Read Runyoro - rutooro 2 Abakor 4 Bible Online

2 Abakor 4 - Runyoro - rutooro bible

2 Abakor 4

¹Nahabweki itwe abaahairwe obuheereza bunu habw'embabazi za Ruhanga, titurukuterebuka.

²Tukanga ebirukukwasa ensoni n'ebirukukorwa omu nsereko. Tituli bagobya, tituhindahindura ekigambo kya Ruhanga, baitu amazima tugooleka bbwa, nukwo abantu boona batusiimire omu mitima yabo omumaiso ga Ruhanga.

³Amakuru gaitu Amarungi noobu garaaba gaswekeriirwe, baitu gaswekeriirwe habw'abo boona abarukuhwerekerra.

⁴Nubo abo abatarukwikiriza, habwokuba omukuru w'ensi enu aswekeriire emitima yabo, nukwo abatange kurora omusana ogw'Amakuru Amarungi ag'ekitiinisa kya Kristo, anyakuli kisisani kya Ruhanga.

⁵Itwe titwegambaho itwenka, baitu turangirra Yesu Kristo nkooku ali MUKAMA, kandi itwe tuli baheereza banyu habwe.

⁶Ruhanga ayagambire ati: “Leka omusana gujwere omu mwirima,” nuwe yamulikire omu mitima yaitu, yatuha kwoleka abantu ekitiinisa kya Ruhanga ekyazookere omu Kristo.

⁷Baitu itungo eri, itwe twinalyo omu bibindi by'ibumba habw'okwoleka obusobozi obuteerengwa nkooku buli bwa Ruhanga, tibuli bwaitu.

⁸Tugosirwe embaju zoona, baitu titufunziibwe; tusobiirwe, baitu tirurukuterebuka.

⁹Tuhiiganizibwe, baitu titunagiriziibwe; tutiirwe hansi, baitu tituhwerekereziibwe.

¹⁰Obutoosa tugenda twina okufa kwa Yesu omu mibiri yaitu, nukwo obwomeezi bwe nabwo buzookere omu mibiri yaitu.

¹¹Itwe obu tuba tukyali boomeezi, butoosa tuba mu kabi k'okufa habwa Yesu, nukwo obwomeezi bwe buzookere omu mibiri yaitu erukufa.

¹²Nahabweki orufu rukorra omuli itwe, baitu obwomeezi omuli inywe.

¹³Itwe nkooku twina omwoyo gumu ogw'okwikiriza nk'ogwa Daudi ayahandiikire ati: “Nkaikiriza, nikyo nabaliize.” Na itwe nitwikiriza, nikyo turukubaliza.

¹⁴Nitumanya ogu ayahumbwire MUKAMA Yesu omu bafu nkooku alituhumbuura hamu nawe, nukwo itwena atuhikye nambere ali.

¹⁵Habwokuba byona biroho habwanyu. Kandi emigisa ya Ruhanga nkooku erukugenda neekanya omu bantu abarukweyongera obwingi, nukwo emigisa ye ekanyise eti okusiima kwaitu, kandi Ruhanga aheebwe ekitiinisa.

¹⁶Nahabweki titurukuterebuka. Omubiri gwaitu noobu guraaba nigujunda, baitu omwoyo gwaitu gugaruka buhyaka buli kiro.

¹⁷Omuhito gunu omuke ogw'akasumi kake nigututeekaniriza ekitiinisa ekitahwaho kandi ekitainganwa.

¹⁸Itwe titurukuta maiso ha bintu ebirukurorwa, baitu tugata ha bintu ebitarukurorwa; habwokuba ebirukurorwa bihwaho, baitu ebitarukurorwa tibihwaho.