Read Runyoro - rutooro Bar 10 Bible Online

Bar 10 - Runyoro - rutooro bible

Bar 10

¹Beene baitu, omutima gwange eki gurukwenda, kandi eki ndukusabira Abaisirairi hali Ruhanga, nikyo kinu: bajunwe.

²Ningumya nkooku bagonza kwo Ruhanga, baitu tibakabaire kwetegereza.

³Habw'okutamanya obuhikiriire oburuga hali Ruhanga na habw'okuserra okweteeraho obuhikiriire bwabo nyabwabo, bateeteho obu oburuga hali Ruhanga.

⁴Habwokuba omu Kristo nuho Ebiragiro bihikirizibwa, nukwo weena arukumwikiriza ahikirizibwe.

⁵Musa akahandiika naagamba ati: Omuntu anyakwekambira obuhikiriire oburukusigikira ha Biragiro, nubwo bulimuhaisa obwomeezi.

⁶Baitu obuhikiriire oburukusigikira ha kwikiriza tibukutanga kugamba omu mutima gwawe oti: “Nooha alitemba omu iguru?” [Nukwo aiheyo Kristo].

⁷Rundi oti: “Nooha alisirimuka okuzimu?” [Nukwo aihe Kristo omu bafu].

⁸Kandi Ebyahandiikirwe byonyini bigamba biti: Ekigambo kikuli haihi, kikuli ha munwa, n'omu mutima gwawe. [Nikyo kigambo eky'okwikiriza ekitwegesa].

⁹Kakuba oyatura n'akanwa kaawe oti: Yesu aba MUKAMA, okaikiriza n'omutima gwawe Ruhanga nkooku yamuhumbwire omu bafu, alijunwa.

¹⁰Omuntu aikiriza Kristo n'omutima gwe, nukwo ahikirre; kandi ayatura Kristo n'akanwa ke, nukwo ajunwe.

¹¹Ebyahandiikirwe bigamba biti: “Weena anyakumwikiriza, talikwatwa nsoni.”

¹²Habwokuba tiharoho mbaganizo ha Muyudaaya n'Omugiriiki: MUKAMA ogu omu, aba MUKAMA wa boona, kandi oburungi bwe abugabira boona abamukunga.

¹³Ningira: “Weena anyakwamirra MUKAMA alijunwa.”

¹⁴Baitu abantu basobora bata kwamirra ogu ou bataraikiriize? Kandi n'okwikiriza ou batakahurrahoga? Kandi barahurra bata, hataroho murangirize?

¹⁵Kandi bbo bararangirra bata, batatumirwe? Nkooku kyahandiikirwe kiti: “Ka birungi ebigere by'abarukurangirra Amakuru Amarungi!”

¹⁶Baitu boona abaagahuliire, batagateho mutima, nangwa. Isaaya nkooku yagambire ati: “Ai MUKAMA, nooha ayaikiriize ebi twamurangiire?”

¹⁷Nahabweki okwikiriza kuruga omu bigambo ebi tuhurra, kandi ebigambo ebi tuhurra biruga omu kurangirra Kristo.

¹⁸Leka nyowe nkaguze nti: Abaisirairi batahurre? Mazimakwo bakahurra, habwokuba kikahandiikwa kiti: “Iraka lyabo likahulirwa abantu boona, n'ebigambo byabu bikahika ha mitaano y'ensi.”

¹⁹Ninyongera kukaguza nti: Ihanga lya Isirairi litabyetegereze? Baitu Musa ti nuwe ayabandize kubahabura ati: “Ndibakwasa ihali hali abo abatakabaire ihanga; ndibakwasa ekiniga hali ihanga eritaina magezi.”

²⁰Kandi Isaaya nikyo agambira atarukutiina ati: “Nkazoorwa abo abataranserwire; nkeeyoleka abo abatarankaguliriize.”

²¹Baitu hali Isirairi naagamba ati: “Ekiro kyona emikono yange nkaikara ngitegiire abantu entahurra kandi abeemi.”