Read Runyoro - rutooro Bar 12 Bible Online

Bar 12 - Runyoro - rutooro bible

Bar 12

¹Nahabweki bagenzi bange, nimbeesengereza habw'embabazi za Ruhanga, muheyo emibiri yanyu nk'ekyonzira ekyomiire, ekirukwera kandi ekirukusiimwa Ruhanga. Obu nubwo muba nimuramya Ruhanga omu mazima.

²Muleke kwesisaniza n'ab'ensi enu, baitu muhinduke, nimugarurwa buhyaka omu biteekerezo byanyu, nukwo mugumye Ruhanga ebi agonza: nibyo ebirungi, ebisiimwa, kandi ebihikiire kimu.

³Habw'omugisa ogu nahairwe, ninteererra buli omu omuli inywe, aleke kweteekerezaaho muno okukira nkooku ali, baitu ayeteekerezeho nkooku ali omu mazima, buli omu naarorra ha kwikiriza Ruhanga oku yamuhaire.

⁴Omu mubiri gumu nkooku twinamu ebicweka bingi, kandi ebicweka ebi byona bitarukukora mulimo gumu,

⁵nukwo kiti na itwe. Noobu turaaba tuli baingi, baitu tuli mubiri gumu omu Kristo; kandi buli omu kicweka kya mugenzi we.

⁶Nkooku twina ebisembo ebitarukusisana okurorra ha migisa ei twahairwe, katubyekonyeze. Obu kuraaba kuli kuranga, turange niturorra ha kwikiriza kwaitu.

⁷Obu buraaba buli buheereza, tuheereze. Ogu arukwegesa, ate omutima ha kwegesa kwe.

⁸Ogu arukuhabura, ahabule kwo; ogu arukugaba, agabe n'obwenda; ogu arukukoonyera, akoonyere n'obwekambi; kandi arukukora eby'embabazi, abikole n'okusemererwa.

⁹Engonzi zanyu zibe z'amazima. Munobe ekibi, mugumire ha kirungi.

¹⁰Mugonzangane nk'ab'oruganda oku bagonzangana; omu kuhangana ekitiinisa buli omu akizeho mugenzi we.

¹¹Mwekambe, muleke kuba bagara, muheereze MUKAMA n'omutima ogwijwire engonzi.

¹²Mukyanganuke omu kunihira kwanyu, mugumiisirize omu mihito, musabe obutalekerra.

¹³Muhe abantu ba Ruhanga ebi barukwetaaga, mutangirre kandi mukunire abagenyi.

¹⁴Musabire omugisa abo abanyakubahiiga; mubasabire omugisa, baitu muleke kubakondereza.

¹⁵Mukyanganuke n'abo abarukukyanganuka, murre n'abo abarukurra.

¹⁶Mwikale mwina omutima gumu; muleke kwekuliriza, mweteerane n'abo abataina kitiinisa, muleke kwemanyaho amagezi.

¹⁷Weena anyakukora kubi, mutamuhoora nzigu, baitu muteho omutima okukora boona eki barukweta ekirungi.

¹⁸Obu kiraaba nikisoboka, mwikarane na boona mu businge nkooku murukusobora.

¹⁹Abagonzibwa, mutalyehorra inywenka enzigu, baitu eki mukirekere encwa ya Ruhanga; habwokuba kikahandiikwa kiti: “Okuhoora enzigu kwange, ninyowe ndihoora; MUKAMA nukwo agamba.”

²⁰Na handi kigamba kiti: “Omunyanzigwa waawe obu arumwa enjara, muhe ebyokulya; obu akwatwa iroho, muhe ekyokunywa; habwokuba obu okora oti, oba noomusingisa omusango.” [2]

²¹Mutalisingurwa obubi, baitu inywe obubi mubusinguze oburungi.