Read Runyoro - rutooro 1 Abakor 15 Bible Online

1 Abakor 15 - Runyoro - rutooro bible

1 Abakor 15

¹Bagenzi bange, hati ka mbaijukye Amakuru Amarungi aga nabarangiriire, aga mwaikiriize kandi na hati aga mugumiremu,

²nugo agabajuna kakuba mugaikiriza kurungi. Kitali eki, buli nimwikiririza busa.

³Ekikuru eki nabandize kubooleka, na nyowe eki nahairwe, nikyo kinu: Kristo akafa habw'ebibi byaitu nk'Ebyahandiikirwe oku bigamba,

⁴akaziikwa kandi yahumbuurwa haahingwireho ebiro bisatu, nk'Ebyahandiikirwe oku bigamba,

⁵akabonekera Keefa, hanyuma yabonekera ikumi n'omu.

⁶Yagaruka yabonekera bagenzi baitu abarukukira ha bikumi bitaano omurundi gumu; baingi omuli bo na hati bakyaroho, abandi noobu baliba baafire.

⁷Akongera yabonekera Yakobbo, hanyuma yabonekera abakwenda boona.

⁸Ha kumalirra akabonekera nyowe arukubakira obuto.

⁹Ningira ninyowe w'okumalirra omu bakwenda, atasemeriire n'okwetwa mukwenda, habwokuba nkahiiganiza ebitebe by'abaikiriza Ruhanga.

¹⁰Baitu embabazi za Ruhanga nizo zampikize nambere ndi, kandi embabazi ezi yangiriire itafe busa. Nangwa, nyowe nkakora muno okukira abakwenda boona, noobu araaba atali nyowe ayakozire, baitu embabazi za Ruhanga eziri omuli nyowe, nizo zaakozire.

¹¹Noobu araaba ali nyowe ayakozire, rundi abakwenda abandi, baitu ebi nibyo turangirra kandi na inywe nibyo mwaikiriize.

¹²Hati Kristo obu araaba naarangirirwa nkooku yahumbuukire omu bafu, abamu omuli inywe basobora bata kugamba ngu, okuhumbuuka kw'abafu tikuroho?

¹³Baitu okuhumbuuka kw'abafu obu kuraaba kutaroho, buli Kristo nawe atahumbuuke;

¹⁴kandi obu araaba atarahumbuukire, okurangirra kwaitu kwa busa, kandi okwikiriza kwanyu nakwo kwa busa.

¹⁵Aho nituzooka tuli babiihi b'ebisuba, habwokuba tukagumya Ruhanga nkooku yahumbwire Kristo, kandi kunu atamuhumbuule obu kiraaba kiri ky'amazima kugamba ngu, abafu tibahumbuuka.

¹⁶Abafu obu baraaba batahumbuuka, buli Kristo nawe atahumbuuke.

¹⁷Kristo obu araaba atarahumbwirwe, okwikiriza kwanyu kwa busa, kandi mukyali omu bibi byanyu.

¹⁸N'abo abaafeeriire omu Kristo bakahwerekerra.

¹⁹Obu turaaba twayesigire Kristo omu bwomeezi bunu bwonka, buli tuli bantu b'okuganyirwa okukira abandi boona.

²⁰Baitu mananukwo Kristo akahumburwa omu bafu, nuwe muzigaijo gw'abaafiire.

²¹Okufa nkooku kwaizire habw'omuntu omu, okuhumbuuka kw'abafu nakwo nukwo kwaizire habw'omuntu omu.

²²Boona nkooku bafa habw'Adamu, boona nukwo balyomeera habwa Kristo.

²³Baitu buli muntu omu rubu rwe; Kristo nuwe muzigaijo, nukwo hakurateho abe obu aligaruka.

²⁴Obu alikamara kukwasa Ruhanga ise obukama, amazire n'okuhwerekereza obulemi bwona, obusobozi bwona n'amaani goona, obu nubwo empero erihika.

²⁵Habwokuba Kristo asemeriire kuhangiriza okuhika obu alikarubatirra abanyanzigwa be boona.

²⁶Kandi omunyanzigwa wa ha mpero ow'okuhwerekerezibwa, nuwe Rufu.

²⁷“Ningira Ruhanga akamuha kulemera kimu byona.” Baitu nambere kyahandiikirwe kiti: “Nuwe alema ebintu byona”, nikimanywa kurungi Ogu ayamuhaire kulema byona nkooku atabalirwamu.

²⁸Kandi obu alimara kuheebwa byona abireme, Omwana nawe nubwo aliremwa ogu ayamuhaire kulema byona, nukwo Ruhanga abe byona omu boona.

²⁹Abafu obu baraaba batahumbuuka, abantu bagenderra ki kubatizibwa habw'abafu? Obu baraaba batahumbuuka, habwaki abantu babatizibwa habwabu?

³⁰Na nyowe ningenderra ki kwenaga omu kabi buli kasumi?

