Read Runyoro - rutooro 1 Abakor 7 Bible Online

1 Abakor 7 - Runyoro - rutooro bible

1 Abakor 7

¹Okugarukamu ebi mwampandikiire: kirungi omusaija kutakwatakwata mukazi.

²Baitu habw'okwerinda ekyohyo ky'obusiihani buli musaija abe na mukazi we, kandi na buli mukazi abe namusaija we.

³Omusaija asemeriire kuteerana na mukazi we, n'omukazi nukwo akole ati iba.

⁴Habwokuba omukazi talema mubiri gwe wenka, baitu gulemwa iba. Omusaija nawe talema mubiri gwe wenka, baitu gulemwa mukazi we.

⁵Muleke kwimangana, rundi buli mwikirraniize habw'akasumi, nukwo mwemarre ha kubaza na Ruhanga; baitu hanyuma mugaruke muteerane, Sitaani taikara kuboohya habw'obuceke bwanyu.

⁶Kinu nkigambire nimbahabura, tikiri kiragiro.

⁷Naakugondeze boona baikale nkooku ndi; baitu buli omu aina ekisembo Ruhanga eki yamuhaire, omu ky'omulingo gumu n'ondi ky'omulingo gundi.

⁸Abataswire n'abataswirwe, hamu n'abafaakati nimbagambira nti: Kyakubaire kirungi baikale nka nyowe oku ndi.

⁹Baitu obu baraaba batarukosobora kwerinda, baswere rundi baswerwe. Kirungi kuswera rundi kuswerwa okukira kutuntuzibwa okwegomba kw'omubiri.

¹⁰Abaswire n'abaswirwe nimbaragira, tali nyowe baitu nimuragirwa MUKAMA: omukazi aleke kwahukana na iba

¹¹(baitu obu araaba ayahukaine nawe, aikale ataswirwe; kitali eki agarukanganemu na iba) kandi omusaija atalibinga mukazi we.

¹²Abandi, ebi ndukubagambira byange, tibiri bya MUKAMA: Omukristo weena obu aba aina omukazi atarukwikiriza Ruhanga, omukazi ogu akacwamu kwikara nawe, aleke kumubinga.

¹³Kandi omukazi weena obu aba aina iba atarukwikiriza Ruhanga, iba akacwamu kwikara nawe, omukazi ogu atalyahukana na iba.

¹⁴Habwokuba omusaija atarukwikiriza Ruhanga ayezibwa habwa mukazi we, kandi omukazi atarukwikiriza Ruhanga ayezibwa habwa iba. Kakuba kitarabaire kiti, abaana banyu tibakweziibwe; baitu hati beezibwe.

¹⁵Omu ha babiri atarukwikiriza Ruhanga, obu araaba naagonza kwahukana, leka ayahukane. Omu kintu nk'eki, omusaija omukristo rundi omukazi omukristo baba batakyabohwa; habwokuba Ruhanga akatweta twikale omu businge.

¹⁶Mukazi iwe noomanya ota nkooku otalijuna baro? Na iwe musaija, noomanya ota nkooku otalijuna mukazi wawe?

¹⁷Leka buli muntu aikale omu mulingo MUKAMA ogu yamuteekaniriize, kandi Ruhanga ogu yamwetiiremu. Nukwo nyegesa nti ebitebe byona eby'abaikiriza Ruhanga.

¹⁸Haroho omuntu ayayesirwe amazire kusarwa? Aleke kwesisaniza nk'atarasazirwe. Haroho omuntu ayayesirwe atakasazirwe? Aleke kwegomba kusarwa.

¹⁹Okusarwa n'okutasarwa tikwina mugaso, baitu ekikuru nukwo kukwata ebiragiro bya Ruhanga.

²⁰Buli muntu aikale omu mulingo ogu yayetiirwemu.

²¹Okaba oli mwiru obu wayesirwe? Tikiri kigambo. Baitu obu oraaba noosobora kutunga obugabe, haakire obutunge. Habwokuba MUKAMA ou yayesire ali mwiru, nuwe MUKAMA aha obugabe.

²²Nikyo kimu, n'ogu ou yayesire ali w'obugabe, afooka mwiru wa Kristo.

²³Mukagurwa omuhendo mukooto; muleke kuba bairu b'abantu.

²⁴Nahabweki bagenzi bange, leka buli muntu aikale omumaiso ga Ruhanga omu mulingo ogu yayetiirwemu.

²⁵Ebirukukwata ha bataswire n'abataswirwe, tinyina kiragiro kya MUKAMA. Baitu nimbahabura nk'omuntu ou musemeriire kwesiga habw'embabazi MUKAMA yangiriire.

²⁶Obu ndukurora obulemeezi obuli omumaiso, ninteekereza: kirungi omuntu aikale nkooku ali.

²⁷Okateeranizibwa n'omukazi? Leka kwahukana nawe. Tokaswire mukazi? Leka kuswera.

²⁸Baitu kakuba oswera nooba otakozire kibi. Kandi omwisiki kakuba aswerwa, nawe aba atakozire kibi. Baitu abarukuswerangana balibona obulemeezi omunsi munu; eki naakugondeze kukibajuna.

²⁹Bagenzi bange, eki ndukubagambira nkinu: akasumi akaatairweho kaagenda nikairra haihi. Okuruga hati abaina abakazi baikale nk'abatainabo;

³⁰n'abo abarukuganya baikale nk'abatarukuganya; n'abarukusemererwa baikale nk'abatarukusemererwa; n'abarukusuubura baikale nk'abataina by'okusuubura;

³¹kandi abarukukozesa ebintu by'ensi, baleke kubimarraho omutima. Habwokuba omulingo gw'ensi nkooku eri nigwija kuhwaho.

³²Tindukwenda mwikale nimutuntura. Ataina mukazi ata omutima ha bya MUKAMA, kukora ebi araasiima;

³³baitu omusaija aina omukazi ata omutima ha by'ensi, kukora ebiraasiimwa mukazi we,

³⁴nahabweki omutima gwe guli hanu na hali. Kandi omukazi ataswirwe rundi omwisiki empikirre atunturra ebya MUKAMA nkooku araikara asemiire omu mubiri n'omu mwoyo; baitu omukazi anyakuswirwe atunturra eby'ensi, kukora ebiraasiimwa iba.

³⁵Kinu ninkibagambira habw'okubagasa, tindukugenderra kubaboha, baitu kubooleka ekirukukira oburungi, nukwo muheereze MUKAMA n'omutima gumu.

³⁶Omusaija ataswire arukuhurra nkooku atarukusobora kwerinda omwisiki ou arukukora nawe kandi tarukusobora kulema omubiri gwe, akole ekihikire. Haakire baswerangane, eki tikiri kibi.

³⁷Baitu weena anyakwina omutima ogugumire, ataina ekirukumuhambiriza kuswera, naalema omubiri gwe kandi acwiremu wenka kutamuswera, naaba akozire kurungi.

³⁸Nahabweki obu aswera omwisiki ogu akora kurungi, kandi obu atamuswera aba akizireho kukora kurungi.

³⁹Omukazi abohwa hali iba, omusaija atakafiire. Iba kakuba afa, omukazi aina obugabe kuswerwa omusaija weena ou agondeze, baitu omu MUKAMA.

⁴⁰Nyowe nkooku ndukurora, kakuba aikara nkooku ali kyakukizire oburungi. Kandi ninteekereza nti: Na nyowe nyebembirwe Mwoyo wa Ruhanga.