Read Runyoro - rutooro 1 Abakor 8 Bible Online

1 Abakor 8 - Runyoro - rutooro bible

1 Abakor 8

¹Ebirukukwata ha byokulya ebihongiirwe embandwa, ebi itwena nitubimanya habwokuba “Twina amagezi”, nkooku murukugamba. Baitu “Amagezi” ago galeeta emyehembo; okugonza nukwo kwombeka.

²Anyakuteekereza ngu, aina eki amanyire, aba atakamanyire nkooku kimusemeriire.

³Baitu anyakugonza Ruhanga, nuwe amanywa Ruhanga.

⁴Hati nu, ha kulya ebihongiirwe embandwa, nitumanya “embandwa nkooku zitarohokwo”, kandi “Tiharoho Ruhanga ondi, kwihaho omu wenka.”

⁵Noobu haraaba haroho abarukwetwa baruhanga omwiguru rundi omu nsi mazimakwo haroho bingi ebirukwetwa “baaruhanga” rundi “embandwa”,

⁶baitu habwaitu haroho Ruhanga omu, Isiitwe, endugirro yaitu kandi ey'ebintu byona, na MUKAMA omu Yesu Kristo nambere ebihangwa byona byarugire, na itwe nambere twiha obwomeezi.

⁷Baitu amagezi ago, boona tibainago. Abamu, habw'okumanyiira embandwa, nibakyalya ebyokulya ebihongerwe; kandi emitima yabo habw'okusangwa eri miceke eyesiitara.

⁸Ebyokulya tinibyo bitusiimisa Ruhanga. Okutalya ebyokulya tikitufeereza kantu, kandi okulya tikitwongeraho kantu.

⁹Kyonka mwerinde, obugabe bwanyu butaliikara kwesiitaza abaceke.

¹⁰Kakuba omuntu naakurora, iwe arukwetegereza, oikaliire omu kibbali noolya, kandi asangirwe ali muceke omu mutima gwe, nawe tarukwija kutwalirizibwa okulya ebihongiirwe embandwa?

¹¹Nukwo habw'amagezi gaawe, mugenzi waitu omuceke Kristo ou yafeeriire, ahwerekerra.

¹²Kusiisa oti bagenzi bawe noosiitaza emitima yabo emiceke, oba okozire ekibi hali Kristo.

¹³Nahabweki ebyokulya obu biraaba nibireetereza mugenzi wange kugwa, nyowe tindirya nyama ebiro byona, ndeke kunaga mugenzi wange omu kibi.