Read Runyoro - rutooro 1 Abakor 1 Bible Online

1 Abakor 1 - Runyoro - rutooro bible

1 Abakor 1

¹Nyowe Paulo, ayayesirwe kuba omukwenda wa Kristo Yesu, Ruhanga nkooku yagondeze, na mugenzi waitu Soositene,

²nituhandiikira inywe ab'ekitebe ky'abaikiriza ruhanga abali Korinto, inywena abaayezibwe Kristo Yesu, baayetwa kuba bahikiriire, hamu n'abo boona abikiriza MUKAMA Yesu Kristo abe MUKAMA waabo kandi waitu.

³Nitubagondeza embabazi n'obusinge ebiruga hali Ruhanga Isiitwe na hali MUKAMA waitu Yesu Kristo.

⁴Obutoosa ninsiima Ruhanga habwanyu, habw'embabazi ze ezi yabagiriire omu Kristo Yesu,

⁵habwokuba omuli uwe nuho mwaihire byona. Byona ebi mwegesa n'ebi mumanya.

⁶Byona ebi twabeegeseze hali Kristo bimazire kugumibwa omuli inywe.

⁷Nahabweki tiharoho kisembo kyona eky'omwoyo eki mutaina, mukyategeriize okugaruka kwa MUKAMA waitu Yesu Kristo.

⁸Nuwe alibagumya okuhika ha mpero, musangwe mutaina musango ha kiro MUKAMA waitu Yesu Kristo eki aliiziramu.

⁹Ruhanga ayabeesire kuteerana n'Omwana we Yesu Kristo MUKAMA waitu, aba mwesigwa.

¹⁰Bagenzi bange, nimbeesengereza omu ibara lya MUKAMA waitu Yesu Kristo, inywe mwikirranize, haleke kubaho okwebaganizaamu; baitu muteerane nimugamba kamu kandi nimwikirraniza.

¹¹Habwokuba abantu ab'owa Kilowe bammanyisize nkooku mwina empaka, bagenzi bange.

¹²Eki ndukwoleka nikyo kinu: buli omu omuli inywe naagamba ati: “Nyowe ndi wa Paulo”, rundi: “Nyowe ndi w'Apolo”, ondi ati: “Nyowe ndi wa Keefa”, n'ondi ati: “Nyowe ndi wa Kristo.”

¹³Mara Kristo abaganizibwamu? Paulo nuwe yabambirwe ha musaraba habwanyu? Rundi mukabatizibwa omu ibara lya Paulo?

¹⁴Ninsiima Ruhanga habwokuba ntabatize n'omu omuli inywe, okwihaho Kirisipo na Gaayo,

¹⁵haleke kubaho arukagamba ngu, mukabatizibwa omu ibara lyange.

¹⁶(Egokwo, nkabatiza n'eka ya Sitefana. Okwihaho abo, tindukumanya obu haraaba haroho ondi weena ou nabatiize.)

¹⁷Habwokuba Kristo atantume kubatiza; baitu akantuma okurangirra Amakuru Amarungi, ntarukubaza ebigambo eby'amagezi g'ensi, omusaraba gwa Kristo guleke kwihwaho obusobozi.

¹⁸Isomo ly'omusaraba hali abarukuhwerekerra kiba ky'obudoma; baitu hali itwe abarukujunwa, nugo maani ga Ruhanga.

¹⁹Habwokuba kikahandiikwa kiti: “Ndihwerekereza amagezi g'ab'amagezi, kandi ndimaraho okwetegereza kw'abarukwetegereza.”

²⁰Ow'amagezi araha? Omwegesa w'ebiragiro araha? Kalimpaka ow'obusinge bunu araha? Amagezi g'ensi Ruhanga atagafoole budoma?

²¹Okuruga kara, Ruhanga nkooku yategekere, ab'ensi bakalemwa kumumanya habw'amagezi gaabu amaingi; baitu Ruhanga akasiima abaikiriza kubajunisa enyegesa yaitu ey'obudoma.

²²Habwokuba Abayudaaya bagonza ebihuniriza, kandi Abagiriiki baserra eby'amagezi,

²³baitu itwe twegesa Kristo ayabambirwe ha musaraba, Abayudaaya eki beeta kyesiitazo kandi Abanyamahanga eki beeta obudoma.

²⁴Baitu hali abo abarukwetwa Bayudaaya, noobu baraaba bali Bagiriiki, Kristo nuwe maani ga Ruhanga kandi magezi ge.

²⁵Habwokuba obudoma bwa Ruhanga bukira amagezi g'abantu; kandi n'obuceke bwa Ruhanga bukira amaani g'abantu.

²⁶Nahabweki bagenzi bange, mwijuke okwetwa kwanyu. Bake omuli inywe abakaba nibabarwa omu b'amagezi ab'ensi, noobwakubaire ab'obusobozi, rundi ab'enganda enkuru;

²⁷baitu Ruhanga akakoma abadoma b'ensi nukwo aswaze ab'amagezi. Ruhanga akakoma enceke z'ensi nukwo aswaze ab'amaani.

²⁸Akakoma abatali b'ekitiinisa, abarukugaywa omu nsi, n'abakaba batali b'omugaso, nukwo adibye abakaba bali b'omugaso;

²⁹haleke kubaho omuntu arukwenyumiza omu maiso ga Ruhanga.

³⁰Ruhanga nuwe ndugirro y'obwomeezi bwanyu omu Kristo Yesu ou yafoire magezi gaitu, buhikiriire bwaitu, kwera kwaitu n'okucungurwa kwaitu.

³¹Nukwo kyahandiikirwe kiti: “Ogu arukwenyumiza, leka ayenyumirize omu MUKAMA.”