Read Runyoro - rutooro 2 Abakor 1 Bible Online

2 Abakor 1 - Runyoro - rutooro bible

2 Abakor 1

¹Nyowe Paulo, Ruhanga ou yasiimire mba mukwenda wa Kristo Yesu, na Timoteho mugenzi waitu, nituhandiikira ekitebe ky'abaikiriza Ruhanga abali Korinto, hamu n'abantu ba Ruhanga boona abali omu Akaaya yoona.

²Nitubagondeza emigisa n'obusinge obwa Ruhanga Isiitwe na MUKAMA Yesu Kristo.

³Akugizibwe Ruhanga, Ise MUKAMA waitu Yesu Kristo, Isiitwe ow'embabazi kandi Ruhanga omuhuumuza.

⁴Nuwe Ogu anyakutuhuumuza omu bujune bwaitu bwona, nukwo na itwe tusobole kuhuumuza abandi abali omu bujune bw'emiringo yoona, nitubahuumuza Ruhanga nkooku yatuhuumwize.

⁵Okubonabonesibwa kwa Kristo nkooku kwasaagire hali itwe, nukwo okuhuumuzibwa kwaitu omu Kristo kwasaagire kuti.

⁶Itwe obu tubona enaku, twibona nukwo inywe muhuumuzibwe kandi mujunwe. Kandi obu tuhuumuzibwa, tuhuumuzibwa habwanyu nukwo mutunge amaani agarukuleeta okugumiisiriza enaku, nk'ezaitu ezi tugumiisiriza.

⁷Nikyo tubeesigira muno, nitumanya inywe nkooku murukubonabonesibwa hamu na itwe, nukwo mulihuumuzibwa hamu na itwe.

⁸Ab'oruganda, nitugonza inywe mumanye emihito ei twaboine omu Asiya; habwokuba ekatukiza muno amaani, yatutereburra kimu, titwanihira kukira.

⁹Mazimakwo tukateekereza ngu, tusingirwe omusango gw'okufa. Ningira eki kikabaho tuleke kweyesiga itwenka, baitu twesige Ruhanga anyakuhuumbura abafu.

¹⁰Nuwe yatujunire akabi k'okufa, kandi nuwe alitujuna. Nuwe turukwesiga nkooku araikaraga naatujuna.

¹¹Na inywe mutukoonyerege nimutusabira. Nukwo omugisa tuheebwa habw'okusaba kw'abaingi, abandi baingi baligusiimira Ruhanga habwaitu.

¹²Okwenyumiza kwaitu nkunu, kandi omutima gwange nigugumya ngu, omunsi munu, n'okukira muno omuli inywe, tukakora ebihikire nitubooleka engeso nungi kandi ez'amazima eziruga hali Ruhanga; tutarukwesiga magezi g'ensi, baitu embabazi za Ruhanga.

¹³Na hati titurukubahandiikira kindi, kwihaho ebi murukusobora kusoma mukeetegereza. Kandi ninihira nimwija kwetegerereza kimu,

¹⁴nkooku mwayetegeriizeho ekicweka. Nukwo na inywe mulisobora kwehaisa habwaitu, nka itwe oku tulyehaisa habwanyu ha kiro ky'okwija kwa MUKAMA Yesu.

¹⁵Obu namazire kwetegereza ebi byona, nkacwamu kubanza kubabungira nukwo mwongere kusemererwa obwa kabiri.

¹⁶Nkagonza kubabungira obu nkaba ningenda Makedoni kandi mbaleetweho nindugayo. Nukwo na inywe mumboherre ningenda Buyudaaya.

¹⁷Obu nagondeze kukora nti, nimugira nkaba nyina emitima ebiri? Rundi ebi nteegeka kukora, mbitegeka nk'omuntu kwonka, arukugamba ati: Ego, kandi omu kacu kake ati: Nangwa?

¹⁸Nindahira Ruhanga w'amazima, ekigambo eki tubagambira tikiri Ego na Nangwa.

¹⁹Habwokuba Omwana wa Ruhanga Yesu Kristo, nyowe, Silivano na Timoteho, ou twabatebiize, akaba atali Ego na Nangwa; baitu omuli uwe obutoosa ekigambo kya Ruhanga kiba Ego.

²⁰Ningira omuli uwe, byona Ruhanga ebi yaraganiize biba Ego. Nikyo tugambira tuti: Amina, nituraba omuli uwe habw'okuhaisa Ruhanga ekitiinisa.

²¹Ruhanga nuwe atugumya itwena: itwe hamu na inywe, kandi nuwe yatutumire;

²²akatutaho akarorwaho, kandi yatuha Mwoyo we mu mitima yaitu, abe mukwato gw'ebi atwahuliire.

²³Baitu Ruhanga nuwe kaiso wange, ekyantangire kugaruka oku nukwo kubaganyira.

²⁴Itwe tuleke kwefoora balemi b'okwikiriza kwanyu; baitu nitukora hamu na inywe nukwo musemererwe habwokuba omu kwikiriza kwanyu mwikara mugumire.