Read Runyoro - rutooro 1 Abakor 11 Bible Online

1 Abakor 11 - Runyoro - rutooro bible

1 Abakor 11

¹Munkuraatire nka nyowe oku nkuraatira Kristo.

²Nimbasiima habwokuba nimunyijuka omu buli kintu kyona, kandi nimukwata ebigambo byange nkooku nabibeegeseze.

³Baitu ninyenda mwetegereze Kristo nkooku ali mutwe gwa buli muntu weena. Omutwe gw'omukazi nuwe iba, kandi omutwe gwa Kristo nuwe Ruhanga.

⁴Omusaija weena arukusaba rundi arukuranga ebya Ruhanga aswekeriire omutwe gwe, ahemura Kristo.

⁵Kandi omukazi arukusaba rundi arukuranga ataswekeriire omutwe gwe, nawe ahemura iba-nk'omukazi anyakuramya amwire omutwe gwe, nawe ahemura iba-nk'omukazi anyakuramya amwire omutwe gwe.

⁶Kakuba omukazi ayanga kweswekerra, haakire asale isoke rye; baitu okusara isoke rundi kulimwa obu kiraaba nikimuhemura, kirungi ayeswekerre.

⁷Omusaija, uwe tasemeriire kuswekerra omutwe gwe, habwokuba nuwe kisisani kandi kitiinisa kya Ruhanga; baitu omukazi aba kitiinisa kya iba.

⁸(Habwokuba omusaija Ruhanga atamwihe omu mukazi, baitu omukazi nuwe yaihirwe omu musaija.

⁹Kandi omusaija atahangirwe mukazi, baitu omukazi nuwe yahangiirwe omusaija.)

¹⁰Nahabweki omukazi asemeriire kuswekerra omutwe gwe, habw'abamalaika abaroho.

¹¹(Baitu omu ntegeka ya MUKAMA waitu, omukazi taikaraho hataroho musaija; omusaija nawe taikaraho hataroho mukazi.

¹²Omukazi nkooku yaihirwe omu musaija, omusaija nawe hati azaarwa omukazi; kandi bombi baruga hali Ruhanga.)

¹³Na inywe mwecweremu inywenka, nikihika omukazi kusaba Ruhanga ateeswekeriire omutwe?

¹⁴Obuhangwa bwonka tiburukwoleka okukuza muno isoke nkooku kihemura omusaija?

¹⁵Baitu omukazi kulikuza kiba kitiinisa kye. Habwokuba akaheebwa isoke limuswekerre.

¹⁶Obu haraaba haroho omuntu arukwenda kuteera empaka, itwe titwina kindi eki tumanyire, noobu haakuba omu bitebe ebindi by'abaikiriza Ruhanga.

¹⁷Hali binu ebi ndukubahabura, tindukubasiima, habwokuba okwesorooza kwanyu tikurugwamu oburungi baitu kurugwamu obubi.

¹⁸Eky'okubanza, obu musorrokana nk'ekitebe ky'abaikiriza Ruhanga, mpurra nkooku mwebaganizaamu. Eki na nyowe obundi nkiikiriza.

¹⁹Ego okwebaganizaamu kusemeriire kubeho omuli inywe, nukwo ab'a mazima bamanywe.

²⁰Obu mwesorooza, ekiihuro kya MUKAMA tinikyo muba nimulya.

²¹Habwokuba obu muba nimulya, buli muntu alya ebyokulya bye atalinzire abandi, kandi omu aba naarumwa enjara, ondi atamiire.

²²Mahano! Timugira maju ag'okuliiramu n'ag'okunyweramu? Rundi nimugaya ekitebe ky'abaikiriza, nimuswaza muti abataina kantu? Mbagambe ki? Mbasiime? Nangwa, tindukubasiima.

²³Habwokuba ebi nahairwe MUKAMA, na nyowe nibyo nabeegeseze nti: MUKAMA Yesu ha kiro eki yagoberiziibweho, akakwata omugaati,

²⁴obu yamazire kusiima, yagucwamu naagamba ati: “Gunu nugwo mubiri gwange oguraaheebwayo habwanyu. Kinu mukikolege okunyijuka.”

²⁵Omu mulingo nugwo gumu obu baamazire kulya, yakwata ekikopo nagamba ati: “Ekikopo kinu nikyo kiragaano ekihyaka eky'esagama yange. Kinu mukikolege, obu muraakanywaga, munywege nimunyijuka.”

²⁶Bwona obu muraalyaga omugaati gunu mukanywa ha kikopo kinu, muraamanyisaaga okufa kwa MUKAMA okuhika obu aliija.

²⁷Nahabweki weena araalyaga omugaati gunu, rundi akanywa ha kikopo kya MUKAMA atasemeriire, alisingwa omusango ogw'okusiisa omubiri gwa MUKAMA n'esagama ye.

²⁸Nukwo nu, buli muntu ayerole atakaliire ha mugaati ogu kandi atakanywire ha kikopo eki.

²⁹Habwokuba weena anyakulya kandi akanywa atarukwetegereza mubiri gwa MUKAMA, ayeriira kandi ayenywera wenka omusango.

³⁰Baingi omuli inywe nikyo barukucekera kandi nikyo barukurwarra, kandi abamu bafiire.

³¹Kakuba twecwera itwenka omusango omu mazima, titwakugucweriirwe MUKAMA.

³²Baitu MUKAMA obu atucwera omusango, atufubira; nukwo tuleke kusingwa omusango hamu n'ab'ensi.

³³Nahabweki bagenzi bange, obu muraayesoroozaaga kulya, mulindanganege

³⁴omuntu weena obu araabaga naarumwa enjara, alyege omuka ye-okwesorooza kwanyu kutaliikara kurugwamu emisango. Ebindi ndibibamanyisa obu ndiija.