Read Runyoro - rutooro 2 Abakor 11 Bible Online

2 Abakor 11 - Runyoro - rutooro bible

2 Abakor 11

¹Naakugondeze mungumiisirize omu budoma bwange obuke. Mbeesengeriize mungumiisirize!

²Ihali mbakwatiire, lirungi nk'erya Ruhanga; habwokuba nkabasweza Kristo nukwo mbaheyo nk'omugole empikirre anyakuswirwe omusaija omu.

³Baitu nintiina, enjoka nkooku yabiihabiihire Eva n'obugobya bwayo, ebiteekerezo byanyu nabyo nibiija kuhabisibwa mukaruga omu kweheera kimu Kristo.

⁴Kakuba haija omuntu akabeegesa Yesu ondi, atali ogu ou twabeegeseze, rundi mukatunga mwoyo ondi ou mutaratungire kara, rundi mukaikiriza amakuru agaahukaine hali aga mwaikiriize kara, timwakubiikirize ahonaaho?

⁵Nyowe ninteekereza nti: abakwenda rurangaanwa tibaina eki barukunkiza naakake.

⁶Noobu ndaaba ntabaza kurungi, baitu amagezi nyinago, kandi ebintu byona nkabibasoborra kurungi.

⁷Nyowe nkasobya obu nayebundaize nukwo inywe munyumizibwe, rundi obu nabarangiriire Amakuru Amarungi ga Ruhanga mutaina eki mwansaswire?

⁸Ebitebe ebindi by'abaikiriza nkabamaraho ebyabo, nukwo mpeereze inywe.

⁹Obu nkaba ndi na inywe ntaina kantu, busaho n'omu ou naleetiire bulemeezi, baitu ebi nkaba ninyetaaga nkabiheebwa bagenzi baitu abaarugire Makedoni. Nahabweki nkeerinda kandi ndyerinda kutabajwahya omu mulingo gwona.

¹⁰Kanjurre amazima ga Kristo aga nyinago nti: Busaho n'omu alintanga kwehaisa omunsi za Akaaya.

¹¹Kandi eki nsobora kukigamba ntarukubagonza? Ruhanga amanyire nkooku ndukubagonza.

¹²Baitu eki ndukukora hati nikyo ndiikara ninkora, nukwo ncwe abo abarukugonza kwehaisa ngu, omulimo ogu barukukora nugwo gumu n'ogwaitu.

¹³Nangwa, abantu nk'abo tubeeta bakwenda b'ebisuba, bakozi ngobya, nibeefoora nk'abakwenda ba Kristo.

¹⁴Eki kireke kutuhuniriza, habwokuba na Sitaani wenka ayefoora nka malaika w'omusana.

¹⁵Nahabweki tikirukuhuniriza kurora abaheereza be nibeefoora nk'abaheereza b'obuhikiriire. Empero yaabo eringana ebikorwa ebi barukukora.

¹⁶Ningaruka kugamba nti: Muleke kuteekereza ngu, ndi mudoma. Nangwa, noobu muraaba nimunteekereza muti, baitu mungumiisirize nk'omudoma, nukwo nyehaisizeeho kake.

¹⁷(Eki ndukwija kugamba, tindukukigambisibwa obusobozi bwa MUKAMA, baitu ninkigamba nk'omudoma arukugumya ngu, aina eky'okwehaisaniza.

¹⁸Abaingi nkooku beehaisa nibasigikira ha by'ensi enu, na nyowe ka nyehaise nti.)

¹⁹Inywe muba b'amagezi, nikyo abadoma mubagumiisiririza n'okusemererwa!

²⁰Mumanyire kugumiisiriza omuntu noobu abafoora abairu, rundi abanyaga, rundi abazindiriza, rundi abeehulirraho, rundi abateera empi.

²¹Ebi nimbigamba nk'anyakwina ensoni, habwokuba itwe tutasobole kubigumira. Baitu ebireetera omuntu weena obumanzi obw'okwehaisa; kambaze nk'omudoma-na nyowe nibyo birukundeetera kwehaisa.

²²Bbo Bahebburaayo? Na nyowe nukwo ndi. Bbo Baisrairi? Na nyowe nukwo ndi. Bbo baijukuru ba Abburahamu? Na nyowe nukwo ndi.

²³Bbo baheereza ba Kristo? Na nyowe nukwo ndi kandi nimbakira; kambaze nk'omugu w'iraro, nimbakira omu kukora muno, nimbakira omu kubohwa omu nkomo emirundi nyingi, omu kuteerwa enkoba ezitarukubarwa, n'omu kabi k'okufa emirundi nyingi.

²⁴Emirundi etaano Abayudaaya bakanteera enkoba asatu na mwenda.

²⁵Nkateerwa emiigo kasatu, nateerwa amabaale omurundi gumu. Emeeri naagenderamuga ekacweka emirundi esatu: naagwa omu nyanja naasiibamu kandi naaraaramu.

²⁶Emirundi nyingi omu ngendo zange nkagwa omu kabi k'ebisaaru, akabi k'abanyagi, akabi omu bantu ab'ihanga lyange, akabi omu Banyamahanga, akabi omu rubuga, akabi omu irungu, akabi omu nyanja, akabi omu bagenzi baitu ab'ebisuba;

²⁷omu kutalibana n'omu kulemererwa, omu kuraara ha muro emirundi nyingi, omu njara n'iroho, omu kuburwa ebyokulya emirundi etali emu, n'omu mbeho ntaina eky'okwefubika.

²⁸Noobu ndaaba ntagambire bindi, haroho n'ebirukundemeera buli kiro, kukira muno okutunturra ebitebe byona by'abaikiriza.

²⁹Nooha aceka, nyowe ntacekere? Nooha ayesiitazibwa, nyowe ntabiihirwe?

³⁰Obu ndaaba ndi w'okwehaisa, kanyehaise habw'ebintu ebyoleka obuceke bwange;

³¹Ruhanga, kandi Ise MUKAMA Yesu, anyakuhaisanizibwa ebiro byona, naamanya nkooku ntarukubiiha.

³²Omu Damasiko omulemi omukuru ow'Omukama Areeta akataho abalinzi orubuga Damasiko nukwo ankwate.

³³Baitu abaikiriza bakanta omu kisombero, bandabya omu idirisa, bansirimurra ha kisika ky'orubuga, naacwa omu mikono ye.