Read Runyoro - rutooro 2 Abakor 3 Bible Online

2 Abakor 3 - Runyoro - rutooro bible

2 Abakor 3

¹Hati twagaruka kwehaisa itwenka? Nitwetaaga ebbaruha ez'okuturanga hali inywe, rundi inywe kutuha ez'okuturanga ahandi, nkooku abandi barukuzeetaaga?

²Inywe inywenka niinywe bbaruha yaitu ey'okuturanga, ehandiikirwe omu mitima yanyu, erukumanywa kandi erukusomwa abantu boona.

³Kandi inywe muli bbaruha ya Kristo ei twakwasiibwe, ebbaruha eterahandiikirwe na bwino, baitu eyahandiikirwe Mwoyo wa Ruhanga omwomeezi; hatali ha bibbali by'amabaale, baitu ha mitima y'abantu.

⁴Obu nubwo obwesige obu twina hali Ruhanga omuli Kristo.

⁵Itwe titurukwemarra. Titurukusobora kugamba ngu, ekintu kyona nikiruga hali itwe; baitu okwemara kwaitu kuruga hali Ruhanga,

⁶ayatusoboize kuba baheereza b'Endagaano Empyaka, etarahandiikirwe omu nyuguta, baitu eyahandiikirwe omu myoyo yaitu; habwokuba enyuguta ita, baitu Omwoyo gwomeeza.

⁷Endagaano eya ira eyasarwirwe ha mabaale, obu eraaba yaizire n'ekitiinisa kingi, ekyatangire Abaisirairi kurora amaiso ga Musa habw'okumulikana kwago, kandi kunu ekaba neija kuhwaho,

⁸endagaano empyaka enyakuleetwa Mwoyo teriija n'ekitiinisa ekirukukiraho?

⁹Nahabweki endagaano eyasingisize omusango obu eraaba yaizire n'ekitiinisa, endagaano erukwihaho omusango esemeriire kugikirra kimu ekitiinisa.

¹⁰Mazimakwo endagaano eyaizire ira n'ekitiinisa hati tekyainakyo, habwokuba kikamarwaho ekitiinisa ekindi ekirukukikiraho.

¹¹Endagaano enyakuhwaho obu eraaba yatungire ekitiinisa kyayo, egi etarukuhwaho esemeriire kutunga ekirukukiraho obwingi.

¹²Itwe abaina okunihira nk'oku, nikyo twegeseza n'obumanzi.

¹³Tituli nka Musa ayayeswekeriire ha maiso, nukwo Abaisirairi baleke kurora ekitiinisa kye nkooku kyagendaga nikikeeha.

¹⁴Mara emitima yabu ekagumangana; n'okuhika hati obu basoma Endagaano ya ira, ekisweko nk'eki kiroho kandi tikibaruga ha maiso, habwokuba omu Kristo wenka nuho kiihirwaho.

¹⁵Nangwa n'okuhika hati ebya Musa obu bisomwa, ekisweko eki kiikara kiswekere emitima yabu;

¹⁶baitu omuntu obu ahindukira MUKAMA, ekisweko eki kiihwaho.

¹⁷Hati MUKAMA ogu nuwe Mwoyo, kandi nambere hali Mwoyo wa Ruhanga, nuho haba obusinge.

¹⁸Na itwe itwena obu turaaba niturora ekitiinisa kya MUKAMA n'amaiso agataswekerwe, tuhindurwa kusisana nawe, nituruga omu ktiiinisa ekimu, nitutaaha omu kindi ekirukukiraho; kandi eki kikorwa MUKAMA anyakuli Mwoyo.