Read Runyoro - rutooro 1 Abakor 12 Bible Online

1 Abakor 12 - Runyoro - rutooro bible

1 Abakor 12

¹Bagenzi bange, ninyenda mumanye ebirukukwata ha bisembo ebigabwa mwoyo Ahikiriire.

²Mumanyire ngu, obu mukaba mukyali bakafiiri, mwatwarwaga embandwa ezitagamba, nizo zaabahabisaaga.

³Nahabweki ningonza mumanye nkooku hataroho muntu n'omu aragambisiibwe Mwoyo wa Ruhanga ati: “Yesu akyenwe!” Kandi busaho muntu asobora kugamba ati: “Yesu nuwe MUKAMA”, rundi buli akigambisibwe Mwoyo Ahikiriire.

⁴Haroho ebisembo eby'emiringo nyingi, baitu Mwoyo Ahikiriire ali omu;

⁵kandi haroho obuheereza bw'emiringo nyingi, baitu MUKAMA ali omu;

⁶Kandi haroho emirimo ey'emiringo nyingi, baitu Ruhanga ali omu anyakukozesa ebisembo ebi byona omu boona.

⁷Kandi buli omu Mwoyo amuha ekisembo eky'okugasira boona.

⁸Omu, Mwoyo amuha kubaza eby'amagezi; ondi Mwoyo ogu omu, amuha okwetegerezesa abandi.

⁹Ondi Mwoyo amuha okwikiriza, ondi amuha ekisembo ky'okutamba endwara.

¹⁰Ondi Mwoyo amuha okukora ebyamahano, ondi okuranga ebya Ruhanga, ondi amagezi g'okwahurana emyoyo emirungi n'emibi, ondi ekisembo ky'okubaza endimi nyingi nkooku Mwoyo aba amuhaire, kandi ondi kusoborra amakuru g'endimi ezi.

¹¹Ebi byona bikorwa Mwoyo ogu omu, anyakugabira buli muntu nkooku agonza.

¹²Omubiri nkooku guli gumu, gwina n'ebicweka bingi, kandi ebicweka ebi byona noobu biraaba biri bingi, baitu guba mubiri gumu, na Kristo nawe nukwo ali ati,

¹³Habwokuba itwena tukabatizibwa mwoyo omu, twafooka mubiri gumu-Abayudaaya n'Abagiriiki, abairu n'ab'obugabe-itwena tukanywisibwa ha mwoyo omu.

¹⁴Habwokuba omubiri tigugira kicweka kimu, baitu bingi.

¹⁵Kakuba ekigere nikigamba kiti: “Nyowe habw'okutaba mukono, habweki tindi kicweka ky'omubiri,” eki tikikitanga kuba kicweka ky'omubiri.

¹⁶Kandi okutu kakuba nikugamba kuti: “Nyowe habw'okutaba liiso, habweki tindi kicweka ky'omubiri,” eki tikikutanga kuba kicweka ky'omubiri.

¹⁷Kakuba omubiri gwona gwabaire liiso, omuntu yakuhuliriire nkaha? Kakuba omubiri gwona gwabaire kutu, omuntu yakukagiire nkaha?

¹⁸Baitu nkooku kiri, Ruhanga akateekaniza ebicweka by'omubiri, buli kimu yakiha ekiikaro kyakyo nkooku yagondeze.

¹⁹Ebicweka byona kakuba byabaire kicweka kimu, omubiri gwakurugire nkaha?

²⁰Na hati ebicweka biri bingi, baitu omubiri guli gumu.

²¹Eriiso tirisobora kugambira omukono liti: “Tindukukwetaaga”; rundi omutwe kugambira ebigere guti: “Tindukubeetaaga”.

²²Baitu ebicweka by'omubiri ebizooka nk'ebitaina maani, nibyo bikira kwetaagwa.

²³Kandi ebicweka by'omubiri ebibarwa nk'ebitaina kitiinisa, nibyo tukira kuha ekitiinisa. Kandi ebicweka byaitu ebitukwasa ensoni, nibyo tukira kujweka;

²⁴baitu ebicweka byaitu ebikira oburungi, tibyetaaga kujwekwa. Ruhanga, omubiri nukwo yagutegekere ati: Ebicweka ebitaina kitiinisa nibyo aha ekitiinisa okukira ebindi,

²⁵nukwo omu mubiri haleke kubamu okutaikirraniza, baitu ebicweka byona bikoonyerangane.

²⁶Ekicweka kimu kakuba kisaasa, byona bisaasira hamu. Ekicweka kimu kakuba kiheebwa ekitiinisa, byona bisemerererwa hamu.

²⁷Hati nu inywe muli mubiri gwa Kristo, buli omu kicweka kyagwo.

²⁸Ruhanga, omu kitebe ky'abaikiriza, akabanza kutamu abakwenda, yagarraho abarangi, yayongeraho ebeegesa, hanyuma abakozi b'ebyamahano, yataho n'abakiza endwara, n'abakoonyezi, n'abalemi, n'abarukubaza endimi ezitali zimu.

²⁹Abo boona bakwenda? Boona barangi? Boona beegesa? Boona bakora ebyamahano?

³⁰Boona baina ebisembo by'okutamba endwara? Boona babaza endimi? Boona basoborra amakuru g'endimi?

³¹Baitu mute emitima yanyu ha kuserra ebisembo ebirukukira oburungi. Nanyowe ninyija kubooleka omuhanda ogurukukirra kimu endi yoona.