Read Runyoro - rutooro 2 Abakor 10 Bible Online

2 Abakor 10 - Runyoro - rutooro bible

2 Abakor 10

¹Nyowe Paulo, ou murukuteekereza nyeculeeza obu mba na inywe, kandi mba manzi obu mba ndi hara, habw'obuculeezi n'embabazi za Kristo,

²nimbeesengereza nti: obu ndiija oku ndeke kwoleka amaani aga nakugondeze kwoleka abo abarukuteekereza ngu, nitukora nk'ab'ensi enu oku bakora.

³Noobu turaaba tuli omunsi, baitu titurukurwana nk'ab'ensi.

⁴Eby'okurwanisa by'obulemu bwaitu tibiri by'abantu, baitu by'amaani ga Ruhanga agahwerekereza ebigo ebigumire.

⁵Itwe tumaraho empaka zoona hamu n'ekintu ekindi kyona eky'okwekuliriza ekirukutanga abantu kumanya Ruhanga, kandi tugarra ebiteekerezo byona eby'abantu hali Kristo.

⁶Inywe obu mulikamara kumworobera, nubwo na nyowe ndyeteekaniza kufubira buli ntahurra yoona.

⁷Murole ebibali omu maiso. Omuntu weena obu araaba naagumya nkooku ali wa Kristo, aijuke na itwe tuli ba Kristo nkawe.

⁸Noobu ndaaba nimpinguranizaaho kwehaisa habw'obusobozi MUKAMA obu yatuhaire kubagumya n'okubombeka, butali bw'okubahwerekereza, eki tikyankwase nsoni.

⁹Nyowe tinaakugondeze kusisana nk'arukubatiinisiriza n'ebbaruha zange zinu.

¹⁰Habwokuba abamu nibagamba bati: “Ebbaruha ze zigumire kandi z'amaani, baitu omu nzooka ye muceke, n'emigambire ye busamu kantu.”

¹¹Abarukugamba bati, leka bamanye ebi tuhandiika omu bbaruha tutaroho, nibyo tukora turoho.

¹²Itwe titurukwenda kwebara rundi kwerengesaniza n'abandi abarukwehaisa bonka. Bbo obu balengangana kandi bakeerengesaniza bonka, baba bataina eki barukwetegereza.

¹³Baitu itwe titurukwija kwehaisa kukira ha rulengo Ruhanga yatutaireho. Omu rulengo oru, na inywe nuho muli.

¹⁴Itwe titurukuhinguza ha rulengo oru, nk'abatarabahikireho. Ningira niitwe twabandize kubahikaho, twabaleetera Amakuru Amarungi ga Kristo.

¹⁵Titurukuhinguraniza kwehaisa habw'emirimo eyakozirwe abandi; baitu nitunihira ngu, okwikiriza kwanyu nkooku kurukweyongera, n'okurangaanwa kwaitu omuli inywe nakwo kulyeyongera muno.

¹⁶Nukwo tusobole kurangirra Amakuru Amarungi omunsi eza hara ohingwire owaanyu, tutarukwehaisa habw'emirimo eyakozirweyo omuntu ondi.

¹⁷Kikahandiikwa kiti: “Anyakuhaisa, leka ahaisanize MUKAMA.”

¹⁸Omuntu anyakwehaisa tali uwe asiimwa, baitu ogu anyakuhaisibwa MUKAMA.