Read Runyoro - rutooro 1 Abakor 16 Bible Online

1 Abakor 16 - Runyoro - rutooro bible

1 Abakor 16

¹Ebirukukwata ha bisembo eby'okukoonyera abaikiriza, na inywe mukole nkooku naragiire ebitebe by'abaikiriza ab'omu Galatiya.

²Ha kiro ekibanza buli wiiki, omuntu weena omuli inywe aiheho eki arukusobora ha bintu ebi atungire, akyahule, nukwo ebisembo bisoroozibwe kara ntakaizireyo.

³Obu ndihika, ndituma abamu aba mulisiima, bagenda n'ebbaruha, batwale ebisembo byanyu Yerusaalemu.

⁴Obu mulirora nikihika nyowe kugenda, ndigenda nabo.

⁵Ndibabungira obu ndiba mmazire kuraba Makedoni, habwokuba oku nuho ndukwenda kuleetwa.

⁶Obundi ndisobora kumara na inywe ebiro bike, rundi kumarrayo ebiro by'obutiti, nukwo mumboherre ha ndiba ningenda hoona.

⁷MUKAMA obu aligonza, ninihira kumara na inywe ebiro bike, habwokuba tindukwenda kubarora nk'arukubahungukira kwonka.

⁸Baitu ninyija kwikara ndi Efeeso okuhika ha kiro eky'obugenyi bwa Pentikooti,

⁹habwokuba mbaire ntungire omugisa mukooto ogw'okukorra hanu eby'omugaso bingi, kyonka haroho baingi abarukumparana.

¹⁰Timoteho obu aliija oku, mumujwahukirre kandi mukorrane nawe kurungi, habwokuba naakora omulimo gwa MUKAMA nka nyowe.

¹¹Nahabweki hatabaho arukumugaya; mumukoonyere, amale orugendo rwe n'obusinge, agaruke nambere ndi; habwokuba nyowe n'ab'oruganda boona tumutegeriize.

¹²Kandi mugenzi waitu Apolo, nkamwesengereza muno ababungire hamu n'ab'oruganda abandi baitu abaire atakagondeze. Aliija obu alitunga omwanya.

¹³Mwikale nimurora, mugumire omu kwikiriza kwanyu, mube bantu manzi kandi ab'amaani.

¹⁴Byona ebi murukukora, mubikolege nimugonzangana.

¹⁵Hati nu, bagenzi bange, mumanyire ngu, eka ya Sitefana niyo yabandize kuhinduka omu Akaaya kandi bakeehayo kuheereza abaikiriza;

¹⁶nimbateererra muhege ekitiinisa abantu nk'abo, hamu n'abakozi abandi bataahi baitu.

¹⁷Nkasemererwa habw'okwija kwa Sitefana na Fotunato n'Akaiko, habwokuba bakakora ebi mwakubaire mukozire muroho;

¹⁸ningira bakahumuuza omwoyo gwange n'ogwanyu. Abantu nk'abo mubahege ekitiinisa.

¹⁹Ebitebe by'abaikiriza Ruhanga ab'omu Asiya babaramukize. Akwila na Pirisika, hamu n'ekitebe ky'abaikiriza abeesorooleza omunju yabo babaramukize muno omu MUKAMA.

²⁰Ab'oruganda boona babaramukize. Muramukyangane nimugwangana omu kifuba nk'abantu ba Ruhanga.

²¹Nyowe Paulo, okuramukya kunu nkwehandikiire nyenka n'omukono gwange.

²²Obu haraaba haroho weena atarukugonza MUKAMA, ogu akyenwe. Ija, Ai MUKAMA!

²³Embabazi za MUKAMA waitu Yesu Kristo ziikale na inywe.

²⁴Inywena nimbagonza omu Kristo Yesu. Amiina.