Read Runyoro - rutooro Bar 14 Bible Online

Bar 14 - Runyoro - rutooro bible

Bar 14

¹Omuntu ow'okwikiriza okuke mumutangirre, baitu mutarukuteezangana empaka ha biteekerezo bye.

²Omuntu omu aikiriza nkooku asobora kulya buli kintu kyona, baitu ondi ow'okwikiriza kuke alya emikubi yonka.

³Ogu arukulya buli kintu aleke kugaya atarukulya buli kintu kandi atarukulya buli kintu nawe aleke kucwera omusango ogu arukubirya; habwokuba Ruhanga amazire kumutangirra.

⁴Niiwe oha arukucwera omuheereza w'ondi omusango? Obu araaba naayemerra rundi naagwa, nikimanywa mukama we wenka. Kandi alikwatirirwa, habwokuba mukama we aina obusobozi obw'okumwemereza.

⁵Omuntu omu, ekiro kimu akyeta kikuru kukira ebindi; kunu ondi, ebiro byona abinganiza. Leka buli omu ayecweremu wenka.

⁶Ogu anyakukuza ekiro, akikuza habw'okuhaisa MUKAMA ekitiinisa. N'ogu anyakulya buli kintu, nawe alya habw'okuhaisa MUKAMA ekitiinisa, habwokuba alya nasiima Ruhanga; n'ogu atalya kintu, akizira habw'okuhaisa MUKAMA ekitiinisa, kandi nawe asiima Ruhanga.

⁷Busaho n'omu ayeyomeeza, kandi busaho ayefeera.

⁸Obu twomeera, twomeezibwa MUKAMA; kandi obu tufa, nabwo tufeera MUKAMA. Nukwo nu, obu twomeera rundi tufa, tuli ba MUKAMA.

⁹Eki nikyo Kristo yaferiire kandi yahumbuuka, nukwo asobole kuba MUKAMA wa boona: aboomiire n'abafiire.

¹⁰Habwaki ocwera mugenzi waawe omusango? Rundi habwaki ogaya mugenzi waawe? Ningira itwena tulyemerra omumaiso g'ekitebe kya Ruhanga ekicwerwaho emisango;

¹¹nkooku kyahandiikirwe kiti: “Mukama agamba ati: Ninyowe Atahwaho, kandi buli muntu alinteereza amaju, orulimi rwa buli omu rulihaisaniza Ruhanga.”

¹²Habweki, buli omu omuli itwe alyetonganirra hali Ruhanga.

¹³Habweki, tutongera kucwerangana emisango, baitu tucwemu kutagaruka kuleetera mugenzi waitu ekyesiitazo rundi ekindi kyona ekirukwekiika omu muhanda gwe.

¹⁴Mmanyire kandi ningumiza kimu omu MUKAMA Yesu nkooku hataroho kintu na kimu eky'omuziro habwakyo; baitu kiba ky'omuziro hali ogu anyakuteekereza ngu, ky'omuziro.

¹⁵Iwe eki orukulya, obu kiraaba nikikora kubi mugenzi waawe, obu muba mutakyagonzangana. Otaikiriza eki orukulya kuhwerekereza ogu Kristo ou yaferiire.

¹⁶Nahabweki, iwe eki orukweta kirungi otakireetereza okugambwaho kubi.

¹⁷Habwokuba obukama bwa Ruhanga tibiri byokulya rundi byokunywa, baitu nukwo okuhikirra, okuteekaana, n'okusemererwa oku tuheebwa Mwoyo Ahikiriire.

¹⁸Ogu anyakuheereza ati Kristo, nuwe asemeza Ruhanga kandi asiimwa abantu.

¹⁹Hati nu, ka twekambire ebireeta obusinge n'ebirukwombeka ekitebe ky'abaikiriza.

²⁰Muleke kusiisa omulimo gwa Ruhanga habw'ebyokulya. Mazimakwo ebintu byona birungi, baitu ekibi nukwo omuntu okusiitaza abandi habw'eki arukulya.

²¹Haakire okutalya nyama, rundi okutanywa marwa, rundi okutakora kintu kyona ekirukwesiitaza mugenzi waawe.

²²Okwikiriza oku oinakwo, oikale nakwo nikumanywa iwe na Ruhanga. W'omugisa ogu atarukwetuntuza obu aba naakora ebi arukuteekereza ngu bihikire.

²³Baitu ogu anyakugurukyagurukya, kakuba alya, omusango gwamusinga; habwokuba eki akora takikora habw'okwikiriza; ningira kyona ekitaruga omu kwikiriza kiba kibi.