Read Runyoro - rutooro 1 Abakor 9 Bible Online

1 Abakor 9 - Runyoro - rutooro bible

1 Abakor 9

¹Tindi w'obugabe? Tindi mukwenda? Ntarole Yesu Mukama waitu?

²Tali nyowe ayabakulize omu MUKAMA? Ha bandi noobu ndaaba ntali mukwenda, baitu hali inywe ndi mukwenda; habwokuba muli kyokurorraho ky'obukwenda bwange omu MUKAMA.

³Okwetonganirra kwange hali abo abarukunkaguza nukwo kunu:

⁴Tituli b'okuheebwa ebyokulya n'ebyokunywa?

⁵Titurukwikirizibwa kugenda n'omukazi munyaanyaitwe omu Yesu nk'abakwenda abandi, n'abagenzi ba MUKAMA na Keefa oku bakora?

⁶Rundi nyowe na Baranaba niitwe itwenka abaragirwa kwekorra eby'okutukoonyera?

⁷Nooha akora obuserikale, akeegurra byona ebi arukwetaaga? Nooha abyara orugonjo, atalya ha biruga omu rugonjo oru? Nooha aliisa igana, atanywa ha mata gaalyo?

⁸Nimugira binu nimbigambisibwa obusobozi bwange? Ebiragiro nabyo tinukwo bigamba biti?

⁹Kikahandiikwa omu Biragiro bya Musa kiti: “Omuntu arukukugesera, aikirizibwa kutwara ha buro.” [1] Aho nimugira Ruhanga naagamba ha bagesi bonka?

¹⁰Tarukukigamba hali itwe itwena? Eki kikahandiikwa habwaitu, habwokuba omulimi alima naanihira kutunga, kandi omugesi agesa naanihira kutwaraho ebi arukugesa.

¹¹Itwe obu turaaba twabasigiremu eby'omwoyo, nikiremeera kubatungamu eby'okukoonyera omubiri?

¹²Abandi obu baraaba babainaho obusobozi obu, kandi itwe turaasura ki? Noobu turaaba twina obusobozi obu, tutabukozese; baitu tukagumiisiriza byona nukwo tuleke kutanga Amakuru Amarungi aga Kristo.

¹³Timurukumanya abo abakora omunju ya Ruhanga nkooku balya ha by'omu Nju ya Ruhanga? N'abo abaheereza ha Itambiro nkooku balya ha byonzira ebihongerwe?

¹⁴Na MUKAMA waitu nukwo yaragiire ati: Abo abarangirra Amakuru Amarungi, baliisibwege ha by'Amakuru Amarungi.

¹⁵Baitu nyowe tinkakozesaaga busobozi obu, kandi binu timbihandiikire nukwo mubinkorre. Haakire nfe, hatabaireho muntu anyihaho kinu eki ndukwenyumirizaamu.

¹⁶Obu ndaaba nindangirra Amakuru Amarungi, eki tikirukundeetera kwenyumiza. Habwokuba ogu nugwo mulimo gwange mali. Ninkanyagwe kakuba ntarangirra Amakuru Amarungi!

¹⁷Kakuba ngarangirra nkyegondiize nyenka, empeera yange nimba ngitungire; kakuba ngarangirra nk'ayatumirwe, buli mba ninkora omulimo ogu nakwasiibwe.

¹⁸Obu, empeera yange neeha? Niyo enu: Nukwo kurangirra Amakuru Amarungi ntarukuheebwa kantu kandi ntarukukozesa busobozi obu nahairwe Makuru Amarungi.

¹⁹Noobu ndaaba ntarukulemwa muntu weena, nkeefoora mwiru wa boona, nukwo mpindule baingi kukiraho.

²⁰Omu Bayudaaya nkeefoora nk'Omuyudaaya nukwo mpindule Abayudaaya. Hali abarukulemwa Ebiragiro bya Musa nkeefoora nk'arukulemwa Ebiragiro-kandi kunu tibirukundema-nukwo mpindule abarukulemwa Ebiragiro.

²¹Hali abo abatarukulemwa Biragiro, nkaba ndi nk'atarukulemwa Biragiro-tikuli kugamba ngu, tindemwa Biragiro bya Ruhanga, baitu ndemwa ebiragiro bya Kristo nukwo mpindule abatarukulemwa Biragiro.

²²Omu baceke nkeefoora muceke, nukwo mpindule abaceke. Nkeesisaniza abantu boona omu bintu byona, nukwo nsobole kujuna abamu omuli bo.

²³Ebi byona mbikora habw'Amakuru Amarungi, nukwo na nyowe mbaganeho emigisa yago.

²⁴Timurukumanya omu mpaka z'okwiruka kaliitango, abairuki boona nkooku bairuka kwo; baitu anyakutunga ekisembo aba omu? Nahabweki mwiruke, nukwo mukitunge.

²⁵Buli muzaani ayemanyiiza kwetanga omu bintu byona. Eki, bakikora habw'okutunga ekondo erukuhwaho, baitu itwe tutunga ekondo etarukuhwaho.

²⁶Na nyowe tinyiruka ntaina eki ndukugenderra, kandi tinteera ntomi nk'arukuteera amasa;

²⁷baitu nsaalize omubiri gwange, kandi ngulema, nukwo obu ndimara kurangirra abandi, ntaliija kubarwa nk'atahikire.