Read Runyoro - rutooro 1 Abakor 10 Bible Online

1 Abakor 10 - Runyoro - rutooro bible

1 Abakor 10

¹Bagenzi bange ningonza mwijuke baisenkuruitwe nkooku baayebemberwaga Ekicu omwirungu, kandi boona nkooku baarabire omu Nyanja,

²kandi boona nkooku baabatiriziibwe omu kicu eki n'omu Nyanja [2] bakwataniize na Musa.

³Kandi bakalya ekyokulya ky'embaganiza

⁴boona bakanywa n'amaizi ag'embaganiza. Bbo baanywaga ha mwandara ogu ogwagendaga nabo, kandi Omwandara ogu akaba ali Kristo.

⁵Noobu kiraaba kyabaire kiti, baitu baingi omuli bo batasiimwe Ruhanga kandi bakahwerekerezibwa omwirungu.

⁶Hati ebi byona by'okutuhabura, tuleke kwegomba ebibi abaisenkuru itwe nkooku baakozire.

⁷Muleke kuramya embandwa nk'abamu omuli bo oku baakozire. Kikahandiikwa kiti: “Abantu bakaikarra kulya n'okunywa, kandi baimuka kucekeca.”

⁸Tuleke kweha obusiihani nk'abamu omuli bo oku baakozire, haafa abantu emitwaro ebiri n'enkumi isatu kiro kimu.

⁹Tuleke kujwahya MUKAMA nk'abamu omuli bo oku baakozire, baahwerekerizibwa enjoka;

¹⁰kandi tuleke kuhyema nk'abamu omuli bo oku baakozire baamarwaho Omuhwerekereza.

¹¹Hati ebi byona bikabaho nk'ekyokurorraho, kandi byahandiikwa kwegesa itwe abaroho biro binu ebya ha mpero.

¹²Nahabweki arukuteekereza nkooku ayemeriire, ayerinde atagwa.

¹³Busaho kyohyo ekirabaiziire ekitahikaho abantu boona. Ruhanga mwesigwa, taliikiriza ebyohyo ebibahinguraine kubahikaho, baitu omu kwohebwa nk'oku alibaha amagezi ag'okisingura nukwo musobole okugumiisiriza.

¹⁴Bagenzi bange abagonzibwa, mwetantale kuramya embandwa.

¹⁵Nimbahabura nk'abantu abarukwetegereza. Inywe mwecweremu inywenka amazima g'eki ndukugamba.

¹⁶Ekikopo eki tusabira omugisa, tinukwo okubagana ha sagama ya Kristo? Omugaati ogu tucwamu, tinukwo okubagana ha mubiri gwa Kristo?

¹⁷Omugaati nkooku guli gumu, na itwe abaingi tuba mubiri gumu, habwokuba itwena tubagana ha mugaati gumu.

¹⁸Mwetegereze emirwa y'Abaisirairi: abalya ebyonzira ebihongerwe, tinubo abaina obukwatane na Ruhanga anyakuramibwa?

¹⁹Obu, nimba ningamba ki? Nimugira ngamba nti: Ebihongiirwe embandwa nakyo kintu kiri aho? Rundi nti: Embandwa erohokwo?

²⁰Nangwa, eki ndukugamba nikyo kinu: Abakafiiri ebi bahonga, babihongera embandwa, tibabihongera Ruhanga. Tindukugonza inywe mweteerane n'embandwa.

²¹Timusobora kunywa ha kikopo kya MUKAMA, kandi na ha nkooba y'embandwa. Timusobora kulya ha kiihuro kya MUKAMA kandi na ha buro bw'embandwa.

²²Obu, MUKAMA titurukumwendereza? Niitwe turukumukiza amaani?

²³“Ebintu byona nibiikirizibwa”, baitu tibiri byona by'omugaso. “Ebintu byona nibiikirizibwa”, baitu tibiri byona birukugumya ekitebe.

²⁴Buli muntu aleke kweserurra ebye, baitu aserre n'ebirukugasira mutaahi we.

²⁵Kyona ekitundwa omu katale k'enyama mukirye n'omutima gumu, mutarukugurukyagurukya.

²⁶Habwokuba: “ensi n'ebigirumu byona bya MUKAMA”.

²⁷Kakuba omu ha baikiriza Ruhanga abaraaliza ha bugenyi, mukaikiriza kugendayo, mulye kyona eki babasemberiize mutarukugurukyagurukya.

²⁸(Baitu omuntu kakuba naabamanyisa ati: “Ekintu kinu kihongerwe”, muleke kukirya, tihali habwanyu baitu habw'ogu abamanyisize.

²⁹Eki tindukukigamba habw'oburungi bw'emitima yanyu, baitu habw'oburungi bw'omutima gw'ogu.) Mara habwaki nyigamira ebiteekerezo by'omuntu ondi?

³⁰Obu ndaaba nindya ninsiima Ruhanga, nimpyemererwa ki habw'ekindukulya mmazire kusiima?

³¹Nukwo nu, obu muraabaga nimulya rundi ninumywa rundi nimukora ebintu ebindi byona, mubikolege habw'okuhaisa Ruhanga ekitiinisa.

³²Mutalibiihiza Abayudaaya, rundi Abagiriiki, rundi ebitebe by'abaikiriza Ruhanga.

³³Mukole nka nyowe oku ndengaho kukyanganura abantu boona omu buli kintu eki nkora, ntarukuserra eby'okungasira nyenka, baitu eby'okugasira abaingi nukwo bajunwe.