Read Runyoro - rutooro 1 Abakor 13 Bible Online

1 Abakor 13 - Runyoro - rutooro bible

1 Abakor 13

¹Noobu nkubaza endimi z'abantu n'ez'abamalaika, baitu ntaina kugonza ninsisana ekide ekirukugamba rundi enjogera ezirukujaara.

²Noobu nkuba nyina obusobozi bw'okuranga ebya Ruhanga, kandi ninyetegereza ensita ze zoona, nyina n'amagezi goona; noobu naakuba nyina okwikiriza kwona okw'okwihaho ensozi kunu ntaina kugonza, tindi kantu.

³Noobu naakugabira abanaku byona ebi nyinabyo, noobu naakuhayo omubiri gwange kwokebwa, kunu ntaina kugonza, tingasirwa kantu.

⁴Okugonza kugumiisiriza kandi kugira embabazi; okugonza tikugira ihali noobu kwakuba kwenyumiza;

⁵tikwehaisa kandi tikugira kiniga. Okugonza tikweserurra ebyakwo; tikubiihirwa, tikwikaza nzigu ha mutima;

⁶tikusiima ebitahikire, baitu kusiima ebihikire.

⁷Okugonza kugumira byona, kwikiriza byona, kunihira byona, kugumiisiriza byona.

⁸Okugonza tikuhwaho. Oburangi, bwo bulihwaho; okubaza endimi, nakwo kulihwaho; n'okumanya kulihwaho.

⁹Habwokuba okumanya kwaitu kuke, kandi n'oburangi bwaitu nabwo tibuhikire;

¹⁰ebihikire obu biriija, ebitahikire birihwaho.

¹¹Obu nkaba ndi mwana naabazaaga nk'omwana, naateekerezaaga nk'omwana, naacwamuga nk'omwana; baitu obu nakuzire, naleka eby'obuto.

¹²Hati niturorra omu ndolerwamu, tutarukuhweza kurungi; baitu omu kasumi ako, tuliroranganira kimu. Hati nimmanyaho ekicweka; baitu omu kasumi ako, ebi ndibyetegerereza kimu, nyowe nkooku nyetegererezibwe kimu.

¹³Habweki nihaikaraho bisatu: okwikiriza, okunihira, n'okugonza; baitu ekirukukira byona nukwo kugonza.