³¹Bagenzi bange, nimbarahira habw'okwenyumiza oku mbainaho omu Kristo Yesu MUKAMA waitu: Nyowe nfa buli kiro!

³²Kakuba nyebuga, nkooku abantu bakora: “Nkarwanisa enyamaiswa ndi Efeeso”, baitu nikingasira ki? Abafu obu baraaba batahumburwa, “Leka tulye, tunywe, habwokuba nyenkya tuli b'okufa.”

³³Muleke kubiihwabiihwa: “Okuteerana n'ababi nikusiisa engeso enungi.”

³⁴Mweteere, mulekere aho okusiisa. Habwokuba abamu omuli inywe tibarukumanya Ruhanga. Eki nkigambire kubakwasa ensoni.

³⁵Baitu omuntu asobora kukaguza ati: “Abafu babuumbuurwa bata? Kandi baliija baina mubiri gwa mulingo ki?”

³⁶Mudoma iwe! Embibo ei osiga temera, rundi buli ebandize kufa.

³⁷Kandi ei osiga tikiri nikyo ekimera ekiribaho, baitu osiga orujuma kwonka; rundi rw'engano rundi embibo endi.

³⁸Baitu Ruhanga aruha omubiri nkooku agonza, kandi buli rujuma aruha omulingo gwarwo.

³⁹Habwokuba emibiri yoona tesisana, baitu haroho omubiri gumu ogw'abantu, ogundi gw'ebisoro, ogundi gw'enyonyi, n'ogundi gw'encu.

⁴⁰Haroho emibiri ey'omwiguru kandi haroho n'ey'omunsi; baitu ekitiinisa eky'ey'omwiguru kindi, kandi n'ekitiinisa eky'emibiri ey'omunsi nakyo kindi.

⁴¹Okujwa kw'izooba kundi, kandi n'okujwa kw'okwezi kundi, n'okw'enyunyuuzi nakwo kundi. Kandi n'okujwa kw'enyunyuuzi ezi, nakwo tikwingana.

⁴²N'okuhumbuuka kw'abafu nukwo kuli kuti. Omubiri oguziikwa guba gw'okujunda, kandi oguhumburwa tiguli gw'okujunda.

⁴³Guziikwa guhoiremu amaani, guhumburwa gwina amaani.

⁴⁴Omubiri guziikwa guli mubiri gw'obuntu, gulihumburwa guli mubiri gw'omwoyo. Obu haraaba haroho omubiri ogw'obuntu, buli haroho n'ogw'omwoyo.

⁴⁵Nukwo kyahandiikirwe kiti: “Adamu ow'okubanza akahangwa yaba muntu mwomeezi”; Adamu ow'okumalirra yaba mwoyo ogwomeeza.

⁴⁶Obwomeezi obw'omwoyo tinubwo bubanza, baitu habanza obw'omubiri; nukwo hakurataho obw'omwoyo.

⁴⁷Omuntu ow'okubanza akaruga omwitaka, ali cuucu kwonka; omuntu owa kabiri akaruga omwiguru.

⁴⁸Omuntu ow'omu cuucu nkooiku akaba ali, n'ab'omu nsi nukwo bali; kandi ow'omwiguru nkooku ali, n'ab'omwiguru nukwo bali bati.

⁴⁹Itwe nkooku twasisaine Adamu ayarugire omu cuucu, nukwo tulisisana na Kristo ayarugire omu iguru.

⁵⁰Bagenzi bange ka mbagambire kinu: omubiri n'esagama tibisobora kugweterwa obukama bwa Ruhanga, n'ekijunda tikisobora kugweterwa ekitajunda.

⁵¹Hati ka mbamanyise ensita enu: itwena titulifa, baitu itwena tulihindurwa,

⁵²omu kanya kake nk'ak'eriiso likoimezaamu, engwara eya ha mpero obu erigamba. Habwokuba engwara erigamba, abafu balihumburwa batakyagaruka kufa, na itwe tulihindurwa.

⁵³Aho omubiri ogurukujunda, gulijwara ogutajunda, kandi omubiri gunu ogufa, gulijwara ogutafa.

⁵⁴Ogurukujunda ogu, obu guliba gujwaire ogutajunda, kandi ogurukufa gujwaire ogutafa, nubwo Ekyahandiikirwe kirihikirra ekirukugamba kiti: “Orufu rusingwirwe, rwahwerekerezibwa.”

⁵⁵“Rufu iwe, obusinguzi bwawe buraha? Rufu iwe, obusaalizi bw'omubuli gwawe buraha?”

⁵⁶Omubuli gw'Orufu nikyo ekibi, kandi amaani g'ekibi gasigikira ha Biragiro.

⁵⁷Ruhanga asiimwe anyakutuha obusinguzi naaraba omu MUKAMA waitu Yesu Kristo.

⁵⁸Nahabweki bagenzi bange abagonzibwa, mugume, mutatengatengeeta, kandi obutoosa mweyongere kukora omulimo gwa MUKAMA, mumanye ngu, obu murukumukorra, obwekambi bwanyu tibuli bwa busa.