Read Runyoro - rutooro Bar 8 Bible Online

Bar 8 - Runyoro - rutooro bible

Bar 8

¹Aho nu, abo abali omu Kristo Yesu, tibakyaina musango hati.

²Habwokuba ebihaburo ebya Mwoyo Ahikiriire anyakuleeta obwomeezi oburukuraba omu Kristo Yesu bikambohorra ha kiragiro ky'ebibi n'orufu.

³Habwokuba Ebiragiro, ebi bitarasoboire kukora habw'obuceke bw'omubiri, Ruhanga akabikora naatuma Omwana we nyabwe aina omubiri nk'ogwaitu ogukora ekibi, gube kyonzira habw'ekibi. Kandi omu mubiri ogu nuho ekibi yakisingisiize omusango.

⁴Nukwo tuhikiririze kimu Ebiragiro ebi birukuragira, itwe abatahondera eby'omubiri, baitu abahondera ebya Mwoyo.

⁵Abo abahondera eby'omubiri, emitima yabo bagita ha by'omubiri, baitu abo abahondera ebya Mwoyo, emitima yabo bagita ha bya Mwoyo.

⁶Okuta omutima ha by'omubiri kurugwamu okufa; baitu okuta omutima ha bya Mwoyo kurugwamu obwomeezi n'obusinge.

⁷Habwokuba omutima oguhondera ebi omubiri gugonza, guba munyanzigwa wa Ruhanga; tigworobera Biragiro bya Ruhanga, mazimakwo tigusobora.

⁸Kandi abo abalemwa omubiri tibasobora kusiimwa Ruhanga.

⁹Baitu Mwoyo wa Ruhanga obu araaba naikara kwo omuli inywe, timuli omu mubiri, baitu omu Mwoyo. Weena ataina Mwoyo wa Kristo, ogu tali muntu we.

¹⁰Kristo obu araaba ali omuli inywe, buli omubiri gufiire habw'ebibi, baitu omwoyo gwawe gwomeezibwa habw'obuhikiriire.

¹¹Mwoyo w'Ogu ayahumbwire Yesu omu bafu, obu araaba naikara omuli inywe, Ogu ayahumbwire Yesu, alyomeeza n'emibiri yanyu enyakufa, habwa Mwoyo we anyakwikara omuli inywe.

¹²Nukwo nu beene baitu, twina ibanja eritali ly'omubiri, ngu tukuraatire eby'omubiri

¹³obu muraaba nimukuraatira eby'omubiri mulifa; baitu obu muraaba nimucwa ebikorwa ebibi by'omubiri habwa Mwoyo Ahikiriire, mulyomeera.

¹⁴Ningira boona abeebemberwa Mwoyo wa Ruhanga, baba baana ba Ruhanga.

¹⁵Na inywe mutaheebwe mutima ogw'obwiru ogw'okubagarra omu butiini; baitu mukaheebwa Mwoyo Ahikiriire ayabafoire baana, anyakutugambisa ati: “Abba, Isiitwe!” [1]

¹⁶Mwoyo ogu wonyini nuwe arukutumanyisa hamu n'omutima gwaitu, nkooku tuli baana ba Ruhanga.

¹⁷Kandi obu turaaba tuli baana, buli tuli bagwetwa. Bagwetwa ba Ruhanga abagweterwa hamu na Kristo, kakuba tubona emihito hamu nawe, nukwo tusobole kuheebwa ekitiinisa hamu nawe.

¹⁸Ninteekereza nti: Emihito y'akasumi kanu tesemeriire kulengesanizibwa n'ekitiinisa eki tulisuukulirwa.

¹⁹Habwokuba ebihangwa byona biikara bitegeriize n'ekihika okwolekwa kw'abaana ba Ruhanga.

²⁰Ningira ebihangwa eby'omunsi bikaba bitakusobora kukora nkooku byakwegondiize; hatali habwabyo, baitu habw'Ogu ayabitegekere ati nukwo biikale bitegeriize ebiriija.

²¹Habwokuba ebihangwa ebi nabyo birisumururwa omu bwiru obw'okujunda, bitunge obugabe obw'ekitiinisa obw'abaana ba Ruhanga.

²²Nitumanya ebihangwa byona nkooku biikara nibisinda kandi nibisaasa nk'ebirukurumwa kuzaara okuhika na hati.

²³Tibiri bihangwa byonka, baitu na itwe abaahairwe Mwoyo nk'omuganuro ogw'okubanza, nitusinda omu nda yaitu, tutegeriize kuhindurwa baana, nubwo emibiri yaitu yoona ericungurwa.

²⁴Kandi okunihira oku nukwo twajuniirwemu. Ningira okunihira ebirukurorwa, oku tikuba kunihira kwo. Nooha anihira ebi arukurora?

²⁵Baitu obu turaaba nitunihira ebi tutarukurora, mazimakwo tubitegereza tugumire.

²⁶Mwoyo nukwo atukoonyere ati mu buceke bwaitu; habwokuba titumanyire kusaba nkooku tusemeriire; baitu Mwoyo wenka atutonganirra hali Ruhanga, naasinda omu mulingo ogutagambwa.

²⁷Ogu anyakwekebiija emitima y'abantu naamanya Mwoyo ebi arukugenderra; habwokuba Mwoyo atonganirra abantu be, Ruhanga nkooku arukusiima.

²⁸Tumanyire ngu, omu buli kintu Ruhanga eki akora, agenderramu oburungi bw'abo abamugonza, abeetwa entegeka ye nkooku eri.

²⁹Habwokuba abo aba yamanyire ira, batakabaireho, nubo yakomere basisane Omwana we, nukwo Omwana asobole kuba muzigaijo omu bagenzi be abaingi.

³⁰Kandi abo aba yakomere batakabaireho, nubo yayesire; n'abo aba yayesire, nubo yahaire obuhikiriire; n'abo aba yahaire obuhikiriire, nubo yahaisize ekitiinisa.

³¹Hati nu, ebi turabigambaho ki? Ruhanga obu araaba atwemeriireho, nooha aliturwanisa?

³²Ogu ataraganyiire Omwana we nyabwe, baitu yamuhayo habwaitu itwena, alyangira ki okutuha ebintu byona hamu nawe?

³³Nooha alijunaana abakome ba Ruhanga? Ruhanga nuwe anyakubaihaho omusango.

³⁴Ow'okubacwera omusango nooha? Ni Kristo Yesu ayafiire, yagaruka yahumbuurwa omu bafu, anyakuli ha mukono gw'obulyo ogwa Ruhanga, nuwe arukututonganirra kwo!

³⁵Nooha alitwihaho engonzi za Kristo? Eriba mihito, bujune, kuhiiganizibwa, njara, okugenda busa, akabi akandi rundi empirima?

³⁶Nkooku kyahandiikirwe kiti: “Ekiro kyona twitwa habwawe; nitusisanizibwa nk'etaama ez'okwitwa.”

³⁷Nangwa, omu bintu ebi byona nitusingurra kimu habw'Ogu ayatugondeze.

³⁸Nyowe ningumiza kimu nti: Busaho kintu na kimu noobu rwakuba rufu, rundi bwomeezi, abamalaika rundi emyoyo emibi, ebintu ebiroho rundi ebiriija,

³⁹noobu byakubaire ebya ha iguru rundi eby'okuzimu, rundi ekintu ekindi kyona ekyahangirwe ekirisobora kutwihaho engonzi za Ruhanga na Kristo Yesu MUKAMA waitu.