Read Runyoro - rutooro Bar 4 Bible Online

Bar 4 - Runyoro - rutooro bible

Bar 4

¹Hati nu turagamba ki hali Abburahamu, isenkuru itwe ow'omubiri?

²Abburahamu obu araaba yahikiriziibwe ebi yakozire, yakubaire n'eky'okwenyumirizaaho; baitu ateenyumize omumaiso ga Ruhanga.

³Kandi Ebyahandiikirwe nibigamba ki? Nibigira biti: “Abburahamu akaikiriza Ruhanga, eki kikamuhaisa obuhikiriire.”

⁴Ningira omusaara gw'omuntu anyakukora omulimo tigwetwa kisembo, gwetwa ibanja eri asemeriire kusasurwa.

⁵Baitu ogu atarukwesiga ebi arukukora, kyonka naayesiga Ruhanga anyakweza n'abo abatamutiina, okwikiriza kwe kwetwa buhikiriire.

⁶Daudi nawe nukwo ahaisaniza ati omugisa oguheebwa omuntu Ruhanga ou ayeta muhikiriire, kandi kunu ataina ebi akozire, naagamba ati:

⁷“B'omugisa abo abaganyirwa ensobi zaabo, kandi bakaihwaho ebibi byabo!

⁸W'omugisa omuntu MUKAMA ou atalibarra bibi bye.”

⁹Omugisa gunu guba gw'abasazirwe bonka, rundi n'abatasazirwe? Itwe tugamba tuti: Okwikiriza kwa Abburahamu kukamwesa muhikiriire.

¹⁰Eki kikabaho di? Amazire kusarwa rundi atakasazirwe? Kitamwese muhikiriire amazire kusarwa nangwa, baitu atakasazirwe.

¹¹Okusarwa kwe kakaba karorwaho ak'okugumya obuhikiriire obu yatungire habw'okwikiriza atakasazirwe. Ekyagenderiirwe nukwo kumufoora isenkuru boona abaikiriza batasazirwe, nabo bakabarwa kuba bahikiriire.

¹²Kandi abe isenkuru w'abasazirwe, abatagarukiire ha kusarwa kwonka baitu abahondera ekirale eky'okwikiriza, isenkuru-itwe Abburahamu oku akaba ainakwo atakasazirwe.

¹³Ruhanga okuraganiza Abburahamu n'abaijukuru be nkooku baligweterwa ensi, kutaruge omu kuhikya Ebiragiro, baitu kukaruga omu buhikiriire obu baahairwe habw'okwikiriza kwabo.

¹⁴Abakwasi b'Ebiragiro obu baraaba bali nubo b'okugwetwa, buli okwikiriza tikwina mugaso, n'okuraganiza oku kwa busa.

¹⁵Ningira Ebiragiro bimanyisa abantu, Ruhanga nkooku ali w'obukaya, kandi Ebiragiro nambere bitali, tihabaho n'okubicwa.

¹⁶Nikyo obuhikiriire burugira omu kwikiriza, nukwo ebyaraganiziibwe bisigikire ha mbabazi za Ruhanga, biheebwe abaijukuru ba Abburahamu boona-tibali bakwasi b'Ebiragiro bonka, baitu n'abo abaikiriza nk'Abburahamu; habwokuba nuwe isenkuru itwe itwena,

¹⁷nkooku kyahandiikirwe kiti: “Nkufoire isenkuru amahanga maingi.” Eki Abburahamu akakiraganizibwa Ruhanga ou yaikiriize, nuwe Ogu anyakuhumbuura abafu kandi anyakuhanga ebintu ebikaba bitaroho.

¹⁸Abburahamu akaikiriza, naanihira ebitakunihiirwe ngu, alifooka isenkuru amahanga maingi, nkooku yagambiirwe ati: “Abaijukuru baawe nukwo baliba baingi bati.”

¹⁹Noobu yarozire ahoireyo, habwokuba akaba ahikize emyaka nka kikumi ey'obukuru, kandi yarora mukazi we Saara ali ngumba, baitu ebi bitamugaruukirize omu kwikiriza.

²⁰Atagurukagurukye eki Ruhanga yamuraaganiize, baitu akeeyongera okugumira omu kwikiriza kwe, naahaisaniza Ruhanga,

²¹ananukiire kimu nkooku Ruhanga akaba naasobora kukora eki yaraganiize.

²²Nikyo okwikiriza kwe “kwamweseze muhikiriire.”

²³Baitu ebigambo ebirukugamba biti: “Kukamwesa muhikiriire”, bitahandiikwe habwe wenka,

²⁴baitu bikahandiikwa na habwaitu. Na itwe tulyetwa bahikiriire: itwe abaikiriza Ogu ayahumbwire Yesu MUKAMA waitu omu bafu.

²⁵Yesu ogu ayaisirwe habw'ebibi byaitu kandi yahumbuurwa, nukwo atwegarukanganisemu na Ruhanga.