Read Runyoro - rutooro 2 Abakor 12 Bible Online

2 Abakor 12 - Runyoro - rutooro bible

2 Abakor 12

¹Nyowe kimpikiriire okwehaisa, noobu ndaaba ntarukukutungamu kantu. Leka nyongere kubagambira MUKAMA ebi yansuukuliire omu kubonekerwa.

²Nimmanya omuntu anyakwikiriza Kristo, ayatwairwe omu iguru lya kasatu, hati haahingwireho emyaka ikumi n'ena-rundi akaba aina omubiri rundi atainagwo, tindukumanya. Ruhanga nuwe arukumanya.

³Kandi nimmanya omuntu ogu nkooku yatwairwe omu Kiikaro ky'Okuhiirwa-rundi akaba aina omubiri rundi atainagwo, tindukumanya. Ruhanga nuwe arukumanya.

⁴Akahurrayo ebigambo omuntu ebi atasobora kwatura kandi omuntu ebi atasobora kusubirra.

⁵Leka nyehaise habw'omuntu ogu, baitu habwange tindukwija kwehaisa, kwihaho omu buceke bwange.

⁶Noobu ndatandika kwehaisa, baitu eki tikyanteere obudoma, habwokuba ninyija kubaza amazima. Nangwa kankireke, tihaikara kubaho omuntu arukunteekerezaho ebirukukira ebi arukundoramu, rundi ebi arukumpurraho.

⁷Baitu okuntanga kwehaisa muno habw'ebingi ebi naasuukuliirwe, nkacumitwa ihwa omu mubiri, liri nk'omukwenda wa Sitaani ow'okumbonesa, ntaliija kuhinguraniza omu kwehaisa.

⁸Nkeesengereza MUKAMA emirundi esatu, lindugeho;

⁹baitu uwe yangarukamu ati: “Obukonyezi bwange nibukumara, habwokuba amaani gange gahikirizibwa omu buceke bw'abantu.” Nikyo ndukwesiimira muno okwehaisaniza omu buceke bwange, nukwo amaani ga Kristo gasobole kwikara omuli nyowe.

¹⁰Habwa Kristo, nikyo ndukusemererwa omu buceke, omu kujumwa, omu kulemererwa, omu kuhiiganizibwa, n'omu mihito; habwokuba obu mba muceke, nubwo ngira amaani.

¹¹Mazimakwo mbalize nk'omudoma! Niinywe mukimpambiriize, habwokuba niinywe mwakubaire nimumpaisa. Noobu ndaaba ntali kantu, baitu abakwenda abo rurangaanwa tibaina eki barukunkiza naakake.

¹²Ebikorwa by'omukwenda ow'amazima nkabikorra omuli inywe ninyehayo muno. Nkabakorramu ebirukuhuniriza, ebyamahano, hamu n'ebikorwa by'amaani.

¹³Ebitebe ebindi by'abaikiriza tukabakorra karungi ki aka tutarabakoliire inywe? Rundi nyowe habw'okutabasaba kantu? Ensobi egi muginganyire!

¹⁴Gunu nugwo omurundi gwa kasatu nyeteekaniize kwija owaanyu. Tindukwijayo kubaleetera obulemeezi, habwokuba tindukuserrayo ebyanyu, baitu ninserra inywe. Ningira abaana tibasemeriire kwahurra abazaire eby'okubakoonyera, baitu abazaire nubo baahurra abaana.

¹⁵Nyowe ndihayo ebyange n'okusemererwa kandi nyeheyo nyenka habw'emyoyo yanyu. Baitu nyowe habw'okubagonza muno, nikyo murasigikiraho kungonza kake?

¹⁶Mukaikiriza nkooku ntarabaleetiire bulemeezi, baitu nimugamba ngu, nkaba ndi ncwangya kandi nkabagobeza.

¹⁷Hali abo aba nabatumireho, haroho ou nayekonyiize okubagobeza?

¹⁸Nkeesengereza Tito kwija oku, namutuma kugenda na mugenzi waitu onu. Kandi Tito aina eki yabagobiize? Tutakoze omwoyo gumu? Tutakwate ekirale kimu?

¹⁹Na hati hoona nimukyateekereza ngu, tubaire nitwetonganirra omu maiso ganyu? Abagonzibwa, byona ebi turukubaza tubibaliza omu maiso ga Ruhanga, nkooku Kristo yakubibaliize habw'okubombeka.

²⁰Eki ndukutiina nukwo kwija nkabasanga mwina engeso ezi ntarukwenda, kandi na inywe mukansanga nyina engeso ezi mutaakwenzire; tihaikara kubayo enkungani, ihali, ekiniga, okwegonza, okuhangiira, okugambisibwa, okwetumbura, n'okujagaraza abantu.

²¹Nintiina ngu, obu ndigaruka kwija, Ruhanga wange alimbundaaza omu maiso gaanyu, nukwo na nyowe ndirirre baingi omuli abo abaakozire kara ebibi, kandi abaayangire okwegarukamu obubi bwabu, obusiihani, n'orwanju ebi baakozire.