Read Runyoro - rutooro Bar 7 Bible Online

Bar 7 - Runyoro - rutooro bible

Bar 7

¹Beene baitu, timurukumanya Ebiragiro nkooku birema omuntu akyali mwomeezi? Nimbaliza abo abarukumanya Ebiragiro.

²Nukwo kiti, omukazi omuswerwa, Ekiragiro kimuboha hali iba obu aba akiri mwomeezi; baitu iba obu afa, nubwo asumururwa ha Kiragiro eki.

³Nukwo nu, kakuba aswerwa omusaija ondi, kunu iba akiri mwomeezi, obu ayetwa musiihani. Baitu kakuba iba afa, buli takyalemwa Kiragiro eki; kandi kakuba aswerwa omusaija ondi, tayetwa musiihani.

⁴Na inywe bagenzi bange, nukwo mwafiire muti ha Biragiro omu mubiri gwa Kristo, mutungwe ondi ayahumbwirwe omu bafu, kandi itwena tusobole kukorra Ruhanga ebirungi.

⁵Obu tukaba nitukyahondera eby'omubiri, okwegomba kwaitu okubi okwasisiimurwaga Ebiragiro kwakorraga omu ngingo zaitu, nukwo tukole ebibi ebireeta orufu.

⁶Baitu hati tukaihwaho Ebiragiro, tumazire kuleka ebi ebyatwikaize omu bwiru, nukwo tuheereze tutarukuhondera Ebiragiro ebyahandiikirwe ira, baitu nituheereza twina bwomeezi obuhyaka obuleetwa Mwoyo Ahikiriire.

⁷Hati nu tugambe ki? Tuti: Ebiragiro nibyo bireeta ebibi? Mahano! Kakuba bitarabaire Biragiro, ebibi tinkubimanyire. Kakuba Ebiragiro bitaragambire biti: “Otalyegomba kubi”, tinakusoboire kumanya ekyetwa okwegomba okubi.

⁸Baitu ebibi obu byataahiriire omu Kiragiro eki, byanyimukyamu okwegomba okw'emiringo yoona. Nambere hatali Biragiro, buli ebibi biba bifiire.

⁹Nyowe kara nkaba ndi mwomeezi hataroho Biragiro; baitu Ebiragiro obu byaizire, ebibi byanjunaanwa, nyowe naafa.

¹⁰Ekiragiro eki ekikaba kiri ky'okundeetera obwomeezi, kikandugiramu orufu.

¹¹Habwokuba ebibi obu byataahiriire omu Kiragiro, bikangobeza kandi byanyitira omu Kiragiro eki.

¹²Habweki, Ebiragiro nibyera, n'Ekiragiro ky'okuteegomba kubi nakyo nikyera, nibihika kandi birungi.

¹³Hati nu, ebirungi nibyo byanyisire? Nangwa! Ebibi nibyo byanyisire nibiraba omu birungi nukwo ebibi bizooke nkooku biri bibi, kandi habw'okutaahirra omu Kiragiro, bihinguraniire kimu obubi.

¹⁴Tumanyire Ebiragiro nkooku biri by'omwoyo; baitu nyowe ndi w'omubiri, ayaguliirwe omu bwiru bw'ebibi.

¹⁵Ebikorwa byange byonyini tindukubyetegereza. Habwokuba ebi ngonza, tibiri nibyo nkora; baitu ekintu kyonyini eki nnoba, nikyo nkora.

¹⁶Hati nu, obu ndaaba ninkora ebi ntarukugonza, buli ninyikiriza Ebiragiro nkooku birukwetaagwa.

¹⁷Nahabweki, takyali nyowe arukubikora, baitu nibikorwa ebibi ebiikara omuli nyowe.

¹⁸Habwokuba mmanyire omuli nyowe nkooku hatarumu karungi na kamu, nukwo kugamba: omu mubiri gwange. Noobu ngonza kukora ebihikire, baitu ndemwa kubikora.

¹⁹Ebirungi ebi ngonza, timbikora; baitu ebibi ebi ntagonza, nibyo nkora.

²⁰Habweki, obu ndaaba nkora ebi ntagonza, takyali nyowe anyakubikora, baitu bikorwa ebibi ebinyakwikara omuli nyowe.

²¹Na nyowe nsanga kinu kinfookiire kiragiro. Obu ngonza kukora ebihikire, ebibi bimba haihi.

²²Habwokuba omu mutima gwange ninsiima Ebiragiro bya Ruhanga,

²³baitu omu ngingo zange nimpurramu ekiragiro ekindi, ekirukurwanisa ekiragiro ekiri omu mutima gwange, nikinfoora munyankomo w'ekiragiro ky'ebibi ebiikara omu ngingo zange.

²⁴Imira nyowe! Ka mboine! Omubiri gunu ogw'okufa, nooha aligunjuna?

²⁵Ruhanga asiimwe arukutujunira omu Yesu Kristo MUKAMA waitu! Hati nu, nyowe habwange nkwata Ebiragiro bya Ruhanga n'amagezi gange, baitu omu mubiri gwange mpondera ekiragiro ky'ebibi.