Read Runyoro - rutooro Bar 2 Bible Online

Bar 2 - Runyoro - rutooro bible

Bar 2

¹Muntu iwe, noobu oraaba noosisa ota, toina ky'okwekwasa kyona obu ocwera mugenzi waawe omusango. Obu omucwera omusango, oba noogwesingisa wenka, habwokuba iwe kicwa, ebintu ebi orukukora nibyo bimu mali.

²Tumanyire Ruhanga nkooku ahikya okusingisa omusango abantu abakora ebibi nk'ebi.

³Muntu iwe, obu ocwera omusango abo abakora ebintu nk'ebi, kandi kunu na iwe nibyo orukukora, noogira ngu, olitabuka encwa ya Ruhanga?

⁴Rundi noogaya embabazi ze enyingi, okugumiisiriza kwe n'obukwata-mpora bwe? Tomanyire embabazi za Ruhanga nkooku zikuleetera okwegarukamu?

⁵Baitu habw'okukadadara n'okuteegarukamu okw'omutima gwawe, nooyeyahurra ekifubiro ekiribaho ha kiro kiri, nambere encwa ya Ruhanga ey'amananu eryolekerwa.

⁶Habwokuba alisasura buli muntu naarorra ha bikorwa bye.

⁷Abo abagonza kutunga ekitiinisa, okusiimwa, n'okutafa, nibagumiisiriza omu kukora ebirungi, Ruhanga alibaha obwomeezi obutahwaho.

⁸Abandi ab'empaka kandi abatoorobera mazima, baitu aboorobera obubi, alibooleka ekiniga n'obukaya.

⁹Buli muntu anyakukora ebibi alihikwaho omuhito n'enaku nyingi, okubandiza ha Muyudaaya okuhika na ha Mugiriiki.

¹⁰Baitu weena anyakukora ebirungi aliheebwa ekitiinisa, alisiimwa, kandi alitunga obusinge, okubandiza ha Muyudaaya okuhika na ha Mugiriiki,

¹¹habwokuba Ruhanga tasoroora.

¹²Boona abasiisire batarukumanya Biragiro, balihwerekerra batarukujunaanirwa ha Biragiro. Kandi boona abaasiisire nibamanya Ebiragiro, omu Biragiro numwo balicwererwa omusango.

¹³Abanyakuhurra Ebiragiro kwonka, tibali bo bahikiriire omumaiso go Ruhanga, baitu abanyakukora Ebiragiro ebi bigamba, nubo balyetwa bahikiriire.

¹⁴Abanyamahanga abataina Biragiro, obu baraaba bakora Ebiragiro ebi bigamba habw'amagezi gaabo, bbo bonka beefookera bakwasi b'Ebiragiro, noobu baraaba bataina Biragiro.

¹⁵Booleka Ebiragiro ebi birukuragira nkooku bihandiikirwe omu mitima yabo. Emitima yabo nayo eba neekigumya, kandi ebiteekerezo byabo ebitarukwikirraniza biba nibibanyegerra rundi nibibaihaho omusango

¹⁶ha kiro eki nambere Ruhanga alicwerraho abantu omusango gw'ebi baakozire omu nsita, naaraba omu Kristo Yesu, nkooku kisangwa omu Makuru Amarungi aganatumirwe kurangirra.

¹⁷Baitu iwe obu oraaba nooyeyeta Muyudaaya, nooyesiga Ebiragiro nooyenyumiza kuba wa Ruhanga

¹⁸noomanya ebi arukwenda kandi noosiima ebirukukira oburungi, habw'okwegesibwa Ebiragiro,

¹⁹iwe obu oraaba noogumya nkooku oli munanasi w'abafu b'amaiso, noomulikira abo abali omu mwirima,

²⁰muhabuzi w'abataina magezi, mwegesa w'abaana, habwokuba noomanya amagezi n'amazima agali omu Biragiro,

²¹kandi iwe anyakwegesa abandi, toyeyegesa? Iwe anyakuteererra abantu okutaiba, oiba?

²²Iwe anyakutanga abandi kusiihana, osiihana? Iwe anyakunuga embandwa, onyaga ota ebiri omu mabandiro?

²³Iwe anyakwenyumiriza omu Biragiro, ogaya ekitiinisa kya Ruhanga noocwa Ebiragiro?

²⁴Habwokuba kikahandiikwa kiti: “Ibara lya Ruhanga nirijumwa omu Banyamahanga habwanyu.”

²⁵Kyamazima okusarwa nikugasa obu oraaba noohikiriza Ebiragiro; baitu obu orukucwa Ebiragiro, okusarwa kwawe kusisana n'okutasarwa.

²⁶Nukwo nu omuntu atasazirwe, kakuba ahikiriza Ebiragiro ebi birukugamba, noobu araaba atasazirwe, baitu talibarwa nk'asazirwe?

²⁷Habweki, abo abatasazirwe mubiri baitu nibahikiriza Ebiragiro, balisingisa omusango inywe abarukucwa Ebiragiro kandi kunu mwina ebyahandiikirwe omu Biragiro kandi musazirwe.

²⁸Habwokuba Omuyudaaya nyakabara tali ogu arukurorwa ha bya haruguru, n'okusarwa kw'amazima tikiri kintu kya haruguru ha mubiri.

²⁹Omuyudaaya nyakabara nuwe Muyudaaya omunda; kandi n'okusarwa okw'amazima kuli omu mutima, kintu ky'omwoyo tikiri ky'Ebiragiro ebyahandiikirwe. Kandi omuntu ogu tasiimwa abantu, baitu asiimwa Ruhanga.