudi,

⁴baitu habw'okwera kw'omwoyo gwe na habw'okuhumbuuka omu bafu akamanyisibwa nkooku ali Mwana wa Ruhanga ow'obusobozi bwona. Ogu nuwe Yesu Kristo MUKAMA waitu,

⁵ou twatungiiremu omugisa n'obukwenda obw'okurangirra ab'omu mahanga goona okworoba okurukuruga omu kumwikiriza.

⁶Na inywe muli omuli abo abaayesirwe kufooka ba Yesu Kristo.

⁷Inywe inywena abagonzibwa ba Ruhanga abali Roma, abaayesirwe kuba bantu ba Ruhanga. Nimbagondeza omugisa n'obusinge ebiruga hali Ruhanga Isiitwe na hali MUKAMA waitu Yesu Kristo.

⁸Eky'okubanza ninsiima Ruhanga wange omu Yesu Kristo habwanyu inywena; habwokuba okwikiriza kwanyu nikuranganwa omunsi yoona.

⁹Ningira Ruhanga ou mpeereza n'omwoyo gwange gwona nindangirra Amakuru Amarungi ag'Omwana we, nuwe kaiso wange nkooku mbaijuka butoosa omu kusaba kwange.

¹⁰Obu, ninsaba Ruhanga kakuba akisiima, mbahikeho nambere muli.

¹¹Habwokuba ningonza muno kubarora, nukwo nsobole kubaleetera ekisembo ky'omwoyo ekiraabagumya.

¹²Kandi na itwe tusobole kugumyangana omu kwikiriza kwaitu: okwange n'okwanyu.

¹³Bagenzi bange, ningonza mumanye nkooku nagondeze kwija nambere muli emirundi nyingi, mbatungemu abaikiriza nkooku nabatungire omu Banyamahanga abandi; baitu okuhika hati nkyaina ebintangire.

¹⁴Nyowe nkyaina ibanja ery'okuhikaho Abagiriiki n'ab'amahanga agandi agateegesiibwe, ab'amagezi omuli bo n'abadoma.

¹⁵Na inywe abali Rooma, nyina ekihika eky'okubarangirra Amakuru Amarungi.

¹⁶Kandi nyowe, Amakuru Amarungi tindukugakwatirwa nsoni: nugo maani ga Ruhanga aganyakujuna weena arukwikiriza, okubandiza ha Bayudaaya okuhika na ha Bagiriiki.

¹⁷Habwokuba omu Makuru Amarungi omu, nuho harukusuukulirwa obuhikiriire oburuga hali Ruhanga, oburaba omu kwikiriza kandi nibuheebwa abarukwikiriza; nkooku kyahandiikirwe kiti: “Ogu anyakuhikiriire alyomeera habw'okwikiriza.”

¹⁸Obukaya bwa Ruhanga butandikire kuzooka niburuga omwiguru, nibuhikaho abantu abatatiina Ruhanga kandi ababi ababuutikira amazima habw'obubi bwabo.

¹⁹Byona ebi basobora kumanyaho Ruhanga nibabyetegereza, habwokuba Ruhanga akabibooleka.

²⁰Okuruga ha kuhangwa kw'ensi, omulingo gwe ogutarorwa, nubwo busobozi bwe obutahwaho hamu n'obwaruhanga bwe, byetegererezibwa omu bintu ebi yahangire. Nahabweki tibaina ky'okwekwasa kyona.

²¹Noobu baraaba baamanyire Ruhanga, baitu batamutemu kitiinisa kandi batamusiime nkooku asemeriire. Ebiteekerezo byabo bikabahabisa kandi amagezi gaabo agaturumu gaswekererwa omwirima.

²²Abaayeyesire abanyamagezi, nubo bafookere badoma.

²³Bakaleka kuramya Ruhanga atafa, baatandika okuramya ebisisani ebirukusisana abantu abafa, rundi ebinyonyi, rundi ebisoro, rundi ebyekurra.

²⁴Nikyo Ruhanga yabahweriiremu, emitima yabo ekeemaliza ha bubi, bakakora bonka na bonka ebihemura emibiri yabo.

²⁵Ningira bakaleka amazima agarukumanyisa Ruhanga baatamu ebisuba, baaramya kandi baaheereza ebihangwa okukira Omuhangi, anyakuheebwa ekitiinisa ebiro byona! Amiina.

²⁶Nikyo Ruhanga yabalekiire balemwe okwegomba okurukuswaza. Bakazi baabo bakaleka emibiri yabo eki yahangiirwe, baagikoza eki etarahangiirwe.

²⁷Abasaija nabo bakaleka kuteerana n'abakazi baatandika kwanjukiranganaho, nibakora ebikorwa eby'obuhemu n'abasaija bataahi baabo, baayereetera bonka ekifubiro ekisemeriire obugwagwa bwabo.

²⁸Habw'okwanga kwikiriza Ruhanga, nikyo nawe yabalekiire baikale n'omutima oguramaire n'engeso ez'obugwagwa.

²⁹Baijura engeso embi zoona: obubi, okwegomba okubi, hamu n'itima. Baijwire ihali, obwisi, enkungani, obugobya, n'enobi. Baaba ngambigambi,

³⁰bahangirizi, abanoba Ruhanga, beereme, abeekuliriza, abenyumiza, abaserra obubi, abatahurra bazaire baabo,

³¹badoma, abateesigwa, abataganyira, n'abatagira mbabazi.

³²Abo noobu baraaba nibamanya ekiragiro kya Ruhanga ekigamba ngu, abakora ebintu nk'ebi basemeriire kufa, tibagarukira ha kubikora kwonka, baitu basagika n'abandi abarukubikora.