Read Runyoro - rutooro Bar 6 Bible Online

Bar 6 - Runyoro - rutooro bible

Bar 6

¹Hati tugambe ki? Twikale nitusiisa, nukwo embabazi za Ruhanga ikanye?

²Nikikafuuhe! Itwe abaarugire mu bibi tusobora tuta kugaruka kubiikaramu?

³Timurukumanya itwe itwena abaabatiziibwe omu Kristo Yesu tukafa, nkooku twabatiziibwe nukwo tufe nawe?

⁴Habweki obu twabatiziibwe tukafa, twaziikwa hamu nawe; nukwo Kristo nkooku yahumbwirwe omu bafu habw'ekitiinisa kya Ise, na itwe tusobole okugendera omu bwomeezi obuhyaka.

⁵Obu turaaba twateeraniziibwe nawe omu kufa nk'okwe, mazima tuliteeranizibwa nawe omu kuhumbuuka nk'okwe.

⁶Tumanyire engeso zaitu eza ira nkooku zaabambirwe hamu nawe ha musaraba, nukwo omubiri ogukora ebibi guhwerekerre; na itwe tuleke kugaruka kulemwa ebibi obundi.

⁷Ningira ogu ayafiire, aba atakyalemwa bibi.

⁸Na itwe obu turaaba twafiire hamu na Kristo, nitwikiriza nkooku tulyomeera hamu nawe.

⁹Habwokuba nitumanya Kristo obu yakahumbwirwe omu bafu, taligaruka kufa; n'orufu tirukyamulema.

¹⁰Okufa oku yafiire, akafa ha kibi omurundi gumu, yamara; baitu obwomeezi obu aina, naayomezibwa Ruhanga.

¹¹Nukwo na inywe mwebale nk'abaarugire omu bibi, kandi abarukwomeera omu Ruhanga habwa Kristo Yesu.

¹²Habweki mutaikiriza bibi kulema emibiri yanyu enyakufa, mukatwalirizbwa okwegomba kwayo.

¹³Engingo ez'emibiri yanyu mutaziikiriza kukora ebibi, mukaifoora bintu eby'okubakoza ebibi, baitu mwehe Ruhanga nk'abantu abaihirwe omu kufa, baataahibwa omu bwomeezi; kandi engingo zanyu muzihe Ruhanga nk'ebintu eby'okubakoza ebirungi.

¹⁴Ebibi tibiribalema, habwokuba timurukulemwa Biragiro, baitu nimulemwa embabazi za Ruhanga.

¹⁵Nukwo kugamba, twikalege nitusiisa, habwokuba titurukulemwa Biragiro baitu embabazi za Ruhanga? Nikikafuuhe!

¹⁶Kinu nakyo timurukukimanya? Kakuba nimweha omuntu nk'abairu abahurra, muba kwo bairu b'ogu ou muhurra: rundi bairu b'ekibi ekitwara omu kufa, rundi bairu b'obuhulizi obuhikya ha kwezibwa.

¹⁷Baitu Ruhanga asiimwe, habwokuba inywe, ira abakaba bali bairu b'ekibi, hati mufookere bahulizi n'omutima gwona, mwahika ha rulengo orw'enyegesa ei mwahairwe,

¹⁸kandi obu mwaihirwe omu bibi, mwaffoka bairu b'obuhikiriire.

¹⁹Nimbaza nk'omuntu buntu, habw'obuceke bw'obuhangwa bwanyu. Habwokuba engingo zanyu ira nkooku mwazikoleze eby'ensoni n'obubi obuhinguraine, hati nu muzite ha buhikiriire obuleeta okwezibwa.

²⁰Obu mukaba muli bairu b'ebibi, mukaba mutaina bukwatane n'eby'obuhikiriire.

²¹Baitu nu, karungi ki aka mwaihire omu bintu ebirukubakwasa ensoni biro binu? Ekiruga omu bintu ebi nukwo kufa.

²²Baitu hati nkooku mwihirwe omu bibi, mwafooka bairu ba Ruhanga, oburungi obu murukutunga nukwo okwezibwa, kandi ekiruga omu kwezibwa oku nubwo bwomeezi obutahwaho.

²³Habwokuba empeera y'ebibi, nukwo kufa; baitu ekisembo Ruhanga eki agabira busa, nubwo bwomeezi obutahwaho omu Kristo Yesu MUKAMA waitu.