Read Runyoro - rutooro Bar 5 Bible Online

Bar 5 - Runyoro - rutooro bible

Bar 5

¹Nahabweki, nkooku tuhikirizibwa okwikiriza, twina obusinge na Ruhanga habwa MUKAMA waitu Yesu Kristo,

²ou twarabiremu okuhika ha mbabazi zinu ezi turumu. Nikyo turukukyanganukira, nitunihira okubagana ha kitiinisa kya Ruhanga.

³Kandi tikiri eki kyonka, baitu nitukyanganuka n'omu kusaasa kwaitu, nitumanya omu kusaasa nkooku harugamu okugumiisiriza;

⁴omu kugumiisiriza harugamu obumanzi, kandi obumanzi burugwamu okunihira.

⁵Kandi itwe titurukunihirra busa, habwokuba Mwoyo Ahikiriire ou twahairwe, akaseesa engonzi za Ruhanga omu mitima yaitu.

⁶Obu tukaba tukyali baceke, akasumi konyini obu kaahikire, Kristo akatufeera, itwe abatatiina Ruhanga.

⁷Weza, nikiremeera omuntu kufeera ahikiriire. Rundi kwikiriza kwehayo habw'ow'engeso nungi.

⁸Baitu omuli eki, Ruhanga nuho ayolekera nkooku atugonza, habwokuba obu tukaba tukyali basiisi, Kristo akatufeera.

⁹Hati nu, nkooku tweziibwe esagama ye, alitujunira kimu okufubirwa Ruhanga.

¹⁰Habwokuba obu tukaba tukyali banyanzigwa ba Ruhanga, tukagarukanganamu nawe habw'okufa kw'Omwana we. Hati, obu twagarukangainemu, obwomeezi bwo tibuliikiraho kutujuna.

¹¹Tikiri eki kyonka, baitu nitwesiima omu Ruhanga habwa MUKAMA waitu Yesu Kristo ayatugarukanganiisizemu.

¹²Habweki ekibi nkooku kyaizire omunsi habw'omuntu omu, kandi kyaleeta okufa; nukwo orufu rwahikire ha bantu boona, habwokuba boona bakasiisa.

¹³Mazima ebibi bikaba biri omunsi Ebiragiro bitakatairweho; baitu mbere hatali Biragiro, ebi bakora tibyetwa bibi.

¹⁴Kandi orufu rwalemaga abantu okuruga hali Adamu okuhika hali Musa; nangwa rwalemaga n'abatarasiisire, Adamu nkooku yasiisire. Kandi Adamu ogu akaba ali kisisani ky'ogu ow'akaba ali w'okwija.

¹⁵Baitu ekisembo Ruhanga eki agabira busa tikisisana kibi kya Adamu. Habwokuba ekibi ky'omuntu omu, obu kiraaba kyaleetiire baingi okufa, baitu embabazi za Ruhanga n'ekisembo ekiheriirwe busa eky'omuntu omu Yesu Kristo tibyakukizire muno kubaleetera omugaso?

¹⁶Kandi ekisembo eki ekya busa tikirukusisana n'ebyarugire omu kibi ky'omuntu ogu omu. Ningira omusango ogwacwirwe habw'ekibi eki ekimu, gukarugwamu okusingwa; baitu ekisembo ekya busa, ekigabwa abantu bamazire kukora ebibi bingi, kiihaho omusango.

¹⁷Orufu obu ruliba rwalemere habw'ekibi ky'omuntu ogu omu, abo abagirirwa embabazi ezihinguraine, kandi abaheriirwe busa ekisembo eky'obuhikiriire, balikira muno kulema omu bwomeezi obw'ebiro n'ebiro habw'omuntu ali omu Yesu Kristo.

¹⁸Ekibi ky'omuntu omu nkooku kyasingisize abantu boona omusango, n'ekikorwa ekihikiire kimu ky'omuntu omu nukwo kyaihireho boona omusango, nikibatungisa obwomeezi.

¹⁹Ningira abaingi nkooku baafookere basiisi habw'obutahurra bw'omuntu omu, n'abaingi nukwo baliba bahikiriire habw'obuhulizi bw'omuntu omu.

²⁰Ebiragiro obu byaizire, bikakanyisa emisango; baitu emisango ha yayeyongiire kukanya, nuho n'embabazi za Ruhanga zaakizire kukanya muno.

²¹Habweki, ekibi nkooku kyalemere nikireeta orufu, n'embabazi za Ruhanga nazo nukwo irirema niireeta obuhikiriire, niihikya abantu omu bwomeezi obutahwaho habwa Yesu Kristo MUKAMA waitu.