Read Runyoro - rutooro Bar 15 Bible Online

Bar 15 - Runyoro - rutooro bible

Bar 15

¹Itwe abaina amaani, tusemeriire okugumiisiriza obuceke bw'abataina maani, tutarukuserra eby'okwesemeza itwenka.

²Leka buli omu omuli itwe aserre ebirukusemeza mutaahi we habw'okumugasira n'okumugumya.

³Habwokuba Kristo ataserre ebirukumusemeza wenka; baitu nkooku kyahandiikirwe kiti: “Ebijumo by'abo abaakujumire, bikahikaho nyowe.”

⁴Byona ebyahandiikirwe ira, bikahandiikwa kutwegesa, nukwo tutunge okunihira habw'okugumibwa n'okwekambisibwa Ebihandiiko ebi ebirukwera.

⁵Ruhanga, endugirro y'amaani gaitu kandi anyakutwekambisa, abahe okwikarana mwina omutima gumu, nimusisana Kristo Yesu.

⁶Nukwo inywena hamu musobole kunyumiza Ruhanga, Ise MUKAMA waitu Yesu Kristo, n'iraka limu.

⁷Habweki mujwahukirrangane nka Kristo oku yabajwahukiriire, nukwo Ruhanga aheebwe ekitiinisa.

⁸Nyowe nimbagambira nti: Kristo akafooka muheereza w'abasazirwe, abanze ayoleke amazima ga Ruhanga, naagenderra kugumya ebyaraganiziibwe baisenkuru itwe,

⁹nukwo hanyuma asoboze Abanyamahanga kuhaisaniza Ruhanga habw'embabazi ze, nkooku kyahandiikirwe kiti: “Habweki ndikuhaisaniza omu Banyamahanga, kandi nzine eby'okukukugiza.”

¹⁰Handi kigamba kiti: “Inywe Abanyamahanga mukyanganuke hamu n'abantu be”;

¹¹Kandi kiti: “Muhaisanize Atahwaho Abanyamahanga inywena, n'abantu boona bamuhaisanize.”

¹²Na Isaaya ayongera ati: “Omwijukuru wa Yese aliija, aliimuka okulema Abanyamahanga; kandi Abanyamahanga nuwe baligiramu obwesige.”

¹³Ruhanga endugirro y'okunihira kwaitu abaijuze omuhimbo gwona n'obusinge ebireetwa okwikiriza, nukwo habw'obusobozi bwa Mwoyo Ahikiriire, okunihira kwanyu kusaagane muno.

¹⁴Bagenzi bange, mmanyiire kimu inywena nkooku mwijwire engeso nungi, nimwetegerereza kimu, kandi nimusobora n'okuhaburangana.

¹⁵Baitu haroho ebintu ebimu ebi mbahandiikiire n'obumanzi, mbandiize kubaijukya embabazi Ruhanga ezi yangiriire

¹⁶nkooku zaanfoire muheereza wa Kristo Yesu hali Abanyamahanga. Kandi obuheereza obu mbakorra, nukwo kurangirra Amakuru Amarungi aga Ruhanga. Abanyamahanga nabo basobole kufooka kyonzira ekirukusiimwa Ruhanga, kimazire kwezibwa Mwoyo Ahikiriire.

¹⁷Nahabweki omu Kristo Yesu nyina eki ndukusigikiraho okwenyumiza habw'omulimo gwange ogu nkorra Ruhanga.

¹⁸Habwokuba tindikisura okubazaaho ekindi kyona, okwihaho Kristo ebi yakoliire omuli nyowe okuleetera Abanyamahanga okworobera Ruhanga omu bigambo byange n'omu bikorwa byange,

¹⁹habw'amaani g'ebihuniriza n'ebyamahano ebyakozirwe, na habw'amaani ga Mwoyo Ahikiriire. Nikyo narangiririire kimu Amakuru Amarungi aga Kristo okuruga Yerusaalemu okuhikira kimu Iliiriko.

²⁰Eki naayendaga muno nukwo kurangirra Amakuru Amarungi, hatali omu biikaro nambere ibara lya Kristo lyagambirweho, ntaliikara kwombeka ha musingi ogw'omuntu ondi,

²¹baitu kibe nkooku kyahandiikirwe kiti: “Balirora ou batakagambirwahoga, kandi balyetegereza ou batakahurrahoga.”

²²Eki nikyo kyantangire okwija owanyu buli kasumi.

²³Baitu hati nkooku ntakyaina h'okukora omulimo omu bicweka binu, kandi nkooku mmazire emyaka nyingi nyina ekihika kwija kubarora,

²⁴ninihira kubarora obu ndiba nindabaho okugenda Sipaini, nkamara na inywe ebiro bike, nukwo mumboherre omu rugendo rwange.

²⁵Baitu hati ninyija kugenda Yerusaalemu, nintwarra abantu ba Ruhanga eby'okubakoonyera.

²⁶Habwokuba aba Makedoni n'ab'Akaaya bakaikiriza okusorooza ebintu eby'okukoonyera abanaku abali omu baikiriza ba Yerusaalemu.

²⁷Eki bakakikora n'okusemererwa, kandi mazimakwo babainaho ibanja. Abanyamahanga obu baraaba babagaine n'Abayudaaya ha birungi byabo eby'omwoyo, nabo basemeriire kubakoonyera n'ebintu byabo eby'omubiri.

²⁸Obu ndimara eki, mmazire n'okubaha ebyasoroziibwe, ndibarabaho ningenda Sipaini.

²⁹Nimmanya obu ndibahikaho, ndiija nyina emigisa yoona eya Kristo.

³⁰Bagenzi bange, nimbeesengereza habwa MUKAMA waitu Yesu Kristo, na habw'engonzi za Mwoyo, mwekambe hamu na nyowe munsabire hali Ruhanga,

³¹nukwo ntabuke abataikiriza abali Buyudaaya, kandi ebyokukoonyera ebi ndukutwara Yerusaalemu bisiimwe abarukwera.

³²Nukwo Ruhanga obu alisiima, nsobole kwija owanyu n'omuhimbo, kandi ngarukwemu amaani obu ndiba ndi na inywe.

³³Ruhanga, endugirro y'obusinge, aikale na inywe inywena. Amiina.