Read Runyoro - rutooro 2 Abakor 2 Bible Online

2 Abakor 2 - Runyoro - rutooro bible

2 Abakor 2

¹Nikyo nacweriiremu kutagaruka kubabungira ndeke kubatuntuza.

²Obu ndabatuntuza, mara nibaha abarandeetera omuhimbo? Ogu ou ntuntwize?

³Kandi nikyo nabahandiikiriire, nukwo obu ndiija, ndeke kubiihizibwa abo abaakubaire nibandeetera omuhimbo. Habwokuba nkagumya nti: okusemererwa kwange kuliba kusemererwa kwanyu inywena.

⁴Nkabahandiikira nyina obujune bwingi n'obusaasi omu mutima, kandi n'amaizi maingi omu maiso, ntarukugenderra kubatuntuza, baitu okubooleka nkooku mbagonza muno.

⁵Obu haraaba haroho ayakozire ekirukusaaliza, atasaalize nyowe nyenka, baitu akabasaaliza inywena.

⁶Omuntu nk'ogu, ekifubiro eki yahairwe abaingi, nikimumara.

⁷Haakire mwakumuganyiire mumuhuumuza, nukwo aleke kutereburwa obujune obuhinguraine.

⁸Nikyo ndukubeesengerereza nti: Mugaruke mumwoleka engonzi.

⁹Nikyo nahandiikiire ningenderra okubalenga, mmanye obu muraaba nimuhurra omu byona.

¹⁰Weena ou muganyira, na nyowe mmuganyira. Kandi obu haraaba haroho eki naaganyiire, nkakiganyira habwanyu, omumaiso ga Kristo,

¹¹nukwo tutange Sitaani kutusingura; habwokuba emitego ye tugimanyire.

¹²Obu nahikire Turoha kurangirrayo Amakuru Amarungi ga Kristo, oku nkasanga orwigi runkinguliirwe kukora omulimo gwa MUKAMA.

¹³Baitu omutima gwange gutahuumule habw'okutasangayo mugenzi wange Tito. Nukwo kubaraga, nayongera nagenda Makedoni.

¹⁴Baitu Ruhanga asiimwe, anyakutusinguza butoosa omu Kristo, kandi naakorra omuli itwe kurarangya hoona amakuru ag'okumumanya, amakuru agarukuboya nk'omugaju.

¹⁵Habwokuba hali abantu abarukujunwa n'abandi abarukuhwerekerra, itwe tuli mugaju gwa Kristo ogurukuboyera Ruhanga.

¹⁶Hali abo abarukuhwerekerra, tuli kijunde ky'orufu ekirukwita; baitu hali abo abarukujunwa, tuli kiboya ky'obwomeezi ekirukwomeeza. Nooha asemeriire omulimo ogu?

¹⁷Itwe titurukusisana nk'abaingi, ababungya ekigambo kya Ruhanga kukiihamu amagoba; baitu tuli bantu beesigwa, abaatumirwe Ruhanga, kandi twegeseza omumaiso ge nk'abaheereza ba Kristo.