Read Runyoro - rutooro 1 Abakor 6 Bible Online

1 Abakor 6 - Runyoro - rutooro bible

1 Abakor 6

¹Omuntu omu omuli inywe obu araaba aina eki arukujunaana mugenzi we, tikimukwasa nsoni kumunyegerra omu maiso g'abacwi b'emisango ab'ensi, kukira kumunyegerra omumaiso g'abarukwikiriza?

²Timurukumanya abantu ba Ruhanga nkooku nubo balicwera ensi omusango? Kandi inywe obu muraaba muli b'okucwera ensi omusango, muraalemwa muta kucwa emisango enke nk'egi?

³Timurukumanya nkooku tulicwera bamalaika omusango? Kandi emisango ey'ensi enu timwakugicwire kukiraho?

⁴Obu muraaba mwina emisango nk'egi, habwaki mugitwarra abantu abakira kugaywa ekitebe ky'abaikiriza, nubo bagicwe?

⁵Kinu ninkigamba kubakwasa ensoni. Kisoboka kita omuli inywe kuburamu muntu ow'amagezi arukusobora kuramura bagenzi be?

⁶Baitu abaiseemu nibanyegerrangana, kandi nibanyegerrangana ha batali baikiriza.

⁷Kunyegerrangana omu nkurato ez'ensi nikyoleka nkooku mulemerwe. Habwaki mutagumiisiriza kukorwa kubi? Habwaki mutaikiriza kugobezibwa?

⁸Baitu inywe inywenka mukora kubi kandi mugobeza noobu baakuba bagenzi banyu.

⁹Timurukumanya abagobya nkooku bataligwetwa omu bukama bwa Ruhanga? Muleke kubiihwabiihwa. Abanjuki, abaramya embandwa, abasiihani, abakuuhya,

¹⁰abasuma, ab'omukoijo, abatamiizi, abajumi, rundi abanyagi tibaligwetwa omu bukama bwa Ruhanga.

¹¹Abamu omuli inywe nukwo mukaba muli muti. Baitu mukoogebwa, mwayezibwa, mwaihwaho omusango omu ibara lya MUKAMA Yesu Kristo n'omu Mwoyo wa Ruhanga waitu.

¹²Kikahandiikwa kiti: “Ebintu byona ninyikirizibwa kubikora”, baitu tibiri byona ebirukugasa. “Ebintu byona ninyikirizibwa kubikora”, baitu tinyina na kimu eki ndukwemarraho.

¹³“Ebyokulya bikategekerwa enda, kandi enda yategekerwa ebyokulya” baitu byombi: enda n'ebyokulya, Ruhanga alibihwerekereza. Omubiri gutahangirwe obusiihani, baitu gukahangirwa MUKAMA, kandi MUKAMA waitu nuwe MUKAMA w'omubiri.

¹⁴Ruhanga ayahumbwire MUKAMA waitu, na itwe alituhumbuura n'obusobozi bwe.

¹⁵Timurukumanya emibiri yanyu nkooku eba bicweka by'omubiri gwa Kristo? Hati ebicweka by'omubiri gwa Kristo ndabifoora nta bicweka by'omubiri gwa malaaya? Nikikafuuhe!

¹⁶Timurukumanya ngu, omusaija anyakuteerana n'omukazi malaaya, bombi baba mubiri gumu? Nkooku kyahandiikirwe kiti: “Ababiri abo bafooke mubiri gumu.”

¹⁷Kandi anyakuteerana na MUKAMA aba mwoyo gumu nawe.

¹⁸Mwetantale obusiihani. Ebibi ebindi byona omuntu ebi akora tibisiisa mubiri gwe; baitu anyakusiihana asiisa omubiri gwe gwonyini.

¹⁹Timurukumanya omubiri gwanyu nkooku guli Nju ya Mwoyo Ahikiriire anyakuli omuli inywe, Ruhanga ou yabahaire? Timuroho habwanyu inywenka;

²⁰mukagurwa omuhendo mukooto. Nahabweki muhe Ruhanga ekitiinisa omu mibiri yanyu.