Read Runyoro - rutooro Bar 3 Bible Online

Bar 3 - Runyoro - rutooro bible

Bar 3

¹Hati abandi Omuyudaaya naabakiza ki? Rundi okusarwa kwina mugaso ki?

²Nikigasa muno omu miringo etali emu. Eky'okubanza Abayudaaya nubo baakwasiibwe ebigambo bya Ruhanga.

³Abamu noobu baraaba batarabaire beesigwa, baitu itwe tugambe ki? Obuteesigwa bwabo buratanga Ruhanga kuba mwesigwa?

⁴Nikikafuuhe! Ruhanga aikara ali w'amazima abantu boona noobu baraaba bali banyabisuba, nkooku kyahandiikirwe kiti: “Leka ebigambo byawe byoleke nkooku oli w'amazima, nukwo osinge obu baba nibakucwera omusango.”

⁵Obubi bwaitu obu buraaba nibwoleka obwinganiza bwa Ruhanga, turagamba ki? Ngu Ruhanga tali mwinganiza kutufubira? [Nyowe nimbaza nk'omuntu buntu.]

⁶Naakake konka! Ruhanga obu araaba atali mwinganiza, ensi asobora ata kugicwera omusango?

⁷Ebisuba byange obu biraaba nibyongera kwoleka amazima ga Ruhanga kandi nibimwongera ekitiinisa, habwaki ninkyacwerwa omusango nk'omusiisi?

⁸Habwaki tutakora ebibi nukwo harugemu ebirungi? Abantu abamu nkooku batuhangirra ngu, nukwo twegesa. Abo, omusango gwabo nigubasinga kurungi.

⁹Hati nu tugambe tuta? Itwe Abayudaaya twina eki turukukiza abandi? Nangwa, naakake konka; habwokuba mmazire kugamba ngu, abantu boona, Abayudaaya n'Abagiriiki, balemwa ekibi,

¹⁰nkooku kyahandiikirwe kiti: “Tiharoho ahikiriire, nangwa noobwakuba omu;

¹¹tiharoho arukwetegereza, tiharoho arukuserra Ruhanga.

¹²Boona bakahaba, baasiisikarra hamu, tiharoho arukukora kurungi, nangwa noobwakuba omu.”

¹³“Emimiro yabo bituuro ebyesamiriire, endimi zabu bazibiihisa ebisuba.” “Ebigambo byabo nibisaaliza nk'obusegwe bw'encwera.”

¹⁴“Akanwa kaabo kaikara nikakondereza kandi nikahangirra.”

¹⁵“Ebigere byabo bibanguhya kugenda okuseesa esagama,

¹⁶hoona ha bakagenda bahwerekereza kandi baleeta obujune,

¹⁷kandi omuhanda oguleeta obusinge tibagumanyire.”

¹⁸“Ruhanga tibamutiina.”

¹⁹Hati nitumanya ngu, byona Ebiragiro ebi bigamba, bikwata abo abarukulemwa Ebiragiro, nukwo akanwa koona kabumbwe kandi ensi yoona Ruhanga agicwere omusango.

²⁰Omumaiso ge busaho muntu n'omu alyeetwa muhikiriire habw'okuhikya ebiri omu Biragiro; habwokuba omu Biragiro nuho tumanyira ekibi.

²¹Baitu hati Ruhanga ayolekere obuhikiriire obutarukuruga omu Biragiro, kandi Ebiragiro n'abarangi nibabijurra.

²²Nubwo obuhikiriire Ruhanga obu aha abo abarukwikiriza Yesu Kristo, kandi obuheebwa boona abamwikiriza. Habwokuba busaho mbaganizo:

²³ningira boona bakasiisa, balemwa kuhika ha kitiinisa kya Ruhanga,

²⁴baitu habw'embabazi ze bakaheerwa busa obuhikiriire, Kristo Yesu obu yatucungwire.

²⁵Nuwe ogu Ruhanga ou yahaireyo ali ndehwa, aseese esagama ye kuleherra abamwikiriza. Eki akakikora nukwo ayoleke obuhikiriire bwa Ruhanga, ayagumiisirize naayebwa ebibi ebyakozirwe ira;

²⁶nukwo omu busumi bunu tumanye nkooku ahikiriire, kandi ahikiriza weena anyakwikiriza Yesu.

²⁷Hati okwenyumiza kwaitu nikugasa ki? Kwa busa. Habwaki? Nikusigikira ha bikorwa byaitu? Nangwa, baitu ha kwikiriza kwaitu.

²⁸Itwe nitugumya tuti: Okwikiriza nukwo kuhikiriza omuntu, baitu tikuli kukora ebirukuragirwa Ebiragiro.

²⁹Obu, Ruhanga aba Ruhanga w'Abayudaaya bonka? Kandi tali Ruhanga w'Abanyamahanga? Ego, nabo wabo.

³⁰Ruhanga nkooku ali omu, aliha abasazirwe obuhikiriire habw'okwikiriza kwabo, n'abatasazirwe abubahe habw'okwikiriza kwabo.

³¹Hati nu Ebiragiro turabidibya habw'okwikiriza kunu? Nikikafuuhe! Baitu tubigumye bugumya